ສະພາແຫ່ງຊາດຫວຽດນາມ ໃຫ້ສັດຕະຍາບັນຕໍ່ຂໍ້ຕົກລົງການຄ້າເສລີ ກັບສະຫະພາບເອີຣົບ

ລາຍງານ 8 ມິຖຸນາ 2020, ສະພາແຫ່ງຊາດຫວຽດນາມມີມະຕິ ດ້ວຍສຽງສ່ວນໃຫຍ່ ກວມເອົາ 94.6% ໃຫ້ສັດຕະຍາບັນຕໍ່ຂໍ້ຕົກລົງການຄ້າເສລີ ກັບ ສະຫະພາບເອີຣົບ (EU) ທີ່ມີຊື່ຢ່າງເປັນທາງການວ່າ “ຂໍ້ຕົກລົງການຄ້າເສລີສະຫະພາບເອີຣົບຫວຽດນາມ” (EVFTA) ຄາດວ່າຈະມີຜົນບັງຄັບໃຊ້ຢ່າງເປັນທາງການຕັ້ງແຕ່ວັນທີ 1 ກໍລະກົດນີ້ເປັນຕົ້ນໄປ ພາຍຫຼັງມີການລົງນາມເມື່ອເດືອນມິຖຸນາ 2019.

ເຊິ່ງສະຫະພາບເອີຣົບໃຫ້ສັດຕະຍາບັນຕໍ່ EVFTA ເມື່ອເດືອນກຸມພາ ທີ່ຜ່ານມາ ຫວຽດນາມຖືເປັນປະເທດທີ 2 ໃນພູມມິພາກອາຊີຕາເວັນອອກສຽງໃຕ້ ທີ່ສະຫະພາບເອີຣົບໃຫ້ການຮ່ວມມືທາງການຄ້າໃນລະດັບສອງຝ່າຍ ຖັດຈາກສິງກະໂປ, ຂະນະທີ່ທະນາຄານໂລກ ຄາດຄະເນວ່າ EVFTA ຈະເຮັດໃຫ້ GDP ແລະ ການສົ່ງອອກຂອງຫວຽດນາມຂະຫຍາຍຕົວອີກ 2.4% ແລະ 12% ຕາມລຳດັບ ພາຍໃນປີ 2030 ຊ່ວຍໃຫ້ປະຊາຊົນມີຄຸນນະພາບຊີວິດທີ່ດີຂຶ້ນ ແລະ ຈະເຮັດໃຫ້ຫຼາຍແສນຄົນໄດ້ມີໂອກາດຫຼຸດພົ້ນຈາກຄວາມທຸກຍາກ.

ຂະນະດຽວກັນ, ຂໍ້ຕົກລົງການຄ້າດັ່ງກ່າວຍັງຈະສົ່ງຜົນປະໂຫຍດໃຫ້ກັບຫວຽດນາມ ໃນການຂະຫຍາຍຕະຫຼາດທີ່ກ່ຽວຂ້ອງກັບໄປສະນີ, ການຂົນສົ່ງ, ການທະນາຄານ ແລະ ຕະຫຼາດຈັດຊື້ສາທາລະນະໃຫ້ສອດຄ່ອງກັບມາດຕະຖານຂອງສະຫະພາບເອີຣົບ ໂດຍກຳແພງພາສີຂອງທັງສອງຝ່າຍຈະຫຼຸດຫາຍໄປຫຼາຍເຖິງ 99% ຕະຫຼອດໄລຍະ 10 ປີຕໍ່ຈາກນີ້.

ປັດຈຸບັນຫວຽດນາມ ເປັນປະເທດຄູ່ຄ້າໃນອາຊີຕາເວັນອອກສຽງໃຕ້ລາຍໃຫຍ່ອັນດັບ 2 ຂອງສະຫະພາບເອີຣົບ ດ້ວຍມູນຄ່າການຄ້າ 56,000 ລ້ານໂດລາສະຫະລັດ ເມື່ອປີທີ່ຜ່ານມາ, ສ່ວນມູນຄ່າການລົງທຶນໂດຍກົງຈາກຕ່າງປະເທດໃນຫວຽດນາມ ເມື່ອປີທີ່ຜ່ານມາ ມີມູນຄ່າ 38,000 ລ້ານໂດລາສະຫະລັດ ເປັນສະຖິຕິທີ່ສູງທີ່ສຸດໃນຮອບ 10 ປີ.

ເຊິ່ງການເຈລະຈາ FTA ລະຫວ່າງສະຫະພາບເອີຣົບ ກັບ ອາຊຽນ ທີ່ດຳເນີນການມາຕັ້ງແຕ່ປີ 2017 ຍັງບໍ່ມີຄວາມຄືບໜ້າຢ່າງສ້າງສັນ ແຕ່ຫາກສະພາພາບເອີຣົບສາມາດລົງນາມຂໍ້ລົງຕົກ FTA ຮ່ວມກັບສະມາຊິກອາຊຽນໄດ້ຢ່າງໜ້ອຍ 6 ປະເທດ ຂໍ້ຕົກລົງການຄ້າກັບສະຫະພາບເອີຣົບໃນນາມອາຊຽນອາດບໍ່ຈຳເປັນອີກຕໍ່ໄປສຳລັບສະຫະພາບເອີຣົບ ໂດຍສະເພາະຢ່າງງຍິ່ງເມື່ອກົດໝາຍການຄ້າກັບຕ່າງປະເທດຂອງມຽນມາ ແລະ ກຳປູເຈຍຍັງມີຂໍ້ຈຳກັດຫຼາຍ ລວມທັງລັດຖະບານກຳປູເຈຍກຳລັງມີບັນຫາເລື່ອງສິດທິມະນຸດ ແລະ ການຄ້າກັບສະຫະພາບເອີຣົບ.

HTML tutorial