ເກົາຫຼີເໜືອລະເບີດສູນປະສານງານຮ່ວມສອງເກົາຫຼີ ທີ່ນິຄົມອຸດສາຫະກຳແກຊອງ

ລາຍງານ 16 ມິຖຸນາ 2020, ກະຊວງລວມຊາດຂອງເກົາຫຼີໃຕ້ເຜີຍແຜ່ຖະແຫຼງການດ່ວນ ມີເນື້ອໃນພຽງວ່າ ເກົາຫຼີເໜືອລະເບີດສູນປະສານງານຮ່ວມສອງເກົາຫຼີ ທີ່ເປີດດຳເນີນການມາຕັ້ງແຕ່ກາງເດືອນກັນຍາ 2018 ຕັ້ງຢູ່ພາຍໃນນິຄົມອຸດສາຫະກຳແກຊອງ ເມື່ອເວລາປະມານ 14:49 ໂມງ ຕາມເວລາທ້ອງຖິ່ນ (12:49 ໂມງເວລາໃນປະເທດລາວ).

ການເຄື່ອນໄຫວດັ່ງກ່າວເກີດຂຶ້ນທ່າມກາງຄວາມເຄັ່ງຕຶງຄັ້ງໃໝ່ລະຫວ່າງສອງເກົາຫຼີ ຈາກບັນຫາການສົ່ງບານລູນບັນຈຸໃບປິວໂຄສະນາຕໍ່ຕ້ານລັດຖະບານເກົາຫຼີເໜືອ ໂດຍກຸ່ມນັກເຄື່ອນໄຫວຊາວເກົາຫຼີເໜືອໃນເກົາຫຼີໃຕ້ ໃຫ້ລອຍຂ້າມຊາຍແດນໄປຍັງເກົາຫຼີເໜືອ ເຖິງແມ່ນວ່າມີການເປັນໄລຍະຫຼາຍປີແລ້ວ ແຕ່ເກົາຫຼີເໜືອໄດ້ສະແດງຄວາມບໍ່ພໍໃຈອອກມາຢ່າງຊັດເຈນເມື່ອຕົ້ນເດືອນນີ້.

ເຊິ່ງກ່ອນໜ້ານີ້ທ່ານ ນາງ ຄິມ ໂຢ-ຈອງ ນ້ອງສາວຂອງທ່ານ ຄິມ ຈອງ-ອິນ ຜູ້ນຳສູງສຸດຂອງເກົາຫຼີເໜືອ ໄດ້ກ່າວເຕືອນວ່າ ຫາກການສົ່ງໃບປິວຍັງເກີດຂຶ້ນອີກ ເກົາຫຼີໃຕ້ຕ້ອງຍ້າຍອອກເປັນການຖາວອນຈາກສູນປະສານງານຮ່ວມສອງເກົາຫຼີ ພ້ອມກ່າວວ່າ ສູນປະສານງານດັ່ງກ່າວມີແຕ່ສ້າງບັນຫາ.

ນອກຈາກນີ້, ທ່ານ ນາງ ຄິມ ໂຢ-ຈອງ ຍັງກ່າວເຖິງຂໍ້ຕົກລົງທາງທະຫານທີ່ຜູ້ເປັນອ້າຍລົງນາມຮ່ວມກັບທ່ານ ມູນ ແຈ-ອິນ ປະທານປະເທດເກົາຫຼີໃຕ້ ທີ່ນະຄອນຫຼວງປຽງຢາງ ເມື່ອເດືອນກັນຍາ 2018 ເພື່ອຫຼຸດຜ່ອນຄວາມເຄັ່ງຕຶງທາງທະຫານຂອງສອງຝ່າຍ ແມ່ນບໍ່ມີປະໂຫຍດອີກຕໍ່ໄປ.

ຕໍ່ມາທຳນຽມປະທານປະເທດເກົາຫຼີໃຕ້ ອອກຖະແຫຼງການວ່າ ນັ້ນເປັນການທຳລາຍຄວາມຫວັງຂອງທຸກພາກສ່ວນທີ່ກ່ຽວຂ້ອງ ໃນການຟື້ນຟູສາຍພົວພັນສອງຝ່າຍ ແລະ ການສ້າງສັນຕິພາບຢ່າງຍືນຍົງຢູ່ແຫຼມເກົາຫຼີ.

ເນື້ອໃນຂອງຖະແຫຼງການຍັງລະບຸອີກວ່າ ສິ່ງທີ່ເກີດຂຶ້ນກັບສູນປະສານການຮ່ວມສອງເກົາຫຼີໃນຄັ້ງນີ້ ລັດຖະບານເກົາຫຼີເໜືອຕ້ອງຮັບຜິດຊອບແຕ່ພຽງຝ່າຍດຽວ ຫາກໃນອະນາຄົດເກົາຫຼີເໜືອດຳເນີນການໃດກໍ່ຕາມທີ່ຍິ່ງເພີ່ມຄວາມເຄັ່ງຕຶງໃຫ້ກັບບັນຍາກາດຢູ່ແຫຼມເກົາຫຼີອີກ ລັດຖະບານເກົາຫຼີໃຕ້ຈະບໍ່ປ່ອຍປະຈະຕອບໂຕ້ຢ່າງເຖິງທີ່ສຸດ.

ນອກຈາກນີ້, ກະຊວງລວມຊາດຂອງເກົາຫຼີໃຕ້ ຍັງໄດ້ອອກຖະແຫຼງການເພີ່ມເຕີມວ່າ ເປັນການກະທຳທີ່ຂາດສະຕິ ແລະ ເປັນການເຄື່ອນໄຫວທີ່ບໍ່ເຄີຍເກີດຂຶ້ນມາກ່ອນໃນປະຫວັດສາດສາຍພົວພັນສອງເກົາຫຼີ ພ້ອມທັງເຕືອນວ່າເກົາຫຼີເໜືອເປັນຝ່າຍລະເມີດຂໍ້ຕົກລົງທັງໝົດທີ່ລົງນາມຮ່ວມກັນເມື່ອປີ 2018 ຈຶ່ງຕ້ອງເປັນຝ່າຍຮັບຜິດຊອບຕໍ່ສິ່ງທີ່ເກີດຂຶ້ນແຕ່ພຽງຝ່າຍດຽວ.

ຂະນະທີ່ເກົາຫຼີເໜືອຍັງບໍ່ສະແດງຈຸດຢືນຢ່າງເປັນທາງການ ນອກຈາກລາຍງານຂອງສຳນັກຂ່າວກາງເກົາຫຼີ (KCNA) ທີ່ລະບຸວ່າ ສູນປະສານງານຮ່ວມສອງເກົາຫຼີໃນນິຄົມແກຊອງຖືກທຳລາຍແຫຼກເປັນຜົງ.