ທ່ານນາຍົກລັດຖະມົນຕີ ພ້ອມດ້ວຍຄະນະເດີນທາງຢ້ຽມຢາມຫວຽດນາມ ເພື່ອແລກປ່ຽນບົດຮຽນ

ລາຍງານ 5 ກໍລະກົດ 2020, ອີງຕາມຄຳເຊີນຂອງທ່ານ ຫງວຽນຊວັນຟຸກ ນາຍົກລັດຖະມົນຕີຫວຽດນາມ, ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍຄະນະໄດ້ເດີນທາງຢ້ຽມຢາມ ແລະ ປະຕິບັດວຽກງານທີ່ນະຄອນດານັງ ສສ.ຫວຽດນາມ ໃນລະຫວ່າງວັນທີ 5-6 ກໍລະກົດນີ້.

ພາບ: ການພົບປະສອງຝ່າຍ ສປປ.ລາວ ແລະ ສສ.ຫວຽດນາມ

ການຢ້ຽມຢາມໃນຄັ້ງນີ້ ເພື່ອປຶກສາຫາລືກ່ຽວກັບການຮ່ວມມືສອງຝ່າຍ ແລະ ແລກປ່ຽນບົດຮຽນໃນການຟື້ນຟູເສດຖະກິດ ຫຼັງການລະບາດຂອງພະຍາດໂຄວິດ-19 ເພື່ອຊຸກຍູ້ການຄ້າ ແລະ ການລົງທຶນ, ການທ່ອງທ່ຽວ ແລະ ການໄປມາຫາສູ່ລະຫວ່າງປະຊາຊົນສອງຊາດລາວ-ຫວຽດນາມ ແນ່ໃສ່ເພື່ອຊຸກຍູ້ສົ່ງເສີມສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງຊາດລາວ-ຫວຽດນາມໃຫ້ແໜ້ນແຟ້ນຍິ່ງຂຶ້ນ.

ທ່ານ ຫງວຽນຊວັນຟຸກ ກ່າວຊົມເຊີຍຕໍ່ຜົນສຳເລັດຂອງ ສປປ.ລາວ ທີ່ສາມາດຄວບຄຸມ ແລະ ເອົາຊະນະການແຜ່ລະບາດຂອງພະຍາດໂຄວິດ-19 ໄດ້, ໃນດ້ານຂອງທ່ານ ທອງລຸນ ສີສຸລິດ ກໍ່ໄດ້ສະແດງຄວາມຊົມເຊີຍຫວຽດນາມ ທີ່ສາມາດຄວບຄຸມການແຜ່ລະບາດຂອງໂຄວິດ-19 ໄດ້ເປັນຢ່າງດີ ພ້ອມທັງຂອບອົກຂອບໃຈຫວຽດນາມ ທີ່ສະໜັບສະໜູນອຸປະກອນການແພດ ແລະ ສົ່ງຜູ້ຊ່ຽວຊານການແພດເພື່ອຊ່ວຍເຫຼືອ ສປປ.ລາວ.

ເຊິ່ງໃນວັນທີ 6 ກໍລະກົດນີ້ ຄະນະຜູ້ແທນລະດັບສູງຂອງ ສປປ.ລາວ ຈະຢ້ຽມຊົມສະຖານປະກອບການການຜະລິດ ແລະ ການບໍລິການຫຼາຍແຫ່ງ ເພື່ອເກັບກ່ຽວປະສົບການຂອງຫວຽດນາມໃນການຜະລິດ ແລະ ຟື້ນຟູການທ່ອງທ່ຽວຫຼັງການແຜ່ລະບາດຂອງພະຍາດໂຄວິດ-19.

HTML tutorial