ລະບາດໜັກສຸດນັບຕັ້ງແຕ່ມີການລະບາດ, WHO ລາຍງານຜູ້ຕິດໂຄວິດ-19 ໃໝ່ 2.1 ແສນຄົນໃນມື້ດຽວ

ລາຍງານ 5 ກໍລະກົດ 2020, ເມື່ອວັນເສົາ (4 ກໍລະກົດ) ທີ່ຜ່ານມາ ອົງການອະນາໄມໂລກ (WHO) ລາຍງານຕົວເລກຜູ້ຕິດເຊື້ອໂຄວິດ-19 ທົ່ວໂລກມີຜູ້ຕິດເຊື້ອໃໝ່ 212,326 ຄົນ ພາຍໃນ 24 ຊົ່ວໂມງທີ່ຜ່ານມາ ເຊິ່ງຖືເປັນສະຖິຕິການເພີ່ມຂຶ້ນຂອງຜູ້ຕິດເຊື້ອທີ່ສູງທີ່ສຸດໃນມື້ດຽວ ນັບຕັ້ງແຕ່ເກີດການແຜ່ລະບາດຂອງພະຍາດໂຄວິດ-19.

ພູມມິພາກທີ່ມີຜູ້ຕິດເພີ່ມຂຶ້ນຫຼາຍທີ່ສຸດເປັນອັນດັບ 1 ຄືພູມມິພາກອາເມຣິກາ ທີ່ມີຜູ້ຕິດເຊື້ອໃໝ່ລວມ 129,772 ຄົນ ໂດຍເກືອບເຄື່ອງໜຶ່ງຂອງຜູ້ຕິດເຊື້ອລາຍໃໝ່ນັ້ນຖືກພົບໃນ ສ.ອາເມຣິກາ ແລະ ເບຼຊິນ ຈຳນວນ 53,213 ຄົນ ແລະ 48,105 ຄົນ ຕາມລຳດັບ.

ສ່ວນພູມມິພາກທີ່ຕາມມາເປັນອັນດັບ 2 ຄືອາຊີໃຕ້-ຕາເວັນອອກ ທີ່ມີຍອດຜູ້ຕິດເຊື້ອລາຍໃໝ່ 27,947 ຄົນ ແລະ ມີຜູ້ເສຍຊີວິດ 534 ຄົນໃນໄລຍະ 24 ຊົ່ວໂມງທີ່ຜ່ານມາ.

ໂດຍຕົວເລກຜູ້ຕິດເຊື້ອໂຄວິດ-19 ຈາກສູນວິທະຍາສາດ ແລະ ວິສະວະກຳລະບົບ (CSSE) ມະຫາວິທະຍາໄລຈອນ ຮັອບກິນ ຫຼ້າສຸດໃນທົ່ວໂລກ ມີຜູ້ຕິດເຊື້ອສະສົມແລ້ວ 11,280,756 ຄົນ ໃນນັ້ນ 5 ອັນດັບທຳອິດປະກອບມີ ສ.ອາເມຣິກາ 2.8 ລ້ານຄົນ, ເບຼຊິນ 1.5 ລ້ານຄົນ, ລັດເຊຍ 6.8 ແສນຄົນ, ອິນເດຍ 6.7 ແສນຄົນ ແລະ ເປຣູ 2.9 ແສນຄົນ.

HTML tutorial