ເກົາຫຼີເໜືອຖະແຫຼງຄວາມສຳພັນອາດສິ້ນສຸດ ຫາກເກົາຫຼີໃຕ້ຍັງຫວ່ານໃບປິວໂຄສະນາຕໍ່ຕ້ານຂ້າມເຂດແດນ

ລາຍງານ 7 ມິຖຸນາ 2020, ສຳນັກງານແນວໂຮມ ເຊິ່ງເປັນໜ່ວຍງານທີ່ມີພາລະບົດບາດໂດຍກົງກ່ຽວກັບການສ້າງສາຍພົວພັນກັບເກົາຫຼີໃຕ້ ຢູ່ພາຍໃຕ້ສັງກັດກະຊວງການຕ່າງປະເທດເກົາຫຼີເໜືອ ອອກຖະແຫຼງການເມື່ອວັນເສົາ (6 ມິຖຸນາ) ທີ່ຜ່ານມາ ວ່າຕາບໃດທີ່ລັດຖະບານເກົາຫຼີໃຕ້ຍັງບໍ່ດຳເນີນການຕໍ່ຄຳຮຽກຮ້ອງ ລັດຖະບານເກົາຫຼີເໜືອຈະຖອນເຈົ້າໜ້າທີ່ທັງໝົດອອກຈາກສູນປະສານງານຮ່ວມສອງເກົາຫຼີ ທີ່ຕັ້ງຢູ່ພາຍໃນນິຄົມອຸດສາຫະກຳແກຊອງ.

ເນື້ອໃນຖະແຫຼງການລະບຸຕໍ່ອີກວ່າ ການທີ່ເກົາຫຼີໃຕ້ຍັງປ່ອຍປະໃຫ້ມີການສົ່ງຂີ້ເຫຍື້ອຂ້າມຊາຍແດນຢ່າງຕໍ່ເນື່ອງເປັນເວລາຍາວໃດ ມາເຖິງຈຸດທີ່ເກົາຫຼີເໜືອບໍ່ອາດນິ້ງນອນໃຈໄດ້ອີກຕໍ່ໄປ ເນື່ອງຈາກເປັນສະຖານະການທີ່ເຮັດໃຫ້ລັດຖະບານເກົາຫຼີເໜືອໄດ້ຂໍ້ສະຫຼຸບຊັດເຈນວ່າ ສັດຕູຍາມໃດກໍ່ຍັງເປັນສັດຕູຢູ່ຄືເກົ່າ.

ເຊິ່ງສຳນັກຂ່າວກາງເກົາຫຼີ (KCNA) ໄດ້ເຜີຍແຜ່ຖະແຫຼງການຂອງທ່ານ ນາງ ຄິມ ໂຢ-ຈອງ ນ້ອງສາວຂອງທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ ເມື່ອວັນພະຫັດ (4 ມິຖຸນາ) ທີ່ຜ່ານມາ ວ່າເກົາຫຼີໃຕ້ບໍ່ຄວນໃຊ້ຂໍ້ອ້າງເລື່ອງການປ່ອຍບອນລູນ ທີ່ພາຍໃນເຕັມໄປດ້ວຍໃບປິວໂຄສະນາຊວນເຊື້ອຕໍ່ຕ້ານລັດຖະບານເກົາຫຼີເໜືອໃຫ້ລອຍຂ້າມຊາຍແດນມານັບຄັ້ງບໍ່ຖ້ວນ ວ່າເປັນເສລີພາບໃນການສະແດງຄວາມເປັນເຫັນ ແລະ ປະນາມກຸ່ມນັກເຄື່ອນໄຫວດັ່ງກ່າວ ເຊິ່ງສ່ວນໃຫຍ່ເປັນຜູ້ລີ້ໄພຄົນເກົາຫຼີເໜືອວ່າ ທໍລະຍົດຕໍ່ຊາດບ້ານເມືອງ.

ນ້ອງສາວຂອງຜູ້ນຳເກົາຫຼີເໜືອກ່າວເຖິງສູນປະສານງານຮ່ວມສອງເກົາຫຼີ ວ່າເປັນສຳນັກງານທີ່ສ້າງແຕ່ບັນຫາ ແລະ ໃນອະນາຄົດເກົາຫຼີໃຕ້ອາດຕ້ອງຍ້າຍອອກເປັນການຖາວອນຈາກນິຄົມອຸດສາຫະກຳແກຊອງ, ນອກຈາກນີ້ ທ່ານ ນາງ ຍັງກ່າວເຖິງຂໍ້ຕົກລົງການຮ່ວມມືທາງທະຫານຂ້າມເຂດແດນ ທີ່ທ່ານ ມູນ ແຈ-ອິນ ປະທານປະເທດເກົາຫຼີໃຕ້ ແລະ ທ່ານ ຄິມ ຈອງ-ອຶນ ລົງນາມຮ່ວມກັນທີ່ນະຄອນຫຼວງປຽງຢາງ ເມື່ອເດືອນກັນຍາ 2018 ເປັນຂໍ້ຕົກລົງທີ່ບໍ່ມີຄວາມໝາຍຄວາມສຳຄັນ.

ໃນດ້ານຂອງລັດຖະບານເກົາຫຼີໃຕ້ ຍັງບໍ່ສະແດງຈຸດຢືນຢ່າງເປັນທາງການຕໍ່ຖະແຫຼງການສະບັບວັນເສົາ ຂອງເກົາຫຼີເໜືອ, ແຕ່ໂຄສົກທຳນຽບປະທານປະເທດເກົາຫຼີໃຕ້ ກ່າວວ່າກິດຈະກຳການປ່ອຍບອນບູນສົ່ງໃບປິວຂ້າມຊາຍແດນ ເປັນຜົນຮ້າຍຫຼາຍກວ່າຜົນດີ, ຂະນະທີ່ກະຊວງລວມຊາດຂອງເກົາຫຼີໃຕ້ຢືນຢັນວ່າກຳລັງເລັ່ງຫາແນວທາງແກ້ໄຂບັນຫານີ້ໃຫ້ຍຸຕິເປັນການຖາວອນ ພາຍຫຼັງໄດ້ຮັບຄຳຮ້ອງຈາກເຈົ້າເມືອງ 10 ເມືອງທີ່ມີຊາຍແດນຕິດກັບເກົາຫຼີເໜືອ ຂໍໃຫ້ລັດຖະບານແກ້ໄຂສະຖານະການໂດຍດ່ວນ ເນື່ອງຈາກເປັນຫ່ວງເລື່ອງຄວາມປອດໄພຕໍ່ຊີວິດ ແລະ ຊັບສິນຂອງປະຊາຊົນໃນພື້ນທີ່.

HTML tutorial