ປ.ປູຕິນໃຫ້ຄວາມເຫັນວ່າ ເລື່ອງສີຜິວໃນ ສ.ອາເມຣິກາ ເປັນບັນຫາທີ່ຝັງຮາກເລິກມາຢ່າງຍາວນານ

ລາຍງານ 15 ມິຖຸນາ 2020, ທ່ານ ວະລາດິເມຍ ປູຕິນ ປະທານປະເທດລັດເຊຍ ໃຫ້ສຳພາດໃນລາຍການ “Moscow. Kremlin. Putin”  ອອກອາກາດເມື່ອວັນອາທິດທີ່ຜ່ານມາ ໂດຍໃນຕອນໜຶ່ງຜູ້ນຳລັດເຊຍກ່າວເຖິງສະຖານະການການປະທ້ວງສີຜິວ ທີ່ກຳລັງລຸກຮືຂຶ້ນໃນ ສ.ອາເມຣິກາ ອັນມີຊະນວນເຫດມາຈາການເສຍຊີວິດຂອງທ້າວ ຈອສ ຟລອຍ ຄົນຜິວສີທີ່ເມືອງມິນນິແອໂພລິສ ໃນລັດມິນນິໂຊຕາ ເມື່ອວັນທີ 25 ພຶດສະພາ ທີ່ຜ່ານມາ ວ່າເປັນສິ່ງທີ່ບົ່ງບອກໃຫ້ເຫັນໄດ້ຢ່າງຊັດເຈນ ຂອງໜຶ່ງໃນບັນຫາພາຍໃນຂອງ ສ.ອາເມຣິກາ ທີ່ຝັງຮາກເລິກມາຢ່າງຍາວນານ.

ເຊິ່ງທ່ານ ປູຕິນ ຕີລາຄາວ່າ ບັນຫາດັ່ງກ່າວມີຄວາມຊັດເຈນ ຕັ້ງແຕ່ທ່ານ ໂດໂນ ທຣຳ ເຂົ້າຮັບຕຳແໜ່ງຜູ້ນຳ ສ.ອາເມຣິກາ ເມື່ອເດືອນມັງກອນ 2017 ຜູ້ນຳລັດເຊຍກ່າວວ່າ ໄຊຊະນະຂອງທ່ານ ໂດໂນ ທຣຳ ນັ້ນມີຄວາມຊັດເຈນ ແລະ ເປັນປະຊາທິປະໄຕ ພັກທີ່ເປັນຝ່າຍປະລາໄຊຈຶ່ງປະດິດແຕ່ງບັນຫາທຸກຮູບແບບ ເພື່ອໃຫ້ຄວາມຊອບທຳຂອງຜູ້ນຳ ສ.ອາເມຣິກາຄົນປັດຈຸບັນ ເປັນສິ່ງທີ່ໜ້າສົງໄສ.

ທ່ານ ປູຕິນ ກ່າວຕໍ່ໄປອີກວ່າ ເຫດຈະລາຈົນຈາກຄວາມຂັດແຍ່ງເລື່ອງສີຜິວໃນ ສ.ອາເມຣິກາ ແລະ ເອີຣົບ ຄືປາກົດການທຳລາຍລ້າງ, ລັດເຊຍເຊິ່ງເຫັນຕົວຢ່າງຈາກສະຖານະການໃນອີກຊີກໂລກໜຶ່ງແລ້ວ ຈຶ່ງຄວນຮັກສາຄວາມສົມດຸນຂອງຄວາມຫຼາກລາຍທາງວັດທະນະທຳເອົາໄວ, ພົນລະເມືອງລັດເຊຍປະກອບດ້ວຍກຸ່ມຊົນຊາດຊົນເຜົ່າທີ່ຫຼາກຫຼາຍ ແລະ ສາມາດຢູ່ຮ່ວມກັນໄດ້.

ຜູ້ນຳລັດເຊຍກ່າວອີກວ່າ ການປົກປ້ອງສິດທິ ແລະ ຄວາມເທົ່າທຽມທາງກົດໝາຍ ໂດຍມີອົງປະກອບຂອງແນວຄິດຊາດນິຍົມຫົວຮຸນແຮງ ແລະ ຊ້າຍຈັດຂວາໂພດ ຈົນບານປາຍເປັນການກໍ່ຄວາມວຸ້ນວາຍ ແລະ ການປຸ້ນສະດົມນັ້ນ ບໍ່ແມ່ນສິ່ງທີ່ດີ, ເຖິງຢ່າງໃດກໍ່ຕາມ ລັດເຊຍມີຄວາມເຂົ້າໃຈ ແລະ ເຫັນໃຈຕໍ່ການຕໍ່ສູ້ຂອງຄົນອາເມຣິກາເຊື້ອສາຍອາຟຣິກາ ໃນການຮຽກຮ້ອງຄວາມເທົ່າທຽມໃນກັບຕົນເອງ ແລະ ເຊື້ອໝັ້ນວ່າໃນທີ່ສຸດພື້ນຖານໂຄງສ້າງທາງປະຊາທິປະໄຕຂອງ ສ.ອາເມຣິກາ ຈະຊ່ວຍໃຫ້ທຸກພາກສ່ວນໃນປະເທດສາມາດຜ່ານພົ້ນວິກິດທາງສັງຄົມຄັ້ງນີ້ໄປໄດ້ ເພາະບໍ່ວ່າແນວໃດກໍ່ຕາມ ສ.ອາເມຣິກາ ກໍ່ຍັງເປັນມະຫາອຳນາດດ້ານປະຊາທິປະໄຕທີ່ເຂັ້ມແຂງຫຼາຍ.