ຫຼາຍປະເທດໃນຕາເວັນຕົກຢຸດຂາຍຜະລິດຕະພັນໝາກພ້າວຈາກປະເທດໄທ ເພາະໃຊ້ແຮງງານລີງ

ລາຍງານ 5 ກໍລະກົດ 2020, ອົງການປົກປ້ອງສັດ ຫຼື PETA (People of the Ethical Treatment of Animals) ທີ່ມີສຳນັກງານໃຫຍ່ລັດເວີຈິເນຍ ສ.ອາເມຣິກາ ລາຍງານວ່າ ມີສູນການຄ້າຫຼາຍແຫ່ງ ລວທັງຮ້ານຂາຍຍ່ອຍ ທີ່ມີສາຂາເປັນຈຳນວນຫຼາຍທັງໃນ ສ.ອາເມຣິກາ, ອັງກິດ ແລະ ໂຮນລັງ ໄດ້ໃຫ້ການຕອບຮັບຢຸດຂາຍກະທິປ໋ອງ ແລະ ຜະລິດຕະພັນຕ່າງໆຈາກໝາກພ້າວ ທີ່ນຳເຂົ້າຈາກປະເທດໄທແລ້ວ ພາຍຫຼັງ PETA ເປີດເຜີຍມີການໃຊ້ແຮງງານລີງຂຶ້ນໝາກພ້າວ ເຊິ່ງຖືເປັນການທໍລະມານສັດໃນອຸດສາຫະກຳແປຮູບໝາກພ້າວທີ່ສົ່ງອອກຈາກປະເທດໄທ.

PETA ລະບຸວ່າ, ຂະນະນີ້ Cost Plus World Market ສູນການຄ້າທີ່ຈຳໜ່າຍສິນຄ້າພິເສດ ແລະ ສິນຄ້ານຳເຂົ້າຈາກຕ່າງປະເທດ ຈະຢຸດຈຳໜ່ວຍກະທິປ໋ອງຈາກໄທ ໃນ 276 ສາຂາທົ່ວ ສ.ອາເມຣິກາ ລວມທັງການຈຳໜ່າຍທາງອອນລາຍ, ນອກຈາກນັ້ນ ສູນການຄ້າ Walgreens Boots Alliance ຕົກລົງຈະບໍ່ນຳເຂົ້າກະທິປ໋ອງ ຫຼື ຈຳໜ່າຍອາຫານທີ່ເຮັດຈາກໝາກພ້າວ ຫຼື ເຄື່ອງດື່ມນ້ຳໝາກພ້າວ ທີ່ເປັນຜະລິດຕະພັນຈາກໄທ ໃນ 9,277 ສາຂາທົ່ວ ສ.ອາເມຣິກາ ເຊັ່ນດຽວກັບຮ້ານ Duane Reade ທີ່ມີ 250 ສາຂາໃນ ສ.ອາເມຣິກາ ກໍ່ຫ້າມກະທິຈາກໄທເຊັ່ນກັນ, ນອກຈາກນີ້ ມີລາຍງານວ່າ ສູນການຄ້າຫຼາຍແຫ່ງໃນອັງກິດໄດ້ນຳຜະລິດຕະພັນໝາກພ້າວຈາກໄທ ອອກຈາກຊັ້ນວາງຜະລິດຕະພັນແລ້ວ.

ໃນດ້ານຂອງກະຊວງການຄ້າຂອງໄທ ໄດ້ສັ່ງການໃຫ້ທູດການຄ້າໃນຕ່າງປະເທດ ສ້າງຄວາມເຂົ້າໃຈກັບບັນດາສູນການຄ້າໃນຕ່າງປະເທດ ວ່າການທີ່ຊາວສວນໝາກພ້າວຂອງໄທເຝິກລີງໃຫ້ຂຶ້ນໝາກພ້າວນັ້ນມັນເປັນວິຖີຊີວິດ ມີການເຝິກຢ່າງດີບໍ່ໄດ້ທໍລະມານສັດ, ພ້ອມທັງຈະມີການເຊີນບັນດາທູດປະເທດຕ່າງໆໄປເບິ່ງວິທີການຂຶ້ນປິດໝາກພ້າວຂອງລີງຕົວຈິງໃນພື້ນທີ່.

ນອກນີ້ PETA ຍັງລະບຸວ່າ: ໄດ້ລົງພື້ນທີ່ກວດສອບໂຮງຮຽນສອນລີງຂຶ້ນປິດໝາກພ້າວ 4 ແຫ່ງ, ຟາມລ້ຽງລີງ 8 ແຫ່ງ ແລະ ການແຂ່ງຂັນລີງຂຶ້ນໝາກພ້າວ 1 ຄັ້ງ ພົບວ່າລີງເຫຼົ່ານັ້ນຖືກບັງຄັບໃຫ້ຂຶ້ນຕົ້ນໝາກພ້າວ, ປິດໝາກພ້າວ ເພື່ອສົ່ງອອກໄປຈຳໜ່າຍທົ່ວໂລກ ແລະ ໃນເວລາດຽວກັນລີງບໍ່ໄດ້ຖືກສະເພາະບັງຄັບໃຫ້ຂຶ້ນປິດໝາກພ້າວ ແຕ່ພວກມັນກັບຖືກລ້ຽງໃນສະພາບທີ່ມີປອກຄໍ, ຖືກລ່າມໂຊ້ໄວ້ກັບຢາງຕີນລົດເກົ່າ ຫຼື ຖືກຂັງຢູ່ໃນກົງທີ່ມາຂະໜາດເກືອບບໍ່ໃຫຍ່ໄປກວ່າໂຕຂອງມັນເລີຍ.

ຖະແຫຼງການຂອງທ່ານ ນາງ ອິງເກິດ ນິວເຄິກ (Ingrid Newkirk) ປະທານອົງການ PETA ກ່າວວ່າ: ສັດທີ່ມີຄວາມຢາກຮູ້ຢາກເຫັນ ມີລະດັບສະຕິປັນຍາສູງເຫຼົ່ານີ້ ບໍ່ໄດ້ຮັບການສົ່ງເສີມດ້ານຈິດໃຈ ແລະ ເສລີພາບ ລວທັງສິ່ງຕ່າງໆທີ່ເຮັດໃຫ້ພວກມັນດຳລົງຊີວິດຢ່າງມີຄຸນຄ່າ ພຽງເພາະພວກມັນສາມາດຖືກນຳມາໃຊ້ຂຶ້ນປິດໝາກພ້າວ, ເຊິ່ງປະທານອົງການ PETA ຍັງເຊື່ອວ່າ ໝາກພ້າວເກືອບທັງໝົດຈາກປະເທດໄທ ຖືກຂຶ້ນປິດດ້ວຍລີງທີ່ຖືກທໍລະມານ ດ້ວຍເຫດນີ້ຈຶ່ງຮຽກຮ້ອງໃຫ້ຜູ້ຄົນທີ່ມີຈິດໃຈເມາດຕາຊື້ຜະລິດຕະພັນໝາກພ້າວຈາກແຫຼ່ງຂຶ້ນ.

HTML tutorial