ບັນດາຜູ້ນຳອາຊຽນຮຽກຮ້ອງໃຫ້ເພີ່ມທະວີການຮ່ວມມືພາຍໃນກຸ່ມ ເພື່ອຜ່ານຜ່າສິ່ງທ້າທາຍໄປຮ່ວມກັນ

ລາຍງານ 28 ມິຖຸນາ 2020, ກອງປະຊຸມສຸດຍອດອາຊຽນ ຄັ້ງທີ 36 ຖືກດຳເນີນໄປໃນວັນທີ 26 ມິຖຸນາ ທີ່ຜ່ານມາ ຜ່ານທາງອອນລາຍ ພາຍໃຕ້ການເປັນປະທ່ານຂອງທ່ານ ຫງວຽນຊວັນຟຸກ ນາຍົກລັດຖະມົນຕີຫວຽດນາມ ດ້ວຍບົດບາດເປັນປະທານອາຊຽນ 2020, ພ້ອມກັບການເຂົ້າຮ່ວມຂອງການນຳ 10 ປະເທດອາຊຽນ, ທ່ານເລຂາທິການໃຫຍ່ອາຊຽນ ລິມ ຈັອກ ຮອຍ ແລະ ບັນດາເຈົ້າໜ້າທີ່ຂັ້ນສູງອື່ນໆ.

ທ່ານ ໂຈໂກ ວິໂດໂດ ປະທານປະເທດອິນໂດເນເຊຍໄດ້ຢືນຢັນວ່າ, ໄປຄຽງຄູ່ກັບຄວາມທໍ້ຖອຍໃຈຂອງລັດທິຫຼາຍຝ່າຍ, ຄວາມເປັນລະບຽບຮຽບຮ້ອຍສາກົນທີ່ອີງໃສ່ກົດໝາຍສາກົນນັບມື້ນັບຖືກລະເມີດໃນທ່າມກາງບັນດາເງື່ອນໄຂດ້ານພູມສາດການເມືອງນັ້ນ, ອິນໂດເນເຊຍ ໄດ້ເນັ້ນໜັກເຖິງບົດບາດສຳຄັນຂອງອາຊຽນ ໃນການຫັນທິດການປ່ຽນແປງດັ່ງກ່າວ.

ທ່ານພົນເອກ ປຣະຢຸດ ຈັນໂອຊາ ນາຍົກລັດຖະມົນຕີ ແລະ ລັດຖະມົນຕີກະຊວງປ້ອງກັນປະເທດຂອງໄທ ໄດ້ສະເໜີ 3 ທິດທາງການກະທຳ ເພື່ອແນໃສ່ຊຸກຍູ້ອາຊຽນ ພາຍຫຼັງໂລກລະບາດໂຄວິດ-19, ນັ້ນແມ່ນ ອາຊຽນເຊື່ອມຕໍ່ເປັນຢ່າງດີກວ່າ, ອາຊຽນເຂັ້ມແຂງກວ່າ ແລະ ອາຊຽນຕ້ານພະຍາດໄດ້ດີກວ່າ.

ທ່ານ ລີ ຊຽນລຸງ ນາຍົກລັດຖະມົນຕີສິງກະໂປ ຢືນຢັນວ່າ, ເພື່ອນຳພື້ນຖານເສດຖະກິດພາກພື້ນກັບຄືນສູ່ສະພາບປົກກະຕິ, ອາຊຽນ ຄວນເພີ່ມທະວີການຮ່ວມມື ແລະ ຊຸກຍູ້ບັນດາຂໍ້ລິເລີ່ມທີ່ໄດ້ວາງອອກແລ້ວ.

ສົມເດັດ ຮຸນ ເຊນ ນາຍົກລັດຖະມົນຕີກຳປູເຈຍ ເນັ້ນໜັກວ່າ ກຳປູເຈຍໃສ່ໃຈທີ່ສຸດເຖິງເລື່ອງຮັກສາ ແລະ ຊຸກຍູ້ສັນຕິພາບ, ຄວາມໝັ້ນຄົງ, ສະຖຽນລະພາບ ແລະ ວັດທະນາຖາວອນຢູ່ທະເລຕາເວັນອອກ. ບັນດາການຜັນແປຫຼ້າສຸດຢູ່ທະເລຕາເວັນອອກ ໄດ້ສ່ອງແສງຄວາມສຳຄັນຂອງເລື່ອງສ້າງກົດແຫ່ງການປະພຶດຂອງບັນດາຝ່າຍຢູ່ທະເລຕາເວັນອອກ (COC) ໃຫ້ສຳເລັດໂດຍໄວ ເພື່ອແນໃສ່ຮັກສາສັນຕິພາບຢູ່ທະເລຕາເວັນອອກ. ກ່ຽວກັບບັນຫານີ້, ນາຍົກລັດຖະມົນຕີກຳປູເຈຍຖືວ່າ, ບັນດາຝ່າຍຄວນສຸມໃສ່ເຂົ້າໃນການລະງັບໃຈ ແລະ ນຳໃຊ້ບັນດາມາດຕະການໂດຍສັນຕິວີທີ ເໝາະສົມກັບກົດໝາຍ, ໃນນັ້ນມີສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982 (UNCLOS).

ສ່ວນທ່ານ ທອງລຸນ ສີສຸລິດ ນາຍົກລັດຖະມົນຕີລາວ ວ່າຄວນສືບຕໍ່ເພີ່ມທະວີການຮ່ວມມືລະຫວ່າງບັນດາປະເທດສະມາຊິກ, ບໍ່ປະໃຫ້ໂລກລະບາດໂຄວິດ-19 ກັບມາແຜ່ລະບາດຄືນໃໝ່ ຜ່ານການສືບຕໍ່ແລກປ່ຽນຂໍ້ມູນຂ່າວສານ ແລະ ບົດຮຽນໃນການປ້ອງກັນ, ປິ່ນປົວ, ຄົ້ນຄວ້າພັດທະນາ, ຜະລິດຢາ ແລະ ວັກຊິນປ້ອງກັນພະຍາດ; ກຽມພ້ອມຟື້ນຟູເສດຖະກິດ – ສັງຄົມຢ່າງຮອບດ້ານ ພາຍຫຼັງໂລກລະບາດ ເພື່ອແນໃສ່ຟື້ນຟູບັນດາຂົງເຂດຖືກຜົນສະທ້ອນຢ່າງໜັກໜ່ວງຈາກໂລກລະບາດ…

ໃນຖານະບົດບາດເປັນປະທານອາຊຽນ 2020, ຫວຽດນາມ ໄດ້ອອກຖະແຫຼງການຂອງປະທານກອງປະຊຸມສຸດຍອດອາຊຽນ ຄັ້ງທີ 36, ດ້ວຍບາງເນື້ອໃນຕົ້ນຕໍຄື:

ຕາມຖະແຫຼງການປະທານ, ບັນດາການນຳອາຊຽນ ໄດ້ເນັ້ນໜັກເຖິງການເພີ່ມທະວີຄວາມສາມັກຄີ, ການຮ່ວມມື ແລະ ເປັນເອກະພາບນຳກັນ, ເຊື່ອມໂຍງທາງດ້ານເສດຖະກິດ, ຍົກສູງສະຕິຄວາມຮັບຮູ້ ແລະ ສີສັນອາຊຽນ, ຍົກສູງກຳລັງຄວາມສາມາດເປັນເຈົ້າການຮັບມືຂອງອາຊຽນ.

ກ່ຽວກັບການກໍ່ສ້າງປະຊາຄົມອາຊຽນ, ບັນດາການນຳໄດ້ໃຫ້ຄຳໝັ້ນສັນຍາປະຕິບັດວິໄສທັດອາຊຽນ 2025, ມຸ່ງໄປເຖິງປະຊາຄົມອາຊຽນ ສາມັກຄີ, ມຸ່ງໄປເຖິງປະຊາຊົນ, ຖືປະຊາຊົນເປັນໃຈກາງ… ຢືນຢັນຄຳໝັ້ນສັນຍາຮັກສາ ແລະ ຊຸກຍູ້ສັນຕິພາບ, ຄວາມໝັ້ນຄົງ ແລະ ສະຖຽນລະພາບຢູ່ພາກພື້ນ, ບັນດາການນຳໄດ້ເນັ້ນໜັກເຖິງເລື່ອງແກ້ໄຂບັນດາການຂັດແຍ້ງກັນໂດຍສັນຕິວິທີ, ບໍ່ນຳໃຊ້ ຫຼື ນາບຂູ່ນຳໃຊ້ອາວຸດ, ເໝາະສົມກັບບັນດາຫຼັກການ, ກົດໝາຍສາກົນ.

ກ່ຽວກັບບັນດາບຸລິມະສິດຕົ້ນຕໍໃນປີ 2020, ບັນດາການນຳໄດ້ຮັບຮອງເອົາຖະແຫຼງການວິໄສທັດບັນດາການນຳອາຊຽນ ກ່ຽວກັບອາຊຽນ ສະໜິດຕິດພັນ ແລະ ເປັນເຈົ້າການຮັບມື ເພື່ອແນໃສ່ຮັກສາຄວາມສາມັກຄີ, ເປັນເອກະພາບ ແລະ ບົດບາດໃຈກາງຂອງອາຊຽນ; ກຳແໜ້ນບັນດາກາລະໂອກາດ ແລະ ແກ້ໄຂບັນດາສິ່ງທ້າທາຍຫາກໍ່ພົ້ນເດັ່ນຂຶ້ນຢ່າງມີປະສິດທິຜົນ.

ກ່ຽວກັບປະຊາຄົມການເມືອງ – ຄວາມໝັ້ນຄົງອາຊຽນ, ການນຳບັນດາປະເທດອາຊຽນ ໄດ້ໃຫ້ຄຳໝັ້ນສັນຍາເພີ່ມທະວີການຮ່ວມມືຄຸ້ມຄອງຊາຍແດນ, ເພີ່ມທະວີການຮ່ວມມືໃນການປ້ອງກັນ, ຕ້ານຢາເສບຕິດ. ຕີລາຄາເລື່ອງປະເທດ Timor-Leste ຂໍເຂົ້າເປັນສະມາຊິກອາຊຽນ ໂດຍໄວ.

ກ່ຽວກັບປະຊາຄົມເສດຖະກິດອາຊຽນ, ບັນດາການນຳໄດ້ໃຫ້ຄຳໝັ້ນສັນຍາຮັບປະກັນການເຕີບໂຕທາງດ້ານເສດຖະກິດແບບຍືນຍົງ, ມີຄວາມດຸ່ນດ່ຽງ, ຮອບດ້ານ ແລະ ປົກປ້ອງພື້ນຖານເສດຖະກິດຕໍ່ໜ້າບັນດາຄວາມສ່ຽງ ແລະ ຄວາມຂາດສະຖຽນລະພາບທົ່ວໂລກ; ໃຫ້ຄຳໝັ້ນສັນຍາຮັກສາຕະຫຼາດເປີດ, ສົມທົບກັນປະຕິບັດບັນດາມາດຕະການເພື່ອແນໃສ່ຫຼຸດຜ່ອນບັນດາຜົນກະທົບຈາກໂລກລະບາດໂຄວິດ-19 ຕໍ່ເສດຖະກິດ.

ກ່ຽວກັບປະຊາຄົມວັດທະນະທຳ – ສັງຄົມອາຊຽນ, ບັນດາການນຳອາຊຽນ ໄດ້ໃຫ້ຄຳໝັ້ນສັນຍາສ້າງປະຊາຄົມອາຊຽນ ໃຫ້ມີຄວາມສະໜິດຕິດພັນກວ່າ, ນຳມາເຊິ່ງຜົນປະໂຫຍດຫຼາຍກວ່າໃຫ້ແກ່ປະຊາຊົນອາຊຽນ, ບໍ່ໃຫ້ຜູ້ໃດຕົກຢູ່ທາງຫຼັງໃນການພັດທະນາຢ່າງຮອບດ້ານ ແລະ ໝັ້ນຄົງ.

ກ່ຽວກັບການພົວພັນຕ່າງປະເທດຂອງອາຊຽນ, ບັນດາການນຳອາຊຽນ ໄດ້ເນັ້ນໜັກເຖິງຄວາມສຳຄັນຂອງເລື່ອງເພີ່ມທະວີການສົມທົບກັນ ແລະ ການຮ່ວມມືຢູ່ພາກພື້ນ ແລະ ສາກົນກັບບັນດາຄູ່ຮ່ວມມືພາຍນອກ.

ກ່ຽວກັບບັນດາບັນຫາສາກົນ ແລະ ພາກພື້ນ, ບັນດາການນຳອາຊຽນ ໄດ້ຢືນຢັນຄວາມສຳຄັນຂອງເລື່ອງຮັກສາ ແລະ ຊຸກຍູ້ສັນຕິພາບ, ຄວາມໝັ້ນຄົງ, ສະຖຽນລະພາບ, ຄວາມປອດໄພ ແລະ ຄວາມເສລີໃນການເດີນທະເລ ແລະ ການບິນຢູ່ທະເລຕາເວັນອອກ ແລະ ຮັບປະກັນວ່າ ທະເລຕາເວັນອອກ ແມ່ນເຂດທະເລທີ່ມີສັນຕິພາບ, ສະຖຽນລະພາບ ແລະ ວັດທະນາຖາວອນ. ບັນດາການນຳໄດ້ເນັ້ນໜັກເຖິງຄວາມສຳຄັນຂອງການປະຕິບັດ DOC ຢ່າງຄົບຖ້ວນ ແລະ ມີປະສິດທິຜົນ, ສ້າງ COC ຢ່າງມີປະສິດທິຜົນ ແລະ ແທດຈິງ, ເໝາະສົມກັບກົດໝາຍສາກົນ. ບັນດາການນຳໄດ້ເນັ້ນໜັກເຖິງຄວາມສຳຄັນຂອງເລື່ອງປອດການຫັນເປັນການທະຫານ ແລະ ລະງັບໃຈດ້ວຍຕົນເອງໃນການປະຕິບັດທຸກການກະທຳຂອງບັນດາຝ່າຍທວງສິດ ແລະ ບັນດາປະເທດອື່ນ ອາດຈະເຮັດໃຫ້ສະພາບການເຄັ່ງຕຶງ ແລະ ສັບສົນຂຶ້ນຕື່ມ.