ຍີ່ປຸ່ນປະສົບໄພນ້ຳຖ້ວມໃຫຍ່ ແລະ ດິນເຈື່ອນ, ນາຍົກທອງລຸນ ສົ່ງສານສະແດງຄວາມເສຍໃຈ

ລາຍງານ 7 ກໍລະກົດ 2020, ທ່ານ ໂຢຊິຮິເດະ ຊຶກະ ເລຂາທິການຄະນະລັດຖະມົນຕີຍີ່ປຸ່ນ ຖະແຫຼງກ່ຽວກັບສະຖານະການໄພນ້ຳຖ້ວມໃນພາກຕາເວັນຕົກ ແລະ ພາກໃຕ້ຂອງປະເທດ ໃນອາທິດທີ່ຜ່ານມາ, ເຊິ່ງພື້ນທີ່ໄດ້ຮັບຜົນກະທົບຫຼາຍທີ່ສຸດຄືແຂວງຄຸມາໂມໂຕະ ໃນເກາະຄິວຊູ ວ່າມີຈຳນວນຜູ້ເສຍຊີວິດຢ່າງເປັນທາງການແລ້ວ 52 ຄົນ ແຕ່ຍັງມີລາຍງານຜູ້ສູນຫາຍອີກກວ່າ 10 ຄົນ ເຊິ່ງເຈົ້າໜ້າທີ່ກຳລັງເລັ່ງຄົ້ນຫາຢ່າງສຸດຄວາມສາມາດຕະຫຼອດ 24 ຊົ່ວໂມງ.

ເຖິງຢ່າງໃດກໍ່ຕາມ, ສຳນັກງານອຸຕຸນິຍົມວິທະຍາຍີ່ປຸ່ນ ອອກປະກາດເຕືອນໄພທົ່ວປະເທດ ກຳລັງມີຄວາມສ່ຽງເພີ່ມຂຶ້ນຈາກພາຍຸຝົນ ທີ່ຈະເກີດຂຶ້ນອີກໃນອາທິດນີ້ ເຊິ່ງອາດເຮັດໃຫ້ເກີດນ້ຳຖ້ວມກະທັນຫັນ ແລະ ດິນຊຸເຈື່ອນ ປະຊາຊົນຄວນມີສະຕິລະວັງຕົວ ແລະ ຕິດຕາມລະວັງໄພໃຫ້ດີ ໂດຍສະເພາະຜູ້ທີ່ອາໄສຢູ່ໃນແຂວງຄຸມາໂມໂຕະ, ໂອອິຕະ ແລະ ຄາໂຊຊິມະ, ໃນດ້ານກອງກຳລັງປ້ອງກັນຕົນເອງຍີ່ປຸ່ນ ໄດ້ສົ່ງທະຫານລົງພື້ນທີ່ຊ່ວຍເຫຼືອປະຊາຊົນຢ່າງຕໍ່ເນື່ອງ.

ໃນດ້ານຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ສົ່ງສານສະແດງຄວາມເສົ້າສະຫຼົດໃຈ ຕໍ່ເຫດການດິນເຈື່ອນ ແລະ ນ້ຳຖ້ວມຢູ່ຍີ່ປຸ່ນ ເຖິງທ່ານ ຊິນໂຊ ອາເບະ ນາຍົກລັດຖະມົນຕີຍີ່ປຸ່ນ ມີເນື້ອໃນສຳຄັນວ່າ: ຂ້າພະເຈົ້າມີຄວາມສະຫຼົດໃຈທີ່ໄດ້ຮັບຊາບຂ່າວເຫດການດິນເຈື່ອນ ແລະ ນ້ຳຖ້ວມຢູ່ພາກຕາເວັນຕົກສ່ຽງໃຕ້ ປະເທດຍີ່ປຸ່ນ ຍ້ອນຝົນຕົກໜັກຢ່າງຕໍ່ເນື່ອງນັບແຕ່ວັນທີ 4 ກໍລະກົດ 2020 ເປັນຕົ້ນມາ ເຊິ່ງໄດ້ສ້າງຄວາມເສຍຫາຍທາງດ້ານຊີວິດ ແລະ ຊັບສິນຂອງປະຊາຊົນຢູ່ເຂດດັ່ງກ່າວຢ່າງໜັກໜ່ວງ.

ຂ້າພະເຈົ້າໃນນາມສ່ວນຕົວ ກໍ່ຄືລັດຖະບານ ແລະ ປະຊາຊົນ ສປປ.ລາວ ສະແດງຄວາມເຫັນໃຈ ແລະ ຂໍແບ່ງເບົາຄວາມທຸກໂສກມາຍັງທ່ານ ແລະ ໂດຍຜ່ານທ່ານໄປຍັງລັດຖະບານ ກໍ່ຄືປະຊາຊົນຍີ່ປຸ່ນ ໂດຍສະເພາະຕໍ່ຄອບຄົວຂອງຜູ້ຖືກເຄາະຮ້າຍ ຈາກເຫດການໄພພິບັດທາງທຳມະຊາດຄັ້ງນີ້.

HTML tutorial