ເກົາຫຼີໃຕ້ຕິຕຽນນ້ອງຜູ້ນຳເກົາຫຼີເໜືອ ວ່າບໍ່ມີມາລະຍາດ ພາຍຫຼັງຖືກປະຕິເສດເຈລະຈາການທູດ

ລາຍງານ 17 ມິຖຸນາ 2020, ທ່ານ ຢຸນ ໂດ-ຮານ ໂຄສົກທຳນຽບປະທານປະເທດເກົາຫຼີໃຕ້ ຖະແຫຼງພາຍຫຼັງສຳນັກຂ່າວກາງເກົາຫຼີ (KCNA) ລາຍງານວ່າ: ທ່ານ ນາງ ຄິມ ໂຢ-ຈອງ ນ້ອງສາວຂອງທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ ປະຕິເສດຂໍ້ສະເໜີຂອງທ່ານ ມູນ ແຈ-ອິນ ປະທານປະເທດເກົາຫຼີໃຕ້ ໃນການສົ່ງຄະນະຜູ້ແທນພິເສດຢ້ຽມຢາມນະຄອນຫຼວງປຽງຢາງ ເພື່ອຫຼຸດຜ່ອນບັນຍາກາດຄວາມເຄັ່ງຕຶງ ວ່າ: ທ່ານ ນາງ ຄິມ ໂຢ-ຈອງ ວິຈານຜູ້ນຳເກົາຫຼີໃຕ້ດ້ວຍຄວາມບໍ່ສຸພາບ ແລະ ບໍ່ມີມາລະຍາດ.

ທ່ານ ຢຸນ ໂດ-ຮານ ກ່າວວ່າເປັນສິ່ງທີ່ບໍ່ເໝາະສົມຢ່າງຍິ່ງ ທີ່ເປັນແມ່ຍິງແຕ່ສະແດງຄວາມຄິດເຫັນແຂງກະດ້າງຕໍ່ການຍື່ນຂໍ້ສະເໜີຂອງຜູ້ນຳເກົາຫຼີໃຕ້ ໂດຍບໍ່ເຂົ້າໃຈເຖິງເນື້ອໃນທີ່ແທ້ຈິງ, ລັດຖະບານເກົາຫຼີໃຕ້ຈະບໍ່ປ່ອຍປະຕໍ່ກິລິຍາແບບນີ້ຂອງເຈົ້າໜ້າທີ່ລະດັບສູງໃນລັດຖະບານອີກຕໍ່ໄປ ເຊິ່ງສົ່ງຜົນກະທົບເປັນຢ່າງຍິ່ງຕໍ່ຄວາມເຊື່ອໝັ້ນລະດັບຜູ້ນຳຂອງທັງສອງປະເທດ ພ້ອມທັງກ່າວປິດທ້າຍວ່າ ເກົາຫຼີໃຕ້ຫວັງເປັນຢ່າງຍິ່ງວ່າຕໍ່ໄປເກົາຫຼີເໜືອຈະມີມາລະຍາດພື້ນຖານທາງການທູດ.

ເຊິ່ງທ່ານ ມູນ ແຈ-ອິນ ຕ້ອງການສົ່ງທ່ານ ຈອງ ອວີ-ຢອງ ທີ່ປຶກສາດ້ານຄວາມໝັ້ນຄົງແຫ່ງຊາດ ແລະ ທ່ານ ຊູ ຮຸນ ຜູ້ອຳນວຍການສຳນັກຂ່າວກອງແຫ່ງຊາດ ເດີນທາງຢ້ຽມຢາມນະຄອນຫຼວງປຽງຢາງອີກຄັ້ງ ຫຼັງຈາກທີ່ທັງສອງເຄີຍຢ້ຽມຢາມເກົາຫຼີເໜືອແລ້ວເທື່ອໜຶ່ງ ເມື່ອເດືອນມີນາ 2018.

ໂດຍຈຸດປະສົງໃນການສົ່ງຜູ້ແທນພິເສດຢ້ຽມຢາມນະຄອນຫຼວງປຽງຢາງຄັ້ງນີ້ ກໍ່ເພື່ອຜ່ອນຄາຍຄວາມຂັດແຍ່ງກັບລັດຖະບານເກົາຫຼີເໜືອ ໃນບັນຫາການປ່ອຍໝາກປຸ້ງເປົ້າລອຍຫອຍໃບປິວໂຄສະນາຕໍ່ຕ້ານເກົາຫຼີເໜືອ ທີ່ກະທຳໂດຍກຸ່ມນັກເຄື່ອນໄຫວໃນເກົາຫຼີໃຕ້ ເພື່ອສົ່ງໃບປິວດັ່ງກ່າວຂ້າມໄປຍັງເກົາຫຼີເໜືອເປັນໄລຍະໆ ບວກກັບຖະແຫຼງການຂອງທ່ານ ນາງ ຄິມ ໂຢ-ຈອງ ທີ່ອອກມາເມື່ອຕົ້ນເດືອນນີ້ວ່າ ຈະໃຊ້ມາດຕະການທາງທະຫານ ແລະ ເກົາຫຼີເໜືອໄດ້ລະເບີດສູນປະສານງານຮ່ວມສອງເກົາຫຼີ ທີ່ຕັ້ງຢູ່ພາຍໃນນິຄົມອຸດສາຫະກຳແກຊອງ ເມື່ອວັນອັງຄານ ທີ່ຜ່ານມາ.

HTML tutorial