ຍີ່ປຸ່ນຈັບອະດີດລັດຖະມົນຕີກະຊວງຍຸຕິທຳ ຂໍ້ຫາສໍ້ໂກງການເລືອກຕັ້ງ

ລາຍງານ 18 ມິຖຸນາ 2020, ສຳນັກງານໄອຍະການໂຕກຽວຖະແຫຼງວ່າ ໄດ້ຈັບກຸມທ່ານ ຄາວາອິ ຄັດສຶຢູກິ ອະດີດລັດຖະມົນຕີກະຊວງຍຸຕິທຳຍີ່ປຸ່ນ ແລະ ທ່ານ ນາງ ອັນຣິ ພັນລະຍາ ຂໍ້ຫາລະເມີດກົດໝາຍເລືອກຕັ້ງ ເຊິ່ງທັງ 2 ຄົນເປັນສະມາຊິກສະພາ ທີ່ສັງກັດພັກເສລີປະຊາທິປະໄຕ ພັກແກນນຳລັດຖະບານຍີ່ປຸ່ນ.

ຄະນະໄອຍະການລະບຸວ່າ ທ່ານ ຄັດສຶຢູກິ ໃຊ້ເງິນຫາສຽງ 220,000 ໂດລາສະຫະລັດ ແຈກເປັນເງິນສົດໃຫ້ແກ່ນັກການເມືອງທ້ອງຖິ່ນ ແລະ ບຸກຄົນທົ່ວໄປ ເພື່ອໃຫ້ພັນລະຍາຂອງຕົນໄດ້ຄະແນນສຽງເລືອກຕັ້ງ.

ເຊິ່ງທ່ານ ນາງ ອັນຣິ ລົງເລືອກຕັ້ງສະພາສູງ ເມື່ອເດືອນກໍລະກົດ ປີທີ່ຜ່ານມາ ແລະ ຊະນະການເລືອກຕັ້ງ, ນອກຈາກນີ້ ຍັງຖືກກ່າວຫາວ່າແຈກເງິນສົດດ້ວຍຕົນເອງປະມານ 10,000 ໂດລາສະຫະລັດ.

ຫຼັງການເລືອກຕັ້ງດັ່ງກ່າວ ທ່ານ ຄັດສຶຢູກິ ໄດ້ຮັບການແຕ່ງຕັ້ງເປັນລັດຖະມົນຕີກະຊວງຍຸຕິທຳ ແຕ່ຈຳເປັນຕ້ອງລາອອກ ເມື່ອມີການເປີດເຜີຍເຖິງບັນຫາດັ່ງກ່າວໃນວາລະສານລາຍອາທິດສະບັບໜຶ່ງ ເມື່ອເດືອນຕຸລາ ປີທີ່ຜ່ານມາ ເຊິ່ງປະຕິບັດໜ້າທີ່ລັດຖະມົນຕີກະຊວງຍຸຕິທຳໄດ້ພຽງເດືອນດຽວເທົ່ານັ້ນ.

ເມື່ອວັນພຸດ 17 ມິຖຸນາ ທີ່ຜ່ານມາ ທ່ານ ຄັດສຶຢູກິ ແລະ ທ່ານ ນາງ ອັນຣິ ໄດ້ຍື່ນໃບລາອອກຈາກພັກເສລີປະຊາທິປະໄຕແລ້ວ, ແຕ່ທັງສອງປະຕິເສດວ່າຕົນບໍ່ໄດ້ກະທຳຜິດກົດໝາຍ.