ຈີນບຸກປູກເຂົ້າໃນທະເລຊາຍ ຄາດຜົນຜະລິດຈະໄດ້ຮັບສູງເຖິງໄລ່ລະ 1 ໂຕນ

ລາຍງານ 3 ກໍລະກົດ 2020, ສຳນັກຂ່າວຊິນຫົວຂອງທາງການຈີນລາຍງານວ່າ: ຊາວກະສິກອນຈີນໄດ້ປູກເຂົ້າໄຮ່ ໃນເນື້ອທີ່ 347 ເຮັກຕາ ຢູ່ໃນເຂດທະເລຊາຍອູຫຼັນປູ້ (Ulan Buh Desert) ທີ່ມີຂະໜາດໃຫຍ່ເປັນອັນດັບ 8 ຂອງ ສປ.ຈີນ.

ລາຍງານລະບຸວ່າ: ການປູກເຂົ້າໃນທະເລຊາຍດັ່ງກ່າວ ໄດ້ນຳໃຊ້ລົດຈັກປູກເຂົ້າຂະໜາດໃຫຍ່ກວ່າ 10 ຄັນ ທີ່ແລ່ນໄປມາຢ່າງຕໍ່ເນື່ອງໃນທະເລຊາຍຂອງເຂດປົກຄອງຕົນເອງມົງໂກລີໃນ ທາງພາກເໜືອຂອງຈີນ.

ທ່ານ ເວີ່ຍຈື້ເຫິງ ຫົວໜ້າໂຄງການປູກເຂົ້າໄຮ່ໃນທະເລຊາຍອູຫຼັນປູ້ ກ່າວວ່າຖືເປັນຄັ້ງທຳອິດດຂອງການປູກເຂົ້າໄຮ່ໃນທະເລຊາຍອະຫຼັນປູ້ ທີ່ໄດ້ເລີ່ມມາຕັ້ງແຕ່ວັນທີ 26 ພຶດສະພາ ທີ່ຜ່ານມາ, ໂດຍຕົ້ນທຶນຂອງການປູກເຂົ້າປະມານ 2,000​ ຢວນ (ປະມານ 2.5 ລ້ານກີບ) ຕໍ່ໝູ່ (“ໝູ່” ເປັນມາດຕາວັດແທກຂອງຈີນ ປະມານ 0.42 ໄລ່ ຫຼື 666 ຕາລາງແມັດ) ແລະ ຄາດວ່າຈະສາມາດເກັບກ່ຽວຜົນຜະລິດຄຸນນະພາບສູງໄດ້ 450 ກິໂລກຣາມຕໍ່ໝູ່ ໂດຍກຳໄລອາດສູງເຖິງ 10,000 ຢວນ (12.7 ລ້ານກີບ) ເມື່ອອີງຕາມລາຄາຂາຍເຂົ້າຄຸນນະພາບສູງ ທີ່ສູງເຖິງ 30 ຢວນ (38 ພັນກີບ) ຕໍ່ກິໂລກຣາມ.