ປະຊາຊົນລັດເຊຍຮັບຮອງເອົາລັດຖະທຳມະນູນສະບັບໃໝ່ ໃຫ້ ປ.ປູຕິນ ເປັນຜູ້ນຳໄດ້ຕະຫຼອດຊີວິດ

ລາຍງານ 2 ກໍລະກົດ 2020, ຜົນຢ່າງບໍ່ເປັນທາງການຂອງການລົງປະຊາມະຕິໃນລັດເຊຍ ທີ່ຈັດຂຶ້ນໃນລະຫວ່າງວັນທີ 25 ມິຖຸນາ ເຖິງ 1 ກໍລະກົດ ທີ່ຜ່ານມາ ວ່າດ້ວຍລັດຖະທຳມະນູນສະບັບໃໝ່ ເພື່ອໃຊ້ແທນສະບັບປັດຈຸບັນທີ່ໃຊ້ມາຕັ້ງແຕ່ປີ 1993 ປາກົດວ່າເກືອບ 78% ຂອງຜູ້ໃຊ້ສິດ ເຫັນດີ, ໂດຍມີຜູ້ຄັດຄ້ານ 21% ສ່ວນຈຳນວນຜູ້ອອກມາໃຊ້ສິດມີປະມານ 65%, ຂະນະທີ່ທ່ານນາງ ເອວລາ ແພມຟິໂລວາ ປະທານຄະນະກຳມະການການເລືອກຕັ້ງຂອງລັດເຊຍ ຢືນຢັນວ່າການລົງປະຊາມະຕິຄັ້ງນີ້ບໍລິສຸດໂປ່ງໃສໃນທຸກຂັ້ນຕອນ.

ພາບ: ທ່ານ ວະລາດິເມຍ ປູຕິນ ປະທານປະເທດລັດເຊຍ

ແນ່ນອນວ່າທ່ານ ອະເລັກຊີ ນາວັນນີ ແກນນຳຝ່າຍຄ້ານຄົນສຳຄັນຂອງລັດເຊຍ ກ່າວໄປໃນທາງກົງກັນຂ້າມ ແລະ ວິຈານການລົງປະຊາມະຕິຄັ້ງນີ້ ວ່າບໍ່ມີຄວາມຊອບທຳ ແລະ ບໍ່ເປັນໄປຕາມກົດໝາຍຕັ້ງແຕ່ຕົ້ນ ເນື່ອງຈາກເປັນຄວາມພະຍາຍາມຂອງລັດຖະບານ ເພື່ອເປີດທາງໃຫ້ທ່ານ ວະລາດິເມຍ ປູຕິນ ຢູ່ໃນຕຳແໜ່ງປະທານປະເທດຕະຫຼອດຊີວິດຢ່າງຖືກຕ້ອງຕາມກົດໝາຍ, ເຖິງຢ່າງໃດກໍ່ຕາມ ຝ່າຍຕໍ່ຕ້ານຈະດຳເນີນການປະທ້ວງຄັ້ງໃຫຍ່ ແຕ່ຕອນນີ້ເພາະຢູ່ໃນໄລຍະຂອງການລະບາດພະຍາດໂຄວິດ-19 ແຕ່ກຳນົດແຜນການໄວ້ເບື້ອງຕົ້ນໃນໄລຍະລະດູໃບໄມ້ລົ່ນທີ່ຈະມາເຖິງ.

ນອກເໜືອຈາກການທີ່ລັດຖະທຳມະນູນສະບັບໃໝ່ຈະມີການຍົກລະດັບສະຫວັດດີການທາງສັງຄົມ ແລະ ການເຊື່ອມໂຍງທາງເສດຖະກິດໃນຫຼາຍດ້ານ ແຕ່ມີມາດຕາກ່ຽວກັບການບໍ່ຮັບຮອງການແຕ່ງດອງຂອງຄູ່ຮັກເພດດຽວກັນ, ສ່ວນມາດຕາທີ່ຫຼາຍຝ່າຍທັງພາຍໃນ ແລະ ພາຍນອກປະເທດໃຫ້ຄວາມສົນໃຈຫຼາຍທີ່ສຸດ ຄືມາດຕາວ່າດ້ວຍການບໍ່ຈຳກັດໄລຍະເວລາສຳລັບບຸກຄົນໃດໜຶ່ງໃນການດຳລົງຕຳແໜ່ງທາງການເມືອງ ລວມເຖິງຕຳແໜ່ງປະທານປະເທດ.

ເຖິງແມ່ນວ່າທ່ານ ປູຕິນ ບໍ່ສະແດງຈຸດຢືນຢ່າງເປັນທາງການກ່ຽວກັບອະນາຄົດທາງການເມືອງຂອງຕົນ ເມື່ອຄົນວາລະຕຳແໜ່ງປັດຈຸບັນໃນປີ 2024 ແຕ່ຜູ້ນຳລັດເຊຍເຄີຍກ່າວວ່າ ຕ້ອງການໃຫ້ລັດຖະທຳມະນູນສະບັບໃໝ່ ທີ່ຕົນສະເໜີດ້ວຍຕົນເອງເມື່ອຕົ້ນປີນີ້ ຜ່ານການລົງປະຊາມະຕິຈາກປະຊາຊົນ ເພື່ອສ້າງຄວາມຊອບທຳ ອາດຖືໄດ້ວ່າເປັນການສົ່ງສັນຍານວ່າ ທ່ານ ປູຕິນອາດລົງສະໝັກເລືອກຕັ້ງອີກ ແລະ ມີທ່າອ່ຽງສູງທີ່ຈະເປັນຜູ້ຊະນະຕໍ່ເນື່ອງອີກ 2 ສະໄໝ ຫຼື 12 ປີ ເທົ່າກັບທ່ານ ປູຕິນ ຈະດຳລົງຕຳແໜ່ງຜູ້ນຳລັດເຊຍໄປຈົນເຖິງປີ 2036 ແລະ ເມື່ອເຖິ່ງຕອນນັ້ນທ່ານ ປູຕິນ ຈະມີອາຍຸ 83 ປີ.

HTML tutorial