ປ.ທຣຳ ຕໍ່ເວລາຂວໍ້າບາດເກົາຫຼີເໜືອ ພ້ອມມີລາຍງານຍົນສອດແນມ ສ.ອາເມຣິກາບິນຢູ່ແຫຼມເກົາຫຼີ

ລາຍງານ 18 ມິຖຸນາ 2020, ທ່ານ ໂດໂນ ທຣຳ ປະທານປະເທດ ສ.ອາເມຣິກາ ຍື່ນໜັງສືຕໍ່ຫ້ອງການເລຂາທິການລັດຖະສະພາ ເມື່ອວັນພຸດທີ່ຜ່ານມາ ເພື່ອແຈ້ງໃຫ້ຊາບວ່າທຳນຽບຂາວຂະຫຍາຍເວລາມາດຕະການຂວໍ້າບາດຕໍ່ເກົາຫຼີເໜືອອອກໄປອີກ 1 ປີ ໂດຍໃຫ້ເຫດຜົນກ່ຽວກັບທ່າທີ ແລະ ຄຳຂົ່ມຂູ່ທີ່ຜິດປົກກະຕິຂອງອີກຝ່າຍ.

ການໃຊ້ອຳນາດດັ່ງກ່າວຂອງຜູ້ນຳ ສ.ອາເມຣິກາ ຄືການຂະຫຍາຍເວລາຂອງຄຳສັ່ງຝ່າຍບໍລິຫານເລກທີ 13466 ປະກາດຄັ້ງທຳອິດ ເມື່ອວັນທີ 26 ມິຖຸນາ 2008 ໃນສະໄໝຂອງທ່ານປະທານປະເທດ ຈອສ ດັບເບີຢູ ບຸສ ແລະ ຜູ້ນຳ ສ.ອາເມຣິກາທຸກຄົນຖັດຈາກນັ້ນໄດ້ລົງນາມຕໍ່ເວລາຄຳສັ່ງນີ້ຕະຫຼອດມາ ເຖິງແມ່ນວ່າຫຼາຍຄັ້ງຈະເປັນການລົງນາມຕາມທຳນຽມ ເນື່ອງຈາກເປັນຄຳສັ່ງທີ່ຕ້ອງມີການພິຈາລະນາຕໍ່ອາຍຸປີລະ 1 ຄັ້ງ ຖ້າບໍ່ດັ່ງນັ້ນຖືວ່າຍົກເລີກໂດຍອັດຕະໂນມັດ ແຕ່ການລົງນາມໃນຮອບນີ້ແມ່ນພໍເໝາະກັບທີ່ສະຖານະການຢູ່ແຫຼມເກົາຫຼີກຳລັງປົກຄຸມໄປດ້ວຍບັນຍາກາດຄວາມເຄັ່ງຕຶງຄັ້ງໃໝ່.

ເຊິ່ງສຳນັກຂ່າວ Yonhap ຂອງເກົາຫຼີໃຕ້ລາຍງານວ່າ ຍົນ RC-135 ຂອງກອງທັບອາກາດ ສ.ອາເມຣິກາ ບິນລາດຕະເວນຢູ່ແຫຼມເກົາຫຼີເມື່ອບໍ່ດົນມານີ້, ເຊັ່ນດຽວກັບຍົນສອດແນມ EP-3E ຂອງກອງທັບເຮືອ ສ.ອາເມຣິກາ ໂດຍໄລຍະເວລາການປາກົດຕົວຂອງຍົນທັງສອງລຳຍັງບໍ່ເປັນທີ່ຊັດເຈນ.

ໂດຍເມື່ອວັນທີ 16 ມິຖຸນາທີ່ຜ່ານມາ ເກົາຫຼີເໜືອໄດ້ລະເບີດສູນປະສານງານຮ່ວມສອງເກົາຫຼີ ໃນນິຄົມອຸດສາຫະກຳແກຊອງ ຈາກຕົ້ນເຫດຂອງຄວາມບໍ່ພໍໃຈ ເລື່ອງການສົ່ງປຸ້ງເປົ້າລອຍຫ້ອຍໃບປິວໂຄສະນາຕໍ່ຕ້ານລັດຖະບານເກົາຫຼີເໜືອ ໂດຍກຸ່ມນັກເຄື່ອນໄຫວທາງການເມືອງໃນເກົາຫຼີໃຕ້ ທີ່ສ່ວນໃຫຍ່ເປັນຜູ້ລີ້ໄພເກົາຫຼີເໜືອ ໃຫ້ລອຍຂ້າມແດນໄປຍັງເກົາຫຼີເໜືອ.

HTML tutorial