ລັດຖະບານ, ກະຊວງພະລັງງານ, ລັດວິສາຫະກິດໄຟຟ້າລາວ ຖະແຫຼງກ່ຽວກັບບັນຫາລາຄາໄຟຟ້າ

ລາຍງານ 18 ມິຖຸນາ 2020, ທີ່ຫ້ອງວ່າການສຳນັກງານນາຍົກລັດຖະມົນຕີ, ທ່ານ ຈະເລີນ ເຢຍປາວເຮີ ລັດຖະມົນຕີປະຈຳສຳນັກງານນາຍົກ, ໂຄສົກລັດຖະບານ ໄດ້ຖະແຫຼງຂ່າວ ຮ່ວມກັບທ່ານ ລັດຖະມົນຕີກະຊວງພະລັງງານ-ບໍ່ແຮ່ ແລະ ຜູ້ວ່າການອຳນວຍການລັດວິສາຫະກິດໄຟຟ້າລາວ, ເຊິ່ງຄຳຖະແຫຼງຂອງໂຄສົກລັດຖະບານມີເນື້ອໃນສຳຄັນດັ່ງນີ້:

ຕໍ່ກັບທິດຊີ້ນຳຂອງກອງປະຊຸມລັດຖະບານ ຄັ້ງວັນທີ 17 ມິຖຸນາ 2020 ທີ່ຜ່ານມາໃນການຄົ້ນຄວ້າ ກວດກາຄືນ ການກຳນົດໂຄງສ້າງລາຄາໄຟຟ້າ ໃນໄລຍະ 2020 ຫາ 2025 ທີ່ໄດ້ປະກາດໃຊ້ໃນວັນທີ 01 ພຶດສະພາ 2020 ແລະ ປັບປຸງ ການປະຕິບັດນະໂຍບາຍລາຄາໄຟຟ້າຕໍ່ບາງກຸ່ມຜູ້ໃຊ້ໄຟຟ້າ ໃນໄລຍະການແຜ່ລະບາດຂອງພະຍາດໂຄວິດ-19.

ນັບແຕ່ທ້າຍປີ 2016 ເປັນຕົ້ນມາ, ລັດຖະບານເຫັນດີໃຫ້ປັບປຸງໂຄງສ້າງລາຄາໄຟຟ້າພາກທີ່ຢູ່ອາໄສ ທີ່ມີລັກສະນະເກື້ອກູນ ຈາກ 3 ຂັ້ນ ມາເປັນ 6 ຂັ້ນ, ຜ່ານການປະຕິບັດ ເຫັນວ່າການກຳ ນົດເປັນ 6 ຂັ້ນ ກໍ່ມີທັງດ້ານດີ ແລະ ດ້ານຈຳກັດ ສະນັ້ນ ລັດຖະບານ ຈຶ່ງໄດ້ຊີ້ນຳໃຫ້ຂະແໜງພະລັງງານ ແລະ ບໍ່ແຮ່ ກໍ່ຄືລັດວິສາຫະກິດໄຟຟ້າລາວ ຄົ້ນຄວ້າຄືນໃໝ່ ໃຫ້ສອດຄ່ອງກັບການຂະຫຍາຍຕົວຂອງເສດຖະກິດ-ສັງຄົມ ໃນໄລຍະແຕ່ປີ 2020-2025 ຜ່ານການທາບທາມຄວາມຄິດຄວາມເຫັນຈາກພາກສ່ວນຕ່າງໆ ແລະ ຄົ້ນຄວ້າຢ່າງເລິກເຊິ່ງ ຫຼົບໄປຫຼົບມາຫຼາຍຄັ້ງ ລວມທັງໄດ້ຂໍຄຳເຫັນຈາກກົມການເມືອງສູນກາງພັກ ແລະ ຄະນະປະຈຳສະພາແຫ່ງຊາດ, ລັດຖະບານ ຈຶ່ງໄດ້ຮັບຮອງເອົາໂຄງສ້າງລາຄາໄຟຟ້າໃໝ່ແຕ່ 2020-2025 ເປັນລາຄາດຽວ ຕາມທີ່ໄດ້ປະກາດໃຊ້ໃນວັນທີ 01 ພຶດສະພາ 2020 ເປັນຕົ້ນມາ ພາຍຫຼັງປະກາດໃຊ້ນະໂຍບາຍໂຄງສ້າງລາຄາໄຟຟ້າໃໝ່ ລາຄາດຽວມານີ້, ກໍ່ໄດ້ມີຫາງສຽງສັງຄົມ ທີ່ສະໜັບສະໜູນ ແລະ ຂັດຂ້ອງຈົ່ມວ່າຕ່າງໆນາໆ.

ດ້ວຍຄວາມເປັນຫ່ວງເປັນໄຍ ຂອງສູນກາງພັກ, ລັດຖະບານ ແລະ ສະພາແຫ່ງຊາດ, ລັດຖະບານ ຈຶ່ງໄດ້ນຳເອົາບັນຫາດັ່ງກ່າວ ມາພິຈາລະນາ ກວດກາຄືນໃໝ່ ໃນກອງປະຊຸມລັດຖະບານ ຄັ້ງວັນທີ 17 ມິຖຸນາ 2020 ນີ້. ກອງປະຊຸມລັດຖະບານ ກໍ່ໄດ້ຕີລາຄາສູງຕໍ່ຄວາມຄິດຄວາມເຫັນທີ່ສ້າງສັນ ແລະ ເປັນປະໂຫຍດຂອງສັງຄົມ, ພິຈາລະນາ ກວດກາຄືນ ແລະ ຊີ້ນຳ ໃຫ້ຂະແໜງການກ່ຽວຂ້ອງມີການຄົ້ນຄວ້າ, ປັບປຸງໂຄງສ້າງລາຄາໄຟຟ້າໃໝ່ນີ້ຕື່ມ ໃຫ້ສອດຄ່ອງ ດັ່ງນີ້:

1) ໃຫ້ປະຕິບັດນະໂຍບາຍ ຫຼຸດອັດຕາລາຄາໄຟຟ້າ ສຳລັບກຸ່ມຜູ້ໃຊ້ໄຟ ແຕ່ 151-461 ກິໂລວັດໂມງ ຕໍ່ເດືອນ ດ້ວຍລະດັບແຕກຕ່າງກັນ ລາຍລະອຽດ ແມ່ນໃຫ້ໄຟຟ້າລາວ ເປັນຜູ້ຄິດໄລ່ຕົວຈິງ; ສ່ວນກຸ່ມອື່ນ ໃຫ້ປະຕິບັດຕາມອັດຕາທີ່ໄດ້ປະກາດໃຊ້ແລ້ວ ເພາະໄດ້ມີສ່ວນຫຼຸດຢູ່ແລ້ວ. ນະໂຍບາຍດັ່ງກ່າວ ໃຫ້ປະຕິບັດໃນໄລຍະການແຜ່ລະບາດ ຂອງພະຍາດໂຄວິດ-19 (ເດືອນເມສາ, ພຶດສະພາ ແລະ ມິຖຸນາ) ໂດຍມອບໃຫ້ກະຊວງພະລັງງານ ແລະ ບໍ່ແຮ່ ຊີ້ນໍາລັດວິສາຫະກິດໄຟຟ້າ ໄລ່ລຽງຄືນ ແລະ ຈັດຕັ້ງປະຕິບັດ ໃຫ້ຖືກຕ້ອງສອດຄ່ອງ.

2) ມອບໃຫ້ກະຊວງພະລັງງານ ແລະ ບໍ່ແຮ່ ສົມທົບກັບພາກສ່ວນກ່ຽວຂ້ອງ ສືບຕໍ່ຄົ້ນຄວ້າປັບປຸງສິ່ງທີ່ບໍ່ສອດຄ່ອງ ແລະ ປະເມີນການປະຕິບັດລາຄາໄຟຟ້າໃໝ່ ຕາມແຈ້ງການ ສະບັບເລກທີ 394/ຫສນຍ, ລົງວັນທີ 19 ມີນາ 2020 ແລ້ວລາຍງານລັດຖະບານ ພິຈາລະນາ.

3) ໃຫ້ປະຕິບັດນະໂຍບາຍ ຫຼຸດຄ່າໄຟຟ້າ 15% ໃຫ້ແກ່ພະນັກງານແພດ-ໝໍ ທີ່ເຮັດວຽກປິ່ນປົວ ແລະ ໃກ້ຊິດໂດຍກົງກັບຜູ້ຕິດເຊື້ອພະຍາດ ໂຄວິດ-19 ຕາມການຄົ້ນຄວ້າ ແລະ ສະເໜີຂອງກະຊວງສາທາລະນະສຸກ ໂດຍຈິດໃຈຂອງກອງປະຊຸມ ຢາກໃຫ້ຄິດໄລ່ເປັນເງິນສົດ ແລະ ມອບໃຫ້ກະຊວງສາທາລະນະສຸກ ເປັນຜູ້ມອບໃຫ້ແກ່ແພດ-ໝໍດັ່ງກ່າວ.

4) ມອບໃຫ້ກະຊວງພະລັງງານ ແລະ ບໍ່ແຮ່ ຊີ້ນຳ ລັດວິສາຫະກິດໄຟຟ້າລາວ ລົງກວດກາ ແລະ ຊຸກຍູ້ບັນດາໜ່ວຍງານທີ່ຂຶ້ນກັບຄວາມຮັບຜິດຊອບຂອງຕົນ ໃຫ້ຍົກສູງຄວາມຮັບຜິດຊອບ ໃນປະຕິບັດໜ້າທີ່ວຽກງານ ຢ່າງເຂັ້ມງວດ, ບໍລິສຸດ, ສັດຊື່, ໂປ່ງໃສ. ພ້ອມນັ້ນ ກໍ່ຕ້ອງເດັດດ່ຽວແກ້ໄຂ ປະກົດການຫຍໍ້ທໍ້ ທີ່ລະເມີດລະບຽບການ, ບໍ່ໂປ່ງໃສ ໃຫ້ທັນເວລາ. ຜູ້ຊົມໃຊ້ໄຟຟ້າ ທຸກຄົນ ທຸກຄົວເຮືອນ ກໍ່ຕ້ອງຕື່ນຕົວເຄົາລົບລະບຽບ, ກົດໝາຍ, ປະຕິບັດສິດ ແລະ ພັນທະຂອງຕົນ ໃຫ້ຖືກຕ້ອງ ແລະ ຄົບຖ້ວນ, ເຂົ້າຮ່ວມຕິດຕາມກວດກາ ການເຄື່ອນໄຫວປະຕິບັດໜ້າທີ່ຂອງພະນັກງານໄຟຟ້າລາວ, ຖ້າຫາກເຫັນວ່າ ມີປະກົດການບໍ່ໂປ່ງໃສ, ລະເມີດລະບຽບ-ກົດໝາຍ ກໍ່ໃຫ້ນຳສະເໜີສ່ອງແສງແບບສ້າງສັນໃຫ້ອົງການກ່ຽວຂ້ອງຂັ້ນເທິງພິຈາລະນາແກ້ໄຂ ຢ່າງທັນການ.

ບັນດາເນື້ອໃນທີ່ກ່າວມານັ້ນ ແມ່ນຈິດໃຈຊີ້ນຳ ຂອງກອງປະຊຸມລັດຖະບານ ແລະ ທ່ານນາຍົກລັດຖະມົນຕີ ຕໍ່ການປັບປຸງ ແລະ ຈັດຕັ້ງປະຕິບັດ ໂຄງສ້າງລາຄາໄຟຟ້າໃໝ່ 2020-2025 ແລະ ນະໂຍບາຍລາຄາໄຟຟ້າ ໃນໄລຍະການແຜ່ລະບາດຂອງພະຍາດ ໂຄວິດ-19. ສະນັ້ນ, ຂ້າພະເຈົ້າ ຈຶ່ງຂໍຮຽກຮ້ອງໃຫ້ພະນັກງານ, ສະມາຊິກພັກ, ລັດຖະກອນ, ທະຫານ, ຕຳຫຼວດ, ນັກຮຽນ, ນັກສຶກສາ, ກຳມະກອນ, ປະຊາຊົນບັນດາເຜົ່າ, ນັກທຸລະກິດ ທັງພາກລັດ ແລະ ເອກະຊົນ ລວມທັງ ຊາວຕ່າງດ້າວ ແລະ ຊາວຕ່າງປະເທດ ທີ່ດຳລົງຊີວິດຢູ່ ສປປ ລາວ ຈົ່ງຮັບຊາບ ແລະ ຮ່ວມມືປະຕິບັດ ໃຫ້ປະກົດຜົນເປັນຈິງ, ຖ້າຫາກມີບັນຫາໃດ ຍັງຂັດຂ້ອງໝອງໃຈ ຫຼື ເຫັນວ່າຍັງບໍ່ທັນສອດຄ່ອງ ກໍ່ໃຫ້ສະ ເໜີຢ່າງຈິງໃຈຕໍ່ລັດຖະບານ, ຂະແໜງກ່ຽວຂ້ອງ ແລະ ອົງການປົກຄອງທ້ອງຖິ່ນຂັ້ນຕ່າງໆ ເພື່ອພິຈາລະນາແກ້ໄຂ ຕາມກົດໝາຍ, ລະບຽບການ ແລະ ນະໂຍບາຍ ຂອງພັກ ແລະ ລັດເຮົາ.

ພາບ: ທ່ານ ປອ ຄໍາມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່

ຫຼັງຈາກນັ້ນ, ໂຄສົກລັດຖະບານ ໄດ້ຂໍສະເໜີທ່ານ ລັດຖະມົນຕີກະຊວງພະລັງງານ ແລະ ບໍ່ແຮ່, ຜູ້ວ່າການອຳນວຍການລັດວິສາຫະກິດໄຟຟ້າລາວ ມີຄຳເຫັນຕື່ມ, ພ້ອມນີ້ ກໍ່ຍັງເປີດໂອກາດໃຫ້ ນັກຂ່າວ-ສື່ມວນຊົນ ຖາມຕໍ່ທ່ານລັດຖະມົນຕີກະຊວງພະລັງງານ-ບໍ່ແຮ່ ແລະ ຜູ້ວ່າການອຳນວຍການລັດວິສາຫະກິດໄຟຟ້າລາວ ຕື່ມອີກ.

ພາບ: ທ່ານ ຈັນທະບູນ ສຸກອາລຸນ ຜູ້ວ່າການຜູ້ອໍານວຍການ ລັດວິສາຫະກິດໄຟຟ້າລາວ