ຜູ້ຕິດເຊື້ອໂຄວິດ-19 ໃນ ສປປ.ລາວ ໄດ້ຮັບການປິ່ນປົວດີທັງໝົດແລ້ວ 19 ຄົນ

ລາຍງານ 9 ມິຖຸນາ 2020, ນັບຕັ້ງແຕ່ກວດພົບຜູ້ຕິດເຊື້ອໂຄວິດ-19 ຄົນທຳອິດໃນ ສປປ.ລາວ ເມື່ອວັນທີ 24 ມີນາທີ່ຜ່ານມາ ຈົນມາຮອດວັນທີ 8 ມິຖຸນາທີ່ຜ່ານມາ ມີຜູ້ຕິດເຊື້ອສະສົມທົ່ວປະເທດທັງໝົດ 19 ຄົນ ແລະ ຫຼ້າສຸດອີງຕາມຂໍ້ມູນຈາກສູນຂ່າວສານການແພດສຸຂະສຶກສາໃຫ້ຮູ້ວ່າ ໃນວັນອັງຄານນີ້ ໄດ້ປິ່ນປົວດີທັງໝົດ 19 ຄົນແລ້ວ, ໂດຍກໍລະນີສຸດທ້າຍທີ່ປິ່ນປົວດີຄື ກໍລະນີທີ 8 ເພດຊາຍ ອາຍຸ 18 ປີ ທີ່ກວດພົບເຊື້ອໃນວັນທີ 28 ມີ 2020 ແລະ ເຂົ້າປິ່ນປົວຢູ່ໂຮງໝໍມິດຕະພາບ.

ເຊິ່ງຈາກຂໍ້ມູນຫຼ້າສຸດໃຫ້ຮູ້ວ່າ ມາເຖິງວັນທີ 9 ມິຖຸນານີ້ ສປປ.ລາວ ໄດ້ມີການກວດກໍລະນີສົງໄສແລ້ວ 8,926 ຄົນ ບໍ່ຕິດເຊື້ອ 8,907 ຄົນ, ຕິດເຊື້ອສະສົມທັງໝົດ​ 19 ຄົນ ແລະ ປິ່ນປົວດີທັງໝົດ 19 ຄົນ.