ກອງທັບເກົາຫຼີໃຕ້ຖະແຫຼງ ທຸກເຫຼົ່າທັບຢູ່ໃນທ່າກຽມພ້ອມຂັ້ນສູງສຸດ, ຂະນະທີ່ລັດຖະມົນຕີລວມຊາດລາອອກ

ລາຍງານ 17 ມິຖຸນາ 2020, ກອງທັບເກົາຫຼີໃຕ້ອອກຖະແຫຼງການວ່າ ທຸກເຫຼົ່າທັບພ້ອມຂັ້ນສູງສຸດໃນການປົກປ້ອງອະທິປະໄຕຂອງປະເທດ ຫາກກອງທັບປະຊາຊົນເກົາຫຼີ (ເກົາຫຼີເໜືອ) ເປັນຝ່າຍໂຈມຕີດ້ວຍອາວຸດກ່ອນ, ໃນດ້ານຂອງທ່ານ ຢຸນ ໂດ-ຮານ ໂຄສົກປະຈຳທຳນຽບປະທານປະເທດເກົາຫຼີໃຕ້ ກ່າວວ່າໃນອະນາຄົດຫວັງວ່າລັດຖະບານເກົາຫຼີເໜືອຈະຮູ້ຈັກມາລະຍາດທາງການທູດຂັ້ນພື້ນຖານ ຕອບໂຕ້ການທີ່ທ່ານ ນາງ ຄິມ ໂຢ-ຈອງ ນ້ອງສາວຂອງທ່ານ ຄິມ ຈອງ-ອຶນ ຜູ້ນຳສູງສຸດເກົາຫຼີເໜືອ ທີ່ປະຕິເສດຂໍ້ສະເໜີຂອງທ່ານ ມູນ ແຈ-ອິນ ປະທານປະເທດເກົາຫຼີໃຕ້.

ໃນອີກດ້ານໜຶ່ງທ່ານ ຄິມ ຢອນ-ຊອນ ລັດຖະມົນຕີກະຊວງລວມຊາດຂອງເກົາຫຼີໃຕ້ ໄດ້ຍື່ນໃບລາອອກຕໍ່ທ່ານ ມູນ ແຈ-ອິນ ໂດຍໃຫ້ເຫດຜົນວ່າ ບໍ່ສາມາດຕອບສະໜອງຕໍ່ຄວາມຄາດຫວັງຂອງທຸກຝ່າຍໄດ້ດີພໍ ໃນການຮັກສາສະຖຽນລະພາບຂອງຄວາມໝັ້ນຄົງລະຫວ່າງເກົາຫຼີໃຕ້ ກັບ ເກົາຫຼີເໜືອ ເພື່ອສັນຕິພາບ ແລະ ຄວາມຈະເລີນຮຸ່ງເຮືອງໃນໄລຍະຍາວ, ເຊິ່ງຄວາມເຄັ່ງຕຶງໃນແຫຼມເກົາຫຼີຄັ້ງນີ້ ມາຈາກບັນຫາທີ່ກຸ່ມນັກເຄື່ອນໄຫວໃນເກົາຫຼີໃຕ້ ສົ່ງໃບປິວໂຄສະນາຕໍ່ຕ້ານເກົາຫຼີເໜືອ ດ້ວຍວິທີຫ້ອຍໃສ່ປຸ້ງເປົ້າລອຍຂ້າມໄປຍັງເກົາຫຼີເໜືອເປັນໄລຍະໆ ອັນໄດ້ສ້າງຄວາມບໍ່ພໍໃຈໃຫ້ກັບລັດຖະບານເກົາຫຼີເໜືອ ທີ່ລັດຖະບານເກົາຫຼີໃຕ້ປ່ອຍປະໃຫ້ເກີດຂຶ້ນໂດຍບໍ່ແກ້ໄຂ.

ເຖິງຢ່າງໃດກໍ່ຕາມ, ຍັງບໍ່ຈະແຈ້ງວ່າຜູ້ນຳເກົາຫຼີໃຕ້ຈະອະນຸມັດການລາອອກຂອງທ່ານ ຄິມ ຢອນ-ຊອນ ທີ່ຮັບຕຳແໜ່ງມາແຕ່ເດືອນເມສາ ປີທີ່ຜ່ານຫຼືບໍ່ ໂດຍການຕັດສິນຂອງຂອງທ່ານ ຄິມ ຢອນ-ຊອນ ເຊິ່ງເປັນນັກວິຊາການດ້ານລັດຖະສາດ ແລະ ເຄີຍດຳລົງຕຳແໜ່ງປະທານວຽກງານສາຍພົວພັນລະຫວ່າງປະເທດ ສັງກັດສະຖາບັນວິໄຈຂອງລັດຖະບານ ເກີດຂຶ້ນພາຍຫຼັງທີ່ເກົາຫຼີເໜືອລະເບີດສູນປະສານງານຮ່ວມສອງເກົາຫຼີ ທີ່ນິຄົມອຸດສາຫະກຳແກຊອງ ໂດຍສຳນັກງານດັ່ງກ່າວເປີດໃຊ້ເມື່ອເດືອນກັນຍາ 2018 ຫຼື ປະມານ 1 ເດືອນຫຼັງຈາກທີ່ຜູ້ນຳເກົາຫຼີໃຕ້ຢ້ຽມຢາມນະຄອນຫຼວງປຽງຢາງຢ່າງເປັນທາງການ.

ນອກຈາກນີ້, ເກົາຫຼີເໜືອຍັງປະຕິເສດຂໍ້ສະເໜີຂອງຜູ້ນຳເກົາຫຼີໃຕ້ ທີ່ຕ້ອງການສົ່ງຜູ້ແທນພິເສດ 2 ທ່ານເດີນທາງຢ້ຽມຢາມນະຄອນຫຼວງປຽງຢາງ ເພື່ອພົບປະຫາລືກັບລັດຖະບານເກົາຫຼີເໜືອໃນການຫຼຸດຜ່ອນບັນຍາກາດຄວາມເຄັ່ງຕຶງ ແລະ ກອງທັບປະຊາຊົນເກົາຫຼີເໜືອຍັງໄດ້ປະກາດວ່າ ຈະເຄື່ອນກຳລັງພົນເຂົ້າປະຈຳການໃນເຂດປອດອາວຸດ ຕາມຂໍ້ຕົກລົງເມື່ອ 2 ປີທີ່ຜ່ານມາ ທີ່ສອງເກົາຫຼີລົງນາມຮ່ວມກັນ.