ທະຫານອິນເດຍເສຍຊີວິດ 20 ຄົນ ປະທະກັບທະຫານຈີນເທິງສາຍພູຫິມາໄລ ເຂດຂັດແຍ່ງດິນແດນ

ລາຍງານ 17 ມິຖຸນາ 2020, ຈາກເຫດການປະທະກັນຢ່າງຮຸນແຮງລະຫວ່າງທະຫານອິນເດຍ ກັບ ທະຫານຈີນ ເມື່ອຄືນວັນຈັນທີ່ຜ່ານມາ ບໍລິເວນບ້ານກັນວານ ທາງຕາເວັນອອກຂອງເຂດລາດັກ ເທິງສາຍພູຫິມາໄລ ຫຼື ເຂດອັກໄສຊິນ ທາງຕາເວັນຕົກສຽງໃຕ້ຂອງຈີນ ເຊິ່ງບໍລິເວນດັ່ງກ່າວເປັນໜຶ່ງໃນເຂດຄວາມຂັດແຍ່ງທາງຊາຍແດນລະຫວ່າງສອງປະເທດ.

ໃນເບື້ອງຕົ້ນກອງທັບອິນເດຍລາຍງານວ່າມີທະຫານອິນເດຍເສຍຊີວິດ 3 ຄົນ ໜຶ່ງໃນນັ້ນມີຍົດລະດັບນາຍພັນ ແຕ່ອີກບໍ່ພໍເທົ່າໃດຊົ່ວໂມງຕໍ່ມາ ໄດ້ປັບເພີ່ມຈຳນວນທະຫານທີ່ເສຍຊີວິດເປັນ 20 ຄົນ ແລະ ອີກ 17 ຄົນໄດ້ຮັບບາດເຈັບຮຸນແຮງລະຫວ່າງປະຕິບັດໜ້າທີ່ ໂດຍລະບຸວ່າສະພາບແວດລ້ອມໃນບໍລິເວນເກີດເຫດ ມີຂໍ້ຈຳກັດດ້ານອຸນຫະພູມທີ່ຕ່ຳກວ່າຈຸດແຂງກ້າມ ແລະ ລັກສະນະພູມສັນຖານທີ່ສູງຊັນ ເປັນປັດໄຈສົ່ງຜົນໃຫ້ເກີດອາກາດບາດເຈັບເພີ່ມອີກ ແຕ່ບໍ່ມີການໃຫ້ຂໍ້ມູນເພີ່ມເຕີມວ່າອາການບາດເຈັບຂອງທະຫານແຕ່ລະຄົນຮຸນແຮງເຖິງຂັ້ນໃດ.

ຂະນະທີ່ແຫຼ່ງຂ່າວໃນລັດຖະບານອິນເດຍກ່າວວ່າ ທະຫານຂອງທັງສອງຝ່າຍຖອນກຳລັງອອກຈາກພື້ນທີ່ເກີດເຫດແລ້ວ ສ່ວນອາວຸດທີ່ທະຫານຈີນ ແລະ ອິນເດຍໃຊ້ຕໍ່ສູ້ກັນມີທັງກ້ອນຫິນຂະໜາດໃຫຍ່ ແລະ ເຫຼັກເສັ້ນ ເຫດການດັ່ງກ່າວເກີດຂຶ້ນໃນໄລຍະທີ່ທະຫານລະດັບເສນາທິການຂອງທັງສອງປະເທດນັດພົບປະຫາລືກັນເປັນໄລຍະໆ ເພື່ອຜ່ອນຄາຍຂໍ້ຂັດຍແຍ່ງເລື່ອງຊາຍແດນ ແຕ່ທະຫານຈີນກຸ່ມໜຶ່ງໃນບໍລິເວນນັ້ນເລີ່ມຕົ້ນກ່ອນ.

ເຊິ່ງເຫດການເມື່ອວັນທີ 15 ມິຖຸນາ ທີ່ຜ່ານມາ ຖືວ່າມີຄວາມຮຸນແຮງທີ່ສຸດນັບຕັ້ງແຕ່ຈີນກັບອິນເດຍເຮັດສົງຄາມຄັ້ງໃຫຍ່ ເມື່ອປີ 1962, ທ່ານ ອະນຸຣັກ ສຣີຕາວະ ໂຄສົກກະຊວງການຕ່າງປະເທດອິນເດຍ ກ່າວວ່າຫາກລັດຖະບານຈີນປະຕິບັດຕາມຂໍ້ຕົກລົງຢ່າງເຄັ່ງຄັດ ເລື່ອງແບບນີ້ຈະບໍ່ເກີດຂຶ້ນ.

ໃນດ້ານຂອງທ່ານ ຈ້າວ ລີຈ້ຽນ ໂຄສົກກະຊວງການຕ່າງປະເທດຈີນ ກ່າວວ່າທະຫານອິນເດຍເປັນຝ່າຍລະເມີດເສັ້ນແບ່ງເຂດແດນທີ່ບ້ານກັນວານ ແລະ ສະແດງທ່າທີຍຸແຍ່ໃສ່ເຈົ້າໜ້າທີ່ຂອງຈີນກ່ອນ ເຖິງແມ່ນລັດຖະບານຈີນຍັງບໍ່ຍອມໃຫ້ຂໍ້ມູນກ່ຽວກັບການສູນເສຍທີ່ກີດຂຶ້ນກັບທະຫານຈີນ ແຕ່ອິນເດຍຢືນຢັນວ່າ ມີຄືກັນ.

ຕໍ່ມາທ່ານ ຈ້າວ ລີຈ້ຽນ ໄດ້ຖະແຫຼງເພີ່ມເຕີມວ່າ ມີການສູນເສຍເກີດຂຶ້ນກັບທະຫານຈີນຈຳນວນໜຶ່ງ, ພ້ອມທັງກ່າວປົກປ້ອງທະຫານຈີນວ່າ ບໍ່ສົມຄວນຕົກເປັນຈຳເລີຍ ເພາະທະຫານອິນເດຍເປັນຝ່າຍລະເມີດເສັ້ນແບ່ງເຂດແດນກ່ອນ ເຊິ່ງລັດຖະບານຈີນໄດ້ດຳເນີນການຮຽກຮ້ອງຕາມແນວທາງການທູດລະຫວ່າງປະເທດແລ້ວ, ລັດຖະບານຈີນບໍ່ຕ້ອງການໃຫ້ເກີດເຫດການແບບນີ້ຊ້ຳຮອຍອີກ ແລະ ເຫັນດີໃນຫຼັກການກັບລັດຖະບານອິນເດຍແລ້ວ ໃນການເດີນໜ້າຮ່ວມກັນຜ່ອນຄາຍຄວາມຂັດແຍ່ງແບບສັນຕິວິທີ ພ້ອມລະບຸວ່າ ເຫດການສະຫງົບແລ້ວ ເນື່ອງຈາກທະຫານຂອງທັງຈີນ ແລະ ອິນເດຍຖອນກຳລັງອອກຈາກພື້ນທີ່ທັງໝົດແລ້ວ, ເຖິງຢ່າງໃດກໍ່ຕາມ ທ່ານ ຈ້າວ ລີຈ້ຽນຍັງບໍ່ເປີດເຜີຍຂໍ້ມູນລະອຽດກ່ຽວກັບການສູນເສຍຂອງຝ່າຍຕົນ ຈາກເຫດການຄັ້ງນີ້,

.