ນາຍົກອິນເດຍໄດ້ຮັບແຮງກົດດັນໃຫ້ຕອບໂຕ້ ສປ.ຈີນ ຈາກເຫດຄວາມຮຸນແຮງຄວາມຂັດແຍ່ງດິນແດນ

ລາຍງານ 18 ມິຖຸນາ 2020, ຜ່ານໄປ 2 ວັນພາຍຫຼັງເກີດເຫດການປະທະກັນຢ່າງດຸເດືອດລະຫວ່າງທະຫານຈີນ ກັບທະຫານອິນເດຍ ບໍລິເວນເຂດຄວາມຂັດແຍ່ງທາງດິນແດນເທິງສາຍພູຫິມາໄລ ນັ້ນກໍ່ຄືບໍລິເວນເຂດບ້ານກັນວານ ທາງທິດຕາເວັນອອກຂອງເຂດລາດັກ ໃນພູມມິພາກແຄັສເມຍຂອງອິນເດຍ ຫຼື ເຂດອັກໄສຊິນ ທາງທິດຕາເວັນຕົກສຽງໃຕ້ຂອງຈີນ ເມື່ອວັນຈັນທີ່ຜ່ານມາ.

ທ່ານ ນະເຣນາທຣາ ໂມດີ ນາຍົກລັດຖະມົນຕີອິນເດຍ ຖະແຫຼງຜ່ານສະຖານີໂທລະພາບແຫ່ງຊາດ ເມື່ອຄືນວັນພຸດ ທີ່ຜ່ານມາ ວ່າອິນເດຍບໍ່ເຄີຍຍຸແຍ່ໃຜກ່ອນ, ເຖິງຢ່າງໃດກໍ່ຕາມ ຫາກຕົກເປັນຝ່າຍຖືກຮຸກຮານ ອິນເດຍຈະບໍ່ລັງເລທີ່ຈະຕອບໂຕ້ດ້ວຍມາດຕະການທີ່ເໝາະສົມ ແລະ ກ່າວວ່າ ທະຫານ 20 ຄົນທີ່ເສຍຊີວິດຈາກເຫດການຄັ້ງນີ້ ຈະບໍ່ຈາກໄປໂດຍບໍ່ມີຄວາມໝາຍ ແຕ່ບໍ່ໄດ້ຂະຫຍາຍຄວາມວ່າໝາຍເຖິງຫຍັງ?.

ເຖິງຢ່າງໃດກໍ່ຕາມ, ທ່ານ ຣາຫຸນ ຄານທີ ຜູ້ນຳຝ່າຍຄ້ານຈາກພັກຄອງເກຣສ ຮຽກຮ້ອງໃຫ້ນາຍົກລັດຖະມົນຕີຕອບໂຕ້ໃຫ້ຫຼາຍກວ່ານີ້, ໃນດ້ານສື່ໃຫຍ່ຫຼາຍແຫ່ງລວມເຖິງ The Time of India ພ້ອມໃຈກັນຂຽນບົດຄວາມ ແລະ ສະເໜີລາຍງານພິເສດກົດດັນລັດຖະບານແບບດຽວກັນວ່າ ລັດຖະບານອິນເດຍຕ້ອງຕອບໂຕ້ຢ່າງເດັດດ່ຽວ ໂດຍສ່ວນໃຫຍ່ສະເໜີໃຫ້ມີການໃຊ້ມາດຕະການຂວ້ຳບາດທາງການຄ້າ.

ໃນດ້ານຂອງທ່ານ ຫວັງ ອີ້ ລັດຖະມົນຕີກະຊວງການຕ່າງປະເທດຂອງຈີນ ຮຽກຮ້ອງໃຫ້ອິນເດຍສືບສວນສອບສວນເຫດການດັ່ງກ່າວ ແລະ ລົງໂທດຜູ້ກະທຳຜິດ ແລະ ອິນເດຍບໍ່ຄວນປະເມີນຕ່ຳເກີນໄປ ໃນການທີ່ລັດຖະບານຈີນຈະປົກປ້ອງອະທິປະໄຕຂອງຕົນເອງ ພ້ອມທັງເຕືອນວ່າ ເລື່ອງທີ່ເກີດຂຶ້ນສົ່ງຜົນກະທົບຕໍ່ສາຍພົວພັນຢ່າງຫຼີກລ້ຽງບໍ່ໄດ້.

ນອກຈາກນີ້, ຍັງມີລາຍງານວ່າ ທ່ານ ຫວັງ ອີ້ ໄດ້ສົນທະນາທາງໂທລະສັບກັບທ່ານ ສຸພົມມະນະຍຳ ໄຊສັງກະ (Subranhmanyan Jaishankar) ລັດຖະມົນຕີກະຊວງການຕ່າງປະເທດອິນເດຍ ຢືນຢັນວ່າທັງສອງປະເທດຈະເດີນໜ້າເຈລະຈາກັນຕໍ່ໄປ ເພື່ອຫຼຸດຜ່ອນຄວາມເຄັ່ງຕຶງເທິງສາຍພູຫິມາໄລ.