ຟິລິບປິນ ແລະ ຫວຽດນາມ ສະແດງຄວາມບໍ່ພໍໃຈທີ່ ສປ.ຈີນ ຊ້ອມຮົບໃນທະເລຈີນໃຕ້

ລາຍງານ 5 ກໍລະກົດ 2020, ທ່ານ ເດວຟິນ ລໍເຣນຊານາ ລັດຖະມົນຕີກະຊວງການຕ່າງປະເທດຟິລິບປິນ ກ່າວເຖິງການທີ່ກອງທັບປົດປ່ອຍປະຊາຊົນຈີນ ຊ້ອມຮົບເປັນເວລາ 5 ວັນ ມາຕັ້ງແຕ່ວັນທີ 1 ກໍລະກົດ ທີ່ຜ່ານມາ ນອກຝັ່ງເກາະໄຫຫຼຳ ທີ່ຢູ່ທາງພາກໃຕ້ສຸດຂອງ ສປ.ຈີນ ແຕ່ໃກ້ກັບໝູ່ເກາະພາຣາເຊວ ເຊິ່ງເປັນໜຶ່ງໃນເກາະໃຫຍ່ທີ່ສຸດໃນທະເລຈີນໃຕ້ ວ່າຄືການຍຸແຍ່ ແລະ ເປັນສັນຍານເຕືອນໄພຕໍ່ປະເທດຄູ່ຂັດແຍ່ງ.

ຂະນະທີ່ກະຊວງການຕ່າງປະເທດຫວຽດນາມອອກຖະແຫຼງການ ວ່າການເຄື່ອນໄຫວດັ່ງກ່າວຂອງ ສປ.ຈີນ ມີແຕ່ຈະສົ່ງຜົນກະທົບຕໍ່ສາຍພົວພັນລະຫວ່າງລັດຖະບານຈີນ ກັບອາຊຽນຫຼາຍຍິ່ງຂຶ້ນເທົ່ານັ້ນ ເຊິ່ງລັດຖະບານຫວຽດນາມເອງໃນປີນີ້ກໍ່ເຮັດໜ້າທີ່ເປັນປະທານໝຸນອາຊຽນ.

ເຊິ່ງຫວຽດນາມກໍ່ໄດ້ອ້າງກຳມະສິດເໜືອນ່ານນ້ຳ ແລະ ຜືນດິນບາງສ່ວນບໍລິເວນເກາະພາຣາເຊວ, ສ່ວນຟິລິບປິນມີຂໍ້ຂັດແຍ່ງກັບຈີນຫຼາຍກວ່າໃນບັນຫາໝູ່ເກາະສະແປຣດລີ, ເຖິງຢ່າງໃດກໍ່ຕາມ ລັດຖະບານຈີນປະກາດອານາເຂດຂອງຕົນເອງຄວບຄຸມເອົາອານາເຂດເກືອບທັງໝົດຂອງທະເລຈີນໃຕ້.

ໃນດ້ານຂອງທ່ານ ຈ້າວ ລີຈ້ຽນ ໂຄສົກກະຊວງການຕ່າງປະເທດຈີນ ກ່າວເຖິງພາລະກິດການຊ້ອມຮົບຂອງກອງທັບປົດປ່ອຍປະຊາຊົນຈີນໃນຄັ້ງນີ້ ທີ່ມີການປະກາດລ່ວງໜ້າປະມານ 1 ອາທິດ ວ່າເປັນປະຕິບັດການທີ່ເກີດຂຶ້ນໃນອານາເຂດທາງທະເລ ທີ່ຢູ່ພາຍໃຕ້ອະທິປະໄຕຂອງ ສປ.ຈີນ ແລະ ກ່າວໃນລັກສະນະສຽດສີ ສ.ອາເມຣິກາວ່າ ປະເທດທີ່ຢູ່ນອກພູມມິພາກ ທີ່ເຂົ້າມາເຄື່ອນໄຫວທາງທະຫານໃນບໍລິເວນນີ້ ຖືເປັນກິດຈະກຳທີ່ຊຸ້ມທຳລາຍສະຖຽນລະພາບ ແລະ ຄວາມໝັ້ນຄົງຂອງພູມມິພາກແຫ່ງນີ້.

ເຖິງຢ່າງໃດກໍ່ຕາມ, ກອງທັບເຮືອ ສ.ອາເມຣິກາ ອອກຖະແຫຼງການເມື່ອວັນເສົາທີ່ຜ່ານມາ ວ່າເຮືອບັນທຸກຍົນຮົບພະລັງງານິວເຄຼຍ 2 ລຳຄື: USS Nimits ແລະ USS Ronald Reagan ປະຕິບັດຕາມຫຼັກເສລີພາບດ້ານການລາດຕະເວນ ເພື່ອສະໜັບສະໜູນຄວາມເປັນອິດສະຫຼະເປີດກວ້າງ ຂອງການເດີນເຮືອໃນພູມມິພາກອິນໂດ-ປາຊີຟິກ ແລະ ເນື່ອງໃນໂອກາດວັນຊາດ ສ.ອາເມຣິກາ ຄົບຮອບ 244 ປີ.

HTML tutorial