ຈີນເຝົ້າລະວັງ ແລະ ປະກາດເຕືອນໄພການແຜ່ລະບາດຂອງກາລະໂລກຕ່ອມນ້ຳເຫຼືອງ ໃນມົງໂກລີໃນ

ລາຍງານ 6 ກໍລະກົດ 2020, ຄະນະກຳມາທິການສາທາລະນະສຸກປະຈຳເມືອງບາຢັນ ນູ ໃນເຂດປົກຄອງຕົນເອງມົງໂກລີໃນ ຕັ້ງຢູ່ທາງພາກເໜືອຂອງ ສປ.ຈີນ ປະກາດເຕືອນໄພດ້ານສາທາລະນະສຸກລະດັບ 3 ຖືເປັນຂັ້ນຮອງຂັ້ນສຸດທ້າຍຈາກທັງໝົດ 4 ຂັ້ນ ເຕືອນໄພເລື່ອງກາລະໂລກຕ່ອມນ້ຳເຫຼືອງ (Bubonic plague) ເຊິ່ງເປັນປະເພດຂອງກາລະໂລກທີ່ພົບໄດ້ເປັນປະຈຳ.

ຄຳສັ່ງດັ່ງກ່າວຄວບຄຸມການຫ້າມລ່າ ແລະ ກິນຊີ້ນສັດທີ່ຕ້ອງສົງໄສເປັນພາຫະນຳໂລກດັ່ງກ່າວ ເຊິ່ງສ່ວນໃຫຍ່ເປັນສັດຊະນິດແຂ້ວແຫ້ນ ແລະ ຂໍໃຫ້ປະຊາຊົນທີ່ມີອາການໄຂ້ ຫຼື ພົບເຫັນຜູ້ທີ່ມີອາການໄຂ້ໂດຍບໍ່ຮູ້ສາເຫດໃຫ້ຮີບລາຍງານຕໍ່ເຈົ້າໜ້າທີ່ສາທາລະນະສຸກປະຈຳຊຸມຊົນທັນທີ, ເຊິ່ງນັບຕັ້ງແຕ່ເດືອນພະຈິກ ປີທີ່ຜ່ານມາ ທາງການເຂດປົກຄອງຕົນເອງມົງໂກລີໃນລາຍງານການພົບຜູ້ຕິດເຊື້ອກາລະໂລກຢ່າງ 4 ຄົນ ໂດຍ 2 ຄົນມີອາການຂອງກາລະໂລກປອດ.

ກາລະໂລກເປັນໂລກຕິດເຊື້ອແບັດທີເຣຍທີ່ແຜ່ຈາກສັດສູ່ຄົນ ຜ່ານລະອອງຝອຍຂະໜາດນ້ອຍເຊັ່ນ: ລະອອງຂີ້ກະເທີ, ການສຳຜັດໂດຍກົງກັບພາຫະນຳໂລກທີ່ສ່ວນໃຫຍ່ຄື: ໜູ, ກະຮອກ ແລະ ບັນດາສັດແຂ້ວແຫ້ນອີກຫຼາຍຊະນິດ ເຊິ່ງເຊື້ອໂລກຈະເດີນທາງຜ່ານໝັດຂອງສັດເຫຼົ່ານັ້ນ ແລະ ການກິນອາຫານ ຫຼື ນຳສິ່ງທີ່ປົນເປື້ອນເຊື້ອຊະນິດນີ້ເຂົ້າສູ່ຮ່າງກາຍ, ກາລະໂລກສາມາດເກີດຂຶ້ນໄດ້ກັບມະນຸດທຸກເພດ ແລະ ທຸກໄວ.

ເຊິ່ງອົງການອະນາໄມໂລກ (WHO) ກຳນົດໃຫ້ກາລະໂລກ ເປັນໂລກຕິດຕໍ່ອັນຕະລາຍ ຫາກພົບຜູ້ຕິດເຊື້ອ ຫຼື ຜູ້ຕ້ອງສົງໄສຕ້ອງລາຍງານຕໍ່ໜ່ວຍງານທີ່ກ່ຽວຂ້ອງພາຍໃນປະເທດໂດຍໄວທີ່ສຸດ ແລະ ແຈ້ງໃຫ້ WHO ຮັບຊາບ, ປັດຈຸບັນຍັງບໍ່ມີວັກແຊັງປ້ອງກັນກາລະໂລກທີ່ມີປະສິດທິພາບ ການໃຫ້ຜູ້ຕິດເຊື້ອໄດ້ຮັບການປິ່ນປົວຢ່າງທັນທ່ວງທີ່ຈຶ່ງເປັນສິ່ງທີ່ສຳຄັນທີ່ສຸດ.

HTML tutorial