ທ່ານນາຍົກລາຍງານສະພາບເສດຖະກິດຕໍ່ສະພາແຫ່ງຊາດ, ພິດໂຄວິດ-19 ເສດຖະກິດຫຼຸດລົງທຸກດ້ານ

ລາຍງານ 24 ມິຖຸນາ 2020, ກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດຊຸດທີ VIII ໄດ້ໄຂຂຶ້ນຢ່າງເປັນທາງການ ໃນຕອນເຊົ້າຂອງວັນພຸດນີ້ ທີ່ຫ້ອງວ່າການສູນກາງພັກ (ຫຼັກ 6), ນະຄອນຫຼວງວຽງຈັນ, ທ່ານ ທອງລຸນ ສີລຸສິດ ນາຍົກລັດຖະມົນຕີ ໄດ້ຕາງໜ້າລັດຖະບານລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາ 5 ເດືອນ, ຄາດຄະເນ 6 ເດືອນຕົ້ນປີ ແລະ ທິດທາງວຽກຈຸດສຸມ 6 ເດືອນທ້າຍປີຕໍ່ກອງປະຊຸມ ພ້ອມທັງລາຍງານນະໂຍບາຍ ແລະ ມາດຕະການແກ້ໄຂຜົນກະທົບຕໍ່ເສດຖະກິດ-ສັງຄົມຈາກການລະບາດຂອງພະຍາດໂຄວິດ-19.

ກ່ຽວກັບການຂະຫຍາຍຕົວຂອງເສດຖະກິດ, ອີງຕາມການລາຍງານຂອງສຳນັກຂ່າວສານປະເທດລາວ (KPL) ທ່ານນາຍົກລັດຖະມົນຕີ ໄດ້ລາຍງານວ່າ:  ຍ້ອນມີຜົນກະທົບຈາກຫຼາຍປັດໄຈ ແຕ່ອີງໃສ່ການຄາດຄະເນຂອງສະຖາບັນຄົ້ນຄວ້າເສດຖະກິດແຫ່ງຊາດ ແລະ ສູນສະຖິຕິແຫ່ງຊາດ ໂດຍນຳໃຊ້ຂໍ້ມູນ 3 ເດືອນຄາດຄະເນໝົດປີ 2020 ເສດຖະກິດຂອງປະເທດລາວ (GDP) ຈະຂະຫຍາຍຕົວຢູ່ທີ່ລະດັບ 3.3% ຫາ 3.6% ເຊິ່ງຫຼຸດຈາກແຜນປະຈຳປີ 2020 ທີ່ສະພາແຫ່ງຊາດເຄີຍຮັບຮອງນັ້ນຄື 6.5%, ໃນກໍລະນີ GDP ຂະຫຍາຍຕົວ 3.6% ຈະມີມູນຄ່າໃນປີປະມານ 175,720 ຕື້ກີບ, ໂດຍຂະແໜງກະສິກຳຂະຫຍາຍຕົວ 2.3% ຫຼຸດແຜ່ນ 0.4%, ຂະແຫຼງອຸດສາຫະກຳ ຂະຫຍາຍຕົວ 6.8% ຫຼຸດແຜນ 1.5%, ສ່ວນຂະແໜງບໍລິການຈະຂະຫຍາຍຕົວພຽງ 1.7% ຫຼຸດແຜ່ນ 5.2% ຫຼື ອາດຫຼຸດເຖິງ -4.5% ເຊິ່ງນັກທ່ອງທ່ຽວໃນ 5 ເດືອນຕົ້ນປີ 2020 ມີພຽງ 886,447 ຄົນ ຫຼຸດລົງ 17% ເມື່ອທຽບໃສ່ປີຜ່ານມາ.

ນອກຈາກນີ້, ການສົ່ງອອກສິນຄ້າຍັງຫຼຸດລົງ 6.1%,  ການນຳເຂົ້າຫຼຸດລົງ 8.1% ເຊິ່ງຈະເຮັດໃຫ້ສູນເສຍລາຍຮັບຈາກການສົ່ງອອກປະມານ 483.3 ລ້ານໂດລາສະຫະລັດ ຫຼື ປະມານ 8.4% ຂອງມູນຄ່າການສົ່ງອອກທຽບໃສ່ປີ 2019.

ເຖິງຢ່າງໃດກໍ່ຕາມ, ທະນາຄານພັດທະນາອາຊີ (ADB) ຄາດວ່າເສດຖະກິດຂອງ ສປປ.ລາວ ຈະຂະຫຍາຍຕົວຢູ່ໃນລະດັບ 3.5% ໃນປີ 2020 ແຕ່ຜົນການວິເຄາະຫຼ້າສຸດເຫັນວ່າອາດ -0.5% ຍ້ອນຜົນກະທົບຈາກການລະບາດຂອງພະຍາດໂຄວິດ-19, ໃນດ້ານຂອງທະນາຄານໂລກກໍ່ໄດ້ຄາດຄະເນໄວ້ວ່າ ເສດຖະກິດຂອງ ສປປ.ລາວ ຈະຂະຫຍາຍຕົວ 1% ແຕ່ຖ້າຜົນກະທົບຈາກໂຄວິດ-19 ແກ່ຍາວ ອາດຈະເຮັດໃຫ້ -1.8%, ສ່ວນອົງການກອງທິນການເງິນສາກົນ (IMF) ໄດ້ຄາດຄະເນໃຫ້ພຽງ 0.7% ເທົ່ານັ້ນ.