ສານອັງກິດຕັດສິນບໍ່ໃຫ້ເວເນຊູເອລາ ຖອນຄຳທີ່ຝາກໄວ້ມູນຄ່າ 1,800 ລ້ານໂດລາ

ລາຍງານ 3 ກໍລະກົດ 2020, ສານສູງໃນນະຄອນຫຼວງລອນດອນ ມີຄຳຕັດສິນເມື່ອວັນພະຫັດ (2 ກໍລະກົດ ທີ່ຜ່ານມາ) ໃນຄະດີທີ່ທະນາຄານກາງແຫ່ງເວເນຊູເອລາ (BCV) ເປັນໂຈດຍື່ນຟ້ອງທະນາຄານແຫ່ງອັງກິດ (BOE) ທີ່ປະຕິເສດໃຫ້ທະນາຄານກາງແຫ່ງເວເນຊູເອລາເຂົ້າເຖິງຄຳສຳຮອງມູນຄ່າ 1,800 ລ້ານໂດລາສະຫະລັດ ທີ່ລັດຖະບານເວເນຊູເອລາຝາກໄວ້ກັບທະນາຄານແຫ່ງອັງກິດ.

ເຖິງຢ່າງໃດກໍ່ຕາມ ຄຳຕັດສິນຂອງສານລະບຸວ່າ ການທີ່ລັດຖະບານອັງກິດຍອມຮັບເອົາທ່ານ ຮວນ ກວຍໂດ ໃນຖານະຮັກສາການປະທານປະເທດຕາມລັດຖະທຳມະນູນຂອງເວເນຊູເອລາ ມະຕິຂອງຝ່າຍຕຸລາການຈຶ່ງຄວນສອດຄ່ອງໄປໃນທິດທາງດຽວກັນ ສານບໍ່ສາມາດຍອມຮັບໄດ້ວ່າ ເວເນຊູເອລາມີປະທານປະເທດ 2 ຄົນ, ເຊິ່ງຫວນຄືນໄປເມື່ອໄລຍະຕົ້ນປີ 2019 ທ່ານ ນາງ ເທເຣຊາ ເມ ນາຍົກລັດຖະມົນຕີອັງກິດໃນຂະນະນັ້ນ ໄດ້ປະກາດຮັບເອົາທ່ານ ຮວນ ກວຍໂດ ເຕາມ ສ.ອາເມຣິກາ.

ໃນດ້ານຂອງທະນາຍຄວາມຂອງລັດຖະບານເວເນຊູເອລາ ພາຍໃຕ້ການນຳຂອງທ່ານ ນິໂຄລັສ ມາດູໂຣ ປະທານປະເທດເວເນຊູເອລາ ຢືນຢັນວ່າຈະຍື່ນອຸທອນ, ຂະນະທີ່ທະນາຄານກາງແຫ່ງເວເນຊູເອລາ ປະນາມຄຳຕັດສິນຂອງສານສູງລອນດອນ ວ່າເປັນການກີດກັ້ນສິດທິອັນຊອບທຳຂອງເວເນຊູເອລາ ໃນການເຂົ້າເຖິງຄຳສ່ວນໜຶ່ງ ເພື່ອນຳມາໃຊ້ເປັນທຶນຕໍ່ສູ້ກັບການລະບາດຂອງພະຍາດໂຄວິດ-19, ຂະນະທີ່ທ່ານ ຮວນ ກວຍໂດ ຊົມເຊີຍຄຳຕັດສິນວ່າ ເປັນການປົກປ້ອງຊັບພະຍາກອນອັນມີຄ່າຂອງປະຊາຊົນເວເນຊູເອລາ ໃຫ້ຫຼຸດພົ້ນຈາກການສໍ້ລາດບັງຫຼວງຂອງລັດຖະບານເວເນຊູເອລາ.

HTML tutorial