ທາງການໄທກ່າວວ່າ ສປປ.ລາວ ຄືຊ່ອງທາງຫຼັກຂອງຂະບວນການຄ້າຢາເສບຕິດເຂົ້າສູ່ໄທ

ລາຍງານ 7 ກໍລະກົດ 2020, ທ່ານ ນິຍົມ ເຕີມສຣີສຸກ ເລຂາທິການຄະນະກຳມະການປ້ອງກັນ ແລະ ປາບປາມຢາເສບຕິດຂອງປະເທດໄທ (ONCB) ເປີດເຜີຍເມື່ອວັນຈັນ (6 ກໍລະກົດ) ທີ່ຜ່ານມາວ່າ: ທາງການມຽນມາໄດ້ເປີດປະຕິບັດການປາບປາມແຫຼ່ງຜະລິດ ແລະ ແຫຼ່ງເກັບມ້ຽນຢາເສບຕິດໃນລັດສານຢ່າງໜັກ ແລະ ຕໍ່ເນື່ອງ, ໃນຂະນະທີ່ກອງກຳລັງປ້ອງກັນຊາຍແດນຂອງໄທ ກໍ່ໄດ້ເພີ່ມຄວາມເຂັ້ມງວດໃນການລາດຕະເວນ ເພື່ອສະກັດກັ້ນຕາມແນວຊາຍແດນເຮັດໃຫ້ເປັນອຸປະສັກຕໍ່ການລຳລຽງຢາເສບຕິດເຂົ້າມາທາງຊາຍແດນພາກເໜືອຂອງໄທ, ຂະນະການຄ້າຢາເສບຕິດຈຶ່ງໄດ້ກັບມາໃຊ້ຊາຍແດນທາງພາກຕາເວັນອອກສຽງເໜືອຂອງໄທ ກົງກັນຂ້າມກັບ ສປປ.ລາວ ເປັນຊ່ອງທາງລັກລອບລຳລຽງຢາເສບຕິດທັງຢາບ້າ, ຢາໄອ ແລະ ກັນຊາເຂົ້າໄທເພີ່ມຂຶ້ນ.

ເລຂາທິການ ONCB ກ່າວວ່າ: ໃນໄລຍະຜ່ານມາຂະບວນການຄ້າຢາເສບຕິດໄດ້ຫັນກັບໄປໃຊ້ຊ່ອງທາງຕາມເຂດຊາຍແດນພາກຕາເວັນອອກສຽງເໜືອຕັ້ງແຕ່ຈັງຫວັດເລີຍ ເຖິງ ຈັງຫວັດອຸບົນ ລັກລອບນຳຢາເສບຕິດຈາກ ສປປ.ລາວ ຂ້າມໄປຍັງຝັ່ງໄທ ໂດຍພົບຄວາມຖີ່ໃນການລັກລອບນຳເຂົ້າຫຼາຍທີ່ສຸດຢູ່ຈັງຫວັດໜອງຄາຍ, ມຸກດາຫານ, ບຶງການ ແລະ ນະຄອນພະຍົມ ແລະ ຈຳນວຍຢາເສບຕິດທີ່ລັກລອບນຳເຂົ້າຫຼາຍທີ່ສຸດແມ່ນຢູ່ຈັງຫວັດໜອງດາຍ, ນະຄອນພະຍົມ, ມຸກດາຫານ ແລະ ອຸມົນຣາຊະທານີ ເຊິ່ງຕະຫຼອດໄລຍະ 9 ເດືອນຜ່ານມາ (ຕຸລາ 2019-ມິຖຸນາ 2020) ຈາກການປະຕິບັດການຂອງກຳລັງປ້ອງກັນຊາຍແດນຂອງໄທ ພົບການລັກລອບນຳເຂົ້າຢາເສບຕິດໃນພື້ນທີ່ 7 ຈັງຫວັດຊາຍແດນຕິດແມ່ນ້ຳຂອງປະກອບມີ ຢາບ້າ 10,000 ເມັດຂຶ້ນໄປ, ໄອ 1 ກິໂລກຣາມຂຶ້ນໄປ ແລະ ກັນຍາ 100 ກິໂລກຣາມຂຶ້ນ ລວມ 104 ຄັ້ງ ຢຶດຢາບ້າໄດ້ລວມ 22.19 ລ້ານເມັດ, ໄອລວມ 638.5 ກິໂລກຣາມ ແລະ ກັນຊາ 6,240 ກິໂລກຣາມ.

ເລຂາທິການ ONCB ກ່າວອີກວ່າ: ທາງການໄທໄດ້ປະສານຂໍຄວາມຮ່ວມມືກັບລັດຖະບານ ສປປ.ລາວ ແລະ ໄດ້ນຳໄປສູ່ການເພີ່ມບົດບາດກອງທັບທັງສອງປະເທດ ໃຫ້ເຂົ້າມາມີສ່ວນຮ່ວມກັນແກ້ໄຂບັນຫາຢາເສບຕິດຕາມເຂດຊາຍແດນ ໂດຍກອງບັນຊາການກອງທັບໄທ ໄດ້ຈັດຕັ້ງຄະນະປະຕິບັດງານ ເພື່ອແກ້ໄຂບັນຍາຢາເສບຕິດຕາມເຂດຊາຍແດນລາວ-ໄທ ຂຶ້ນ ພ້ອມຈັດຕັ້ງຄະນະປະຕິບັດງານຊາຍແດນ 12 ຊຸດ ມີພາລະກິດປະສານງານປາບປາມຢາເສບຕິດໂດຍສະເພາະ ໂດຍດຳເນີນການຄູ່ຂະໜານກັນລະຫວ່າງຈັງຫວັດຂອງໄທ ກັບ ແຂວງຫຼືເມືອງຂອງ ສປປ.ລາວ ຖືເປັນຊ່ອງທາງສຳຄັນທີ່ຈະເຮັດໃຫ້ມີການປະສານງານຂອງທັງສອງປະເທດມີຄວາມຄ່ອງຕົວ ແລະ ວ່ອງໄວຍິ່ງຂຶ້ນ.

HTML tutorial