ປະທານປະເທດບຣາຊິນຕິດໂຄວິດ-19 ຍ້ອນຖືເບົາ ແລະ ຂັດຄ້ານຕໍ່ມາດຕະການປ້ອງກັນ

ລາຍງານ 8 ກໍລະກົດ 2020, ທ່ານ ຊາອີ ໂບໂຊນາໂຣ ປະທານປະເທດບຣາຊິນ ເປີດເຜີຍໃນລະຫວ່າງການໃຫ້ສຳພາດພິທີກອນສະຖານນີໂທລະພາບ TV Brazil ຂອງທາງການວ່າ ຕົນເລີ່ມຮູ້ສຶກບໍ່ສະບາຍເມື່ອວັນອາທິດ (5 ກໍລະກົດ) ຈຶ່ງກິນຢາໄຮດຼັອກຊີຄໍໂຣຄວິນ ເຊິ່ງເປັນຢາຕ້ານມາລາເຣຍ ທີ່ຖືກນຳມາໃຊ້ປິ່ນປົວຜູ້ຕິດເຊື້ອໂຄວິດ-19 ແລະ ຕໍ່ມາໃນວັນຈັນ ໄດ້ໄປກວດ ຜົນປາກົດວ່າເປັນບວກ ຕິດເຊື້ອໂຄວິດ-19.

ກ່ອນໜ້ານີ້ທ່ານ ຊາອີ ໂບໂຊນາໂຣ ນັກການເມືອງຝ່າຍຂວາແນວຄິດປະຊານິຍົມ ຖືກວິຈານຢ່າງໜັກໜ່ວງຈາກຫຼາຍຝ່າຍ ຈາກການສະແດງທ່າທີຝ່າຝືນມາດຕະການເຂັ້ມງວດຕໍ່ຕ້ານເຊື້ອໂຄວິດ-19 ລວມເຖິງການບໍ່ໃສ່ຜ້າອັດປາກອະນາໄມໃນທີ່ສາທາລະນະ ເຖິງແມ່ນວ່າຈະຖືກສານສັ່ງກໍ່ຍັງບໍ່ຍອມໃສ່ ເມື່ອເດືອນມິຖຸນາ ທີ່ຜ່ານມາ, ນອກຈາກນັ້ນທ່ານ ຊາອີ ໂບໂຊນາໂຣ ຍັງຕໍ່ຕ້ານກົດການຮັກສາໄລຍະຫ່າງທາງສັງຄົມ ທີ່ໄດ້ຮັບການສະໜັບສະໜູນຈາກອົງການອະນາໄມໂລກ.

ໃນທ້າຍອາທິດທີ່ຜ່ານມາ ທ່ານ ຊາອີ ໂບໂຊນາໂຣ ໄດ້ເຂົ້າຮ່ວມງານສັງຄົມ ແລະ ພິທີການຫຼາຍງານ ລວມເຖິງການຕິດຕໍ່ໃກ້ຊິດກັບທ່ານ ທັອດ ແຊັບແມນ ເອກອັກຄະລັດຖະທູດ ສ.ອາເມຣິກາ ປະຈຳບຣາຊິນ ໃນລະຫວ່າງງານລ້ຽງສະຫຼອງວັນຊາດ ສ.ອາເມຣິກາ 4 ກໍລະກົດ ຈາກພາບຖ່າຍທີ່ປາກົດໃນສື່ຕ່າງໆ ສະແດງໃຫ້ເຫັນວ່າທັງທ່ານ ຊາອີ ໂບໂຊນາໂຣ ແລະ ທູດ ສ.ອາເມຣິກາ ຕ່າງກໍ່ບໍ່ໃສ່ຜ້າອັດປາກອະນາໄມ.

ນອກຈາກນີ້, ກະຊວງສາທາລະນະສຸກຂອງບຣາຊິນ ຍັງອອກລາຍງານສະຖິຕິຜູ້ຕິດເຊື້ອໂຄວິດ-19 ຂອງປະເທດໃນຮອບ 24 ຊົ່ວໂມງທີ່ຜ່ານມາ ວ່າມີຜູ້ຕິດເຊື້ອລາຍໃໝ່ 45,305 ຄົນ ເພີ່ມຈຳນວນຜູ້ຕິດເຊື້ອສະສົມເປັນ 1,668,589 ຄົນ, ຜູ້ເສຍຊີວິດ 66,741 ຄົນ ເພີ່ມຂຶ້ນ 1,254 ຄົນ.

HTML tutorial