ສະພາ ສ.ອາເມຣິກາ ອະນຸມັດງົບ 37.5 ລ້ານໂດລາ ຊ່ວຍເຫຼືອ ສປປ.ລາວ ເກັບກູ້ລະເບີດ ໃນປີ 2020

ລາຍງານ 6 ກໍລະກົດ 2020, ອີງຕາມການລາຍງານຂອງສຳນັກຂ່າວສານປະເທດລາວ (KPL), ລັດຖະສະພາ ສ.ອາເມຣິກາ ໄດ້ອະນຸມັດເງິນຈຳນວນ 37.5 ລ້ານໂດລາສະຫະລັດ ເພື່ອຊ່ວຍເຫຼືອວຽກງານເກັບກູ້ລະເບີດບໍ່ທັນແຕກ ທີ່ຕົກຄ້າງແຕ່ປາງສົງຄາມຢູ່ ສປປ.ລາວ ໃນປີ 2020.

ທ່ານ ປີເຕີ ເຮມອນ ເອກອັກຄະລັດຖະທູດ ສ.ອາເມຣິກາ ປະຈຳ ສປປ.ລາວ ໄດ້ລາຍງານເມື່ອບໍ່ດົນມານີ້ ໂດຍໄດ້ກ່າວວ່າ ສ.ອາເມຣິກາ ໃຫ້ຄວາມສຳຄັນຕໍ່ວຽກງານເກັບກູ້ລະເບີດບໍ່ທັນແຕກໃນລາວ ເພື່ອຊ່ວຍເຫຼືອ ສປປ.ລາວ ໃຫ້ບັນລຸເປົ້າໝາຍຄວາມປອດໄພ ຈາກລະເບີດດັ່ງກ່າວຮອດປີ 2030 ແລະ ຜ່ານມາ ການຊ່ວຍເຫຼືອວຽກງານນີ້ ມີລັກສະນະເພີ່ມຂຶ້ນທຸກປີ ແລະ ໃນໂອກາດທີ່ທ່ານ ບາຣັກ ໂອບາມາ ອະດີດປະທານປະເທດ ສ.ອາເມຣິກາ ໄດ້ມາຢ້ຽມຢາມ ສປປ.ລາວ ຢ່າງເປັນທາງການເມື່ອປີ 2016 ຜ່ານມານັ້ນ ກໍ່ໄດ້ປະກາດຊ່ວຍເຫຼືອວຽກງານເກັບກູ້ລະເບີດຢູ່ລາວ ຈຳນວນ 90 ລ້ານໂດລາສະຫະລັດໃນໄລຍະ 3 ປີ (2016-2019) ແລະ ໃນໄລຍະລັດຖະບານພາຍໃຕ້ການນຳຂອງທ່ານ ໂດໂນ ທຣຳ ກໍ່ໄດ້ສືບຕໍ່ໃຫ້ເງິນຈຳນວນ 35 ລ້ານໂດລາສະຫະລັດ ຊ່ວຍເຫຼືອວຽກງານເກັບກູ້ລະເບີດບໍ່ທັນແຕກໃນລາວ.

ຕາມການລາຍງານຂອງອົງການ ເລກາຊີ ອັອບ ວໍ (Legacy of War) ແມ່ນລັດຖະສະພາ ສ.ອາເມຣິກາ ໄດ້ອະນຸມັດເງິນຈຳນວນ 37.5 ລ້ານໂດລາສະຫະລັດ ສຳລັບການຊ່ວຍເຫຼືອກວດກູລະເບີດບໍ່ທັນແຕກໃນປີ 2020 ແລະ ຈະເລີ່ມຈັດຕັ້ງປະຕິບັດໃນປີ 2021.

ນັບແຕ່ປີ 1996-2019 ສ.ອາເມຣິກາ ໄດ້ປະກອບທຶນສະໜັບສະໜູນເຂົ້າໃນວຽກງານແກ້ໄຂບັນຫາລະເບີດບໍ່ທັນແຕກຢູ່ ສປປ.ລາວ ໃນຮູບແບບການຮ່ວມມືສອງຝ່າຍ ລວມມີມູນຄ່າຫຼາຍກວ່າ 140 ລ້ານໂດລາສະຫະລັດ ຖືເປັນປະເທດຫຼັກໃນການສະໜັບສະໜູນວຽກງານດັ່ງກ່າວຢູ່ລາວ, ການຊ່ວຍເຫຼືອຂອງ ສ.ອາເມຣິກາ ແມ່ນຜ່ານອົງການຈັດຕັ້ງສາກົນ ທີ່ບໍ່ສັງກັດລັດຖະບານ ແລະ ສະໜັບສະໜູນຄະນະກຳມະການແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ລາວ (ຄຊກລ) ແລະ ໂຄງການເກັບກູ້ລະເບີດແຫ່ງຊາດ (ຄກລ) ໂດຍມີບໍລິສັດຂອງເອກະຊົນອາເມຣິກາຕິດຕາມການຈັດຕັ້ງປະຕິບັດ ແລະ ບໍລິການຈັດການທຶນ.

ສປປ.ລາວ ຖືເປັນປະເທດທີ່ມີລະເບີດບໍ່ທັນແຕກຫຼາຍທີ່ສຸດໃນໂລກ ຈາກການປະເມີນລະເບີດທີ່ ສ.ອາເມຣິກາ ນຳມາຖິ້ມໃສ່ ສປປ.ລາວ ໜັກເຖິງ 3 ລ້ານໂຕນ, ມີຫຼາຍກວ່າ 270 ລ້ານລູກ ທີ່ຖີ້ມລົງໃສ່ທຸກໆ 8 ນາທີ ຕະຫຼອດ 24 ຊົ່ວໂມງ ເປັນເວລາ 9 ປີ ແຕ່ປີ 1964-1973.

HTML tutorial