ທະຫານຈີນ ແລະ ທະຫານອິນເດຍ ປະທະກັນໃນພື້ນທີ່ຄວາມຂັດແຍ່ງເທິງສາຍພູຫິມາໄລ

ລາຍງານ 16 ມິຖຸນາ 2020, ກອງທັບອິນເດຍອອກຖະແຫຼງການວ່າ ເຈົ້າໜ້າທີ່ຂອງອິນເດຍ ແລະ ຈີນປະທະກັນຢ່າງຮຸນແງ ເມື່ອຄືນວັນຈັນທີ່ຜ່ານມາ ຢູ່ບໍລິເວນບ້ານກັນວານ ທາງຕາເວັນອອກຂອງເຂດລາດັກ ເທິງສາຍພູຫິມາໄລ ຫຼື ເຂດອັກໄສຊິນ ທາງຕາເວັນຕົກສຽງໃຕ້ຂອງຈີນ ເຊິ່ງບໍລິເວນດັ່ງກ່າວເປັນໜຶ່ງໃນເຂດຄວາມຂັດແຍ່ງລະຫວ່າງທັງສອງປະເທດ.

ເຊິ່ງລາຍງານຂອງອິນເດຍລະບຸວ່າ ມີການສູນເສຍຊີວິດເກີດຂຶ້ນທັງສອງຝ່າຍ ໂດຍທະຫານອິນເດຍເສຍຊີວິດ 3 ຄົນ, ຂະນະທີ່ລັດຖະບານຈີນຍັງບໍ່ເປີເຜີຍຂໍ້ມູນຂອງຝ່າຍຕົນກ່ຽວກັບເຫດການດັ່ງກ່າວ ໂດຍທ່ານ ຈ້າວ ລີຈ້ຽນ ໂຄສົກກະຊວງການຕ່າງປະເທດຈີນກ່າວວ່າ ທະຫານອິນເດຍເປັນຝ່າຍລະເມີດເຂດແດນໃນວັນເກີດເຫດ ແລະ ທຳຮ້າຍເຈົ້າໜ້າທີ່ຂອງຈີນກ່ອນ ສົ່ງຜົນໃຫ້ສະຖານະການບານປາຍເປັນການປະທະກັນທາງຮ່າງກາຍຢ່າງຮຸນແຮງ ພ້ອມທັງຮຽກຮ້ອງອິນເດຍຢ່າກວນນ້ຳໃຫ້ຂຸ່ນ.

ເຫດການດັ່ງກ່າວເກີດຂຶ້ນທ່າມກາງບັນຍາກາດຄວາມເຄັ່ງຕຶງເລື່ອງຊາຍແດນລະຫວ່າງທັງສອງປະເທດ ທີ່ເຄີຍເຮັດສົງຄາມຍາດແຍ່ງກັນມາແລ້ວຄັ້ງໜຶ່ງໃນປີ 1962 ແລະ ຫຼັງຈາກນັ້ນຍັງບໍ່ສາມາດຕົກລົງກັນໄດ້ ແລະ ເມື່ອບໍ່ດົນມານີ້ ອິນເດຍກ່າວຫາຈີນ ວ່າເສີມກຳລັງທະຫານຫຼາຍພັນຄົນໃນພື້ນທີ່ບໍລິເວນດັ່ງກ່າວ ເພື່ອຍຶດຄອງອານາເຂດ 38,000 ຕາລາງກິໂລແມັດໃນເຂດລາດັກ ແລະ ມີການປະທະກັນເປັນໄລຍະໆຫຼາຍຄັ້ງໃນຊ່ວງບໍ່ພໍເທົ່າໃດເດືອນຜ່ານມາ.