ສ.ອາເມຣິກາ ຂວ້ຳບາດສານອາຍາສາກົນ ເຫດຜົນບໍ່ພໍໃຈທີ່ຖືກຕັດສິນກ່ຽວຂ້ອງກັບອາຊະຍາກອນສົງຄາມ

ລາຍງານ 13 ມິຖຸນາ 2020, ທ່ານ ໂດໂນ ທຣຳ ປະທານປະເທດ ສ.ອາເມຣິກາ ໃຊ້ອຳນາດພິເສດຂອງຝ່າຍບໍລິຫານ ເມື່ອວັນພະຫັດ 11 ມິຖຸນາ ທີ່ຜ່ານມາ ລົງນາມໃນຄຳສັ່ງວ່າດ້ວຍການຂວ້ຳບາດການເດີນທາງ ແລະ ການອາຍັດຊັບສິນ ແລະ ອະສັງຫາລິມະຊັບຂອງບຸກຄົນໃດກໍ່ຕາມ ທີ່ເປັນເຈົ້າໜ້າທີ່ຂອງສານອາຍາສາກົນ (International Criminal Court ຫຼື ICC) ທີ່ມີສຳນັກງານໃຫຍ່ຢູ່ນະຄອນຫຼວງເຮັກ ປະເທດໂຮນລັງ ທີ່ມີສ່ວນກ່ຽວຂ້ອງກັບການສືບສວນສອບສວນ ຫຼື ຮ້ອງຟ້ອງຄຳເນີນຄະດີເຈົ້າໜ້າທີ່ຂອງລັດຖະບານ ສ.ອາເມຣິກາ ແລະ ພັນທະມິດເຊັ່ນ: ອິດສະຣາແອນ ໃນຂໍ້ຫາອາຊະຍາກອນສົງຄາມໃນອາຟະການິດສະຖານ.

ໃນດ້ານຂອງທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ ເຊິ່ງເປັນຜູ້ເຜີຍແຜ່ຄຳສັ່ງດັ່ງກ່າວຂອງທ່ານ ໂດໂນ ທຣຳ ກ່າວເພີ່ມເຕີມວ່າ ລັດຖະບານ ສ.ອາເມຣິກາບໍ່ສາມາດ ແລະ ບໍ່ມີທທາງທີ່ຈະນິ້ງນອນໃຈຕໍ່ການທີ່ບຸກຄົນຂອງຕົນເອງ ຖືກຄຸກຄຸມຈາກສານເຖື່ອນ, ຂະນະທີ່ທ່ານ ວິນລຽມ ບາ ລັດຖະມົນຕີກະຊວງຍຸຕິທຳຂອງ ສ.ອາເມຣິກາ ກ່າວວ່າຈະມີການສືບສວນສອບສວນກ່ຽວກັບການສໍ້ລາດບັງຫຼວງໃນສານອາຍາສາກົນ ແລະ ການແຊກແຊງຈາກບຸກຄົນທີ່ສາມ ລວມເຖິງລັດເຊຍ ເພື່ອຟື້ນຟູໃຫ້ສານອາຍາສາກົນຫຼຸດພົ້ນຈາກການເປັນເຄື່ອງມືທາງການເມືອງລະຫວ່າງປະເທດ.

ແນ່ນອນວ່າ ອິດສະຣາແອນສະແດງຄວາມຊົມເຊີຍຕໍ່ການເຄື່ອນໄຫວຄັ້ງນີ້ຂອງ ສ.ອາເມຣິກາ, ເນື່ອງຈາກໃນເວລາດຽວກັນນີ້ ສານອາຍາສາກົນ ກໍ່ກຳລັງສືບສວນສອບສວນການທີ່ອິດສະຣາແອນ ເດີນໜ້າຂະຫຍາຍອານາເຂດໃນດິນແດນເວສແບັງ ແລະ ພື້ນທີ່ບາງສ່ວນຂອງນະຄອນເຢຣູຊາເລມດ້ວຍວ່າ ຖືເປັນອາຊະຍາກອນສົງຄາມຫຼືບໍ່, ເຖິງຢ່າງໃດກໍ່ຕາມ ທ່ານ ຄວອນ ໂອ-ກອນ ປະທານສາອາຍາສາກົນ ກ່າວວ່າເລື່ອງແບບນີ້ບໍ່ເຄີຍເກີດຂຶ້ນມາກ່ອນ ແລະ ເຕືອນວ່າຈະເປັນການສັ່ນຄອນສະຖຽນລະພາບ ແລະ ຂະບວນການດຳເນີນການຂອງສານອາຍາສາກົນ.

ເຊິ່ງ ສ.ອາເມຣິກາ ໄດ້ສົ່ງສັນຍານເຕືອນສານອາຍາສາກົນ ຕັ້ງແຕ່ເດືອນກັນຍາ ປີທີ່ຜ່ານມາ ພາຍຫຼັງທີ່ສານອາຍາສາກົນແຫ່ງນີ້ ຕ້ອງການກວດສອບກໍລະນີທີ່ກອງທັບ ສ.ອາເມຣິກາ ແລະ ໜ່ວຍຂ່າວກອງອາຟະການິດສະຖານ ລະເມີດສິດທິມະນຸດຂອງຊະເລີຍສົງຄາມ, ສານອາຍາສາກົນຖືເປັນອົງການຍຸຕິທຳລະຫວ່າງປະເທດຕາມກອບຂອງທຳມະນູນໂຣມ ເປີດດຳເນີນການມາຕັ້ງແຕ່ປີ 2002 ໂດຍໄດ້ຮັບການສະໜັບສະໜູນຈາກພາສະຄວາມໝັ້ນຄົງແຫ່ງສະຫະປະຊາຊາດ ແລະ ມີສະມາຊິກ 123 ປະເທດ.