ປັກກິ່ງລະດົມທຸກກຳລັງຮັບມືການລະບາດຂອງໂຄວິດ-19 ຮອບໃໝ່ທີ່ມາຈາກຕະຫຼາດຊິນຟາຕີ້

ລາຍງານ 15 ມິຖຸນາ 2020, ຄະນະກຳມາທິການສາທາລະນະສຸກແຫ່ງ ສປ.ຈີນ ອອກລາຍງານກ່ຽວກັບສະຖານະການການແຜ່ລະບາດຂອງເຊື້ອພະຍາດໂຄວິດ-19 ໃນປະເທດ ວ່າຈຳນວນຜູ້ເສຍຊີວິດສະສົມຍັງເທົ່າເດີມ 4,634 ຄົນ, ຂະນະທີ່ຈຳນວນຜູ້ຕິດເຊື້ອທີ່ຍັງເຫຼືອ 177 ຄົນ ໃນຈຳນວນນີ້ 2 ຄົນມີອາການຮຸນແຮງ.

ເຖິງຢ່າງໃດກໍ່ຕາມ, ໃນວັນດຽວກັນມີການຢືນຢັນຜູ້ຕິດເຊື້ອໃໝ່ 49 ຄົນ ເພີ່ມສະຖິຕິຜູ້ຕິດເຊື້ອໂຄວິດ-19 ສະສົມ ໃນ ສປ.ຈີນ ເປັນ 83,181 ຄົນ, ໂດຍຜົນການຈຳແນກຜູ້ຕິດເຊື້ອລາຍໃໝ່ພົບວ່າ ເປັນຜູ້ທີ່ເດີນທາງມາຈາກຕ່າງປະເທດ 10 ຄົນ, ສ່ວນທີ່ເຫຼືອອີກ 39 ຄົນເປັນການຕິດເຊື້ອພາຍໃນປະເທດ ແບ່ງເປັນ 3 ຄົນໃນມົນທົນເຫີເປີຍ ເຊິ່ງຕັ້ງຢູ່ທາງເໜືອຂອງປະເທດ ແລະ ອີກ 36 ຄົນຢູ່ໃນເຂດນະຄອນຫຼວງປັກກິ່ງ.

ເຊິ່ງນະຄອນຫຼວງປັກກິ່ງທີ່ບໍ່ພົບຜູ້ຕິດເຊື້ອໂຄວິດ-19 ໃນພື້ນທີ່ຕິດຕໍ່ກັນ 56 ວັນ ຈົນມາພົບຜູ້ຕິດເຊື້ອີກຄັ້ງໃນວັນທີ 11 ມິຖຸນາທີ່ຜ່ານມາ ໂດຍມີການຢືນຢັນພົບຜູ້ຕິດເຊື້ອແລ້ວໃນ 6 ເຂດຂອງນະຄອນຫຼວງປັກກິ່ງ ແລະ ຜູ້ຕິດເຊື້ອສ່ວນຫຼາຍຄືຢູ່ເຂດເຟິງໄຖ່ ທີ່ຢູ່ທາງຕາເວັນຕົກສຽງໃຕ້ຂອງນະຄອນຫຼວງປັກກິ່ງ ແລະ ເປັນທີ່ຕັ້ງຂອງຕະຫຼາດຊິນຟາຕີ້ ສູນລວມການຄ້າສົ່ງສິນຄ້າກະສິກຳ ແລະ ອາຫານທະເລຂະໜາດໃຫຍ່ທີ່ສຸດແຫ່ງໜຶ່ງໃນ ສປ.ຈີນ.

ນັບຕັ້ງແຕ່ມີການຢືນຢັນການແຜ່ລະບາດເປັນກຸ່ມກ້ອນທີ່ຕະຫຼາດຊິນຟາຕີ້, ນະຄອນຫຼວງປັກກິ່ງໃຫ້ສັ່ງໃຫ້ປິດຕະຫຼາດດັ່ງກ່າວໂດຍບໍ່ມີກຳນົດ ແລະ ກັກບໍລິເວນຊຸມຊົນຢ່າງໜ້ອຍ 11 ແຫ່ງທີ່ຢູ່ໃກ້ກັບຕະຫຼາດ ພ້ອມທັງປະກາດໃຫ້ປະຊາຊົນທີ່ໄດ້ໄປຕະຫຼາດຊິນຟາຕີ້ຕັ້ງແຕ່ວັນທີ 30 ພຶຶດສະພາ ທີ່ຜ່ານມາ ຕ້ອງເຂົ້າກວດຄັດກອງ ໂດຍທາງການຈະຮັບຜິດຊອບຄ່າໃຊ້ຈ່າຍໃຫ້.

ຂະນະດຽວກັນ, ນະຄອນຫຼວງປັກກິ່ງກຽມໃຊ້ພື້ນທີ່ຂອງໂຮງແຮມ 11 ແຫ່ງໃນເຂດເຟິງໄຖ່ ເຊິ່ງມີຫ້ອງພັກແຫ່ງລະ 1,000 ຫ້ອງໃຫ້ເປັນສະຖານທີ່ກັກບໍລິເວນຊົ່ວຄາວ ແລະ ມີລາຍງານຫຼາຍເຂດໃນນະຄອນຫຼວງປັກກິ່ງຈັດຕັ້ງໜ່ວຍເຄື່ອນທີ່ໄວສະເພາະກິດ ລົງພື້ນທີ່ກວດສຸຂະພາບຂອງປະຊາຊົນໃນເບື້ອງຕົ້ນ ທີ່ລວມເຖິງການວັດແທກອຸນຫະພູມຮ່າງກາຍຕາວຄົວເຮືອນທຸກແຫ່ງ ແລະ ປຸກລະດົມໃຫ້ງົດການຢູ່ຮ່ວມກັນແບບເປັນກຸ່ມໃກ້ຊິດ.

HTML tutorial