ຕຳຫຼວດເມືອງແອດແລນຕາ ສ.ອາເມຣິກາ ຍິງຄົນຜິວສີທີ່ຂັດຂືນການຈັບກຸມເສຍຊີວິດ

ລາຍງານ 15 ມິຖຸນາ 2020, ຫ້ອງການພິສູດເຂດຟຸດຕັນ ເຊິ່ງເປັນສະຖານທີ່ຕັ້ງຂອງເມືອງແອດແລນຕາ ເມືອງເອກ ແລະ ເມືອງໃຫຍ່ທີ່ສຸດຂອງລັດຈໍເຈຍ ອອກລາຍງານເມື່ອວັນອາທິດ ທີ່ຜ່ານມາ ກ່ຽວກັບຜົນການພິສູດເບື້ອງຕົ້ນ ສົບຂອງທ້າວເຣຊາດ ບຣູດ ຄົນຜິວສີອາຍຸ 27 ປີ ທີ່ປະເຊີນໜ້າກັບຕຳຫຼວດຜິວຂາວ 2 ຄົນບໍລິເວນເດີ່ນຈອດລົດຂອງຮ້ານອາຫານເວນດີ ແລ້ວຂັດຂືນການຈັບກຸມຂອງເຈົ້າໜ້າທີ່ ເປັນເຫດເຮັດໃຫ້ເຈົ້າໜ້າທີ່ຕັດສິນໃຈສັງຫານ ເມື່ອຄືນວັນສຸກທີ່ຜ່ານມາ ວ່າເປັນຜົນຈາກການຖືກຄາຕະກຳ.

ເຊິ່ງຮ່າງກາຍຂອງທ້າວ ເຣຊາດ ບຣູດ ມີຮອຍບາດແຜຈາກລູກປືນ 2 ນັດຢູ່ຫຼັງ, ສົ່ງຜົນໃຫ້ເກີດການສີກຂາດຂອງກ້າມຊີ້ນ ແລະ ອະໄວຍະວະພາຍໃນຮ່າງກາຍ ຈົນເສຍເລືອດຫຼາຍ ແລະ ເສຍຊີວິດໃນທີ່ສຸດ, ຂະນະທີ່ທ່ານ ນາງ ຄີຊາ ແລນ ບອດທອມ ເຈົ້າເມືອງແອດແລນຕາ ກ່າວວ່າຕຳຫຼວດທັງສອງຄົນກະທຳເກີນກວ່າເຫດ, ໃນດ້ານຂອງທະນາຍຄວາມຄອບຄົວທ້າວ ເຣຊາດ ບຣູດກ່າວວ່າ ການເສຍຊີວິດຂອງທ້າວ ເຣຊາ ບຣູດ ເກີດຂຶ້ນກ່ອນວັນຄົບຄອບວັນຄ້າຍວັນເກີດລູກສາວພຽງວັນດຽວ ແລະ ການໃຊ້ອາວຸດປືນຂອງຕຳຫຼວດທັງສອງຄົນບໍ່ເປັນທຳ ເຖິງແມ່ນວ່າທ້າວ ເຣຊາດ ບຣູດຈະຍາດປືນຊັອດໄຟຟ້າຈາກຕຳຫຼວດ ແລະ ຫັນປາກປືນໄປທາງຕຳຫຼວດກໍ່ຕາມ.

ໃນດ້ານຂອງຫ້ອງການຕຳຫຼວດເມືອງແອດແລນຕາ ພ້ອມມອບເງິນທັນທີ 10,000 ໂດລາສະຫະລັດ ໃຫ້ກັບບຸກຄົນໃດກໍ່ຕາມ ທີ່ສາມາດແຈ້ງເບາະແສຂອງບຸກຄົນທີ່ເຈົ້າໜ້າທີ່ເຊື້ອວ່າກ່ຽວຂ້ອງກັບການວາງເພີງຮ້ານອາຫານເວນດີ ສາຂາທີ່ເປັນສະຖານທີ່ເກີດເຫດລະຫວ່າງການເດີນຂະບວນປະທ້ວງເມື່ອຄືນວັນເສົາ ທີ່ຜ່ານມາ.

ຂະນະທີ່ຫ້ອງການຕຳຫຼວດເມືອງແອດແລນຕາ ໄດ້ເຜີຍແຜ່ວິດີໂອໃໝ່ຈາກກອງວິດີໂອວົງຈອນປິດທີ່ຕິດຢູ່ເຄື່ອງແບບຂອງເຈົ້າໜ້າທີ່ ສະແດງໃຫ້ເຫັນຊ່ວງໄລຍະເວລາທຳອິດຂອງການປະຊເີນໜ້າລະຫວ່າງທ້າວ ເຣຊາດ ບຣູດ ກັບຕຳຫຼວດ ເຊິ່ງຕອນທຳອິດປົກກະຕິ ແລະ ບໍ່ມີຄວາມເຄັ່ງຕຶຶງໃດໆ ໂດຍທ້າວ ເຣຊາດ ບຣູດ ໃຫ້ການຮ່ວມມືກັບເຈົ້າໜ້າທີ່ ລົງຈາກລົດ ແລະ ເປົ່າເຄື່ອງວັດແທກລະດັບທາດເຫຼົ້າ.

ແຕ່ເມື່ອຜົນຈາກເຄື່ອງວັດແທກທາດເຫຼົ້າບໍ່ຜ່ານ ແລະ ເຈົ້າໜ້າທີ່ກຽມໃສ່ກຸນແຈມືເພື່ອຈັບກຸມ ທ້າວ ເຣຊາດ ບຣູດກັບສະບັດມືອອກ ແລ້ວແລ່ນໜີຈຶ່ງເກີດເຫດວຸ້ນວາຍ, ຕໍ່ມາສື່ທ້ອງຖິ່ນຫຼາຍແຫ່ງເຜີຍແຜ່ວິດີໂອເພີ່ມເຕີມ ເປັນຊ່ວງເວລາທີ່ຕຳຫຼວດໄລ່ນຳທ້າວ ເຣຊາດ ບຣູດ ເຊິ່ງມີປືນຊັອດໄຟຟ້າຂອງເຈົ້າໜ້າທີ່ຢູ່ໃນມື ຫຼັງຈາກນັ້ນມີສຽງປືນດັງຂຶ້ນ ແລະ ທ້າວ ເຣຊາດ ບຣູດລົ້ມລົງ.

ສຳລັບຕຳຫຼວດທັງສອງຄົນທີ່ປະເຊີນໜ້າກັບທ້າວ ເຣຊາດ ບຣູດ ນັ້ນ, ຜູ້ທີ່ຍິງແມ່ນຖືກໃຫ້ອອກຈາກວຽກແລ້ວ ສ່ວນອີກຄົນ ທີ່ເປັນຕຳຫຼວດມາກວ່າ 20 ປີ ໄດ້ລາອອກຈາກຕຳແໜ່ງຜູ້ບັນຊາການຫ້ອງການຕຳຫຼວດເມືອງແອດແລນຕາ.