ສ.ອາເມຣິກາ ຍື່ນໜັງສືລາອອກຈາກອົງການອະນາໄມໂລກຢ່າງເປັນທາງການ

ລາຍງານ 8 ກໍລະກົດ 2020, ກະຊວງການຕ່າງປະເທດ ສ.ອາເມຣິກາ ອອກຖະແຫຼງການເມື່ອວັນອັງຄານ (7 ກໍລະກົດ) ທີ່ຜ່ານມາ ວ່າທ່ານ ໂດໂນ ທຣຳ ປະທານປະເທດ ສ.ອາເມຣິກາ ໄດ້ລົງນາມໃນໜັງສືທີ່ສົ່ງເຖິງທ່ານ ອັນໂຕນິໂອ ກູເຕເຣສ ເລຂາທິການສະຫະປະຊາຊາດ (UN) ແຈ້ງການນຳ ສ.ອາເມຣິກາ “ລາອອກ” ຈາກການເປັນສະມາຊິກຂອງອົງການອະນາໄມໂລກ (WHO) ໂດຍຈະມີຜົນຢ່າງເປັນທາງການໃນອີກ 1 ປີຕໍ່ຈາກນີ້ ຄືວັນທີ 6 ກໍລະກົດ 2021, ເຖິງຢ່າງໃດກໍ່ຕາມ ໃນລະຫວ່າງນີ້ລັດຖະບານ ສ.ອາເມຣິກາຈະຍັງເດີນໜ້າກົດດັນໃຫ້ມີການປະຕິຮູບ WHO ຢ່າງມີປະສິດທິພາບ.

ຂະນະທີ່ຜູ້ນຳ ສ.ອາເມຣິກາຢືນຢັນການຕັດສິນໃຈດັ່ງກ່າວ ວ່າເປັນໄປຢ່າງລະອຽດຮອບຄອບ ແລະ ຕອນນີ້ຕົນບໍ່ມີຄວາມເຊື່ອໝັ້ນວ່າ WHO ຈະສາມາດປ່ຽນແປງຕົນເອງໃຫ້ດີຂຶ້ນໄດ້, ໃນດ້ານຂອງສຳນັກງານເລຂາທິການ WHO ຢືນຢັນການໄດ້ຮັບຈົດໝາຍລາອອກຈາກລັດຖະບານ ສ.ອາເມຣິກາ ແລະ ນຳເຂົ້າສູ່ຂະບວນການພິຈາລະນາ ເພື່ອໃຫ້ຂະບວນການສິ້ນສຸດສະຖານະພາບສະມາຊິກເປັນໄປຕາມຂະບວນການ ແລະ ເງື່ອນໄຂ ທີ່ໜຶ່ງໃນນັ້ນ ສ.ອາເມຣິກາຕ້ອງແກ້ໄຂຂໍ້ກຳນົດດ້ານການເງິນໃຫ້ສຳເລັດ.

ປັດຈຸບັນ ສ.ອາເມຣິກາເປັນປະເທດຜູ້ບໍລິຈາກລາຍໃຫຍ່ທີ່ສຸດຂອງ WHO ດ້ວຍງົບປະມານສະເລ່ຍປີລະກວ່າ 450 ລ້ານໂດລາສະຫະລັດ ແຕ່ໃນໄລຍະຫຼັງມານີ້ມີການຄ້າງຊຳລະຢູ່ອີກປະມານ 200 ລ້ານໂດລາສະຫະລັດ.

ເຊິ່ງທ່ານ ໂດໂນ ທຣຳ ສົ່ງໜັງສືເຖິງທ່ານ ເທດຼອສ ແອດນາຮອມ ເກເບຼເຢຊຸສ ຜູ້ອຳນວຍການ WHO ເມື່ອວັນທີ 18 ພຶດສະພາ ທີ່ຜ່ານມາ ໂດຍເນື້ອໃນສ່ວນໃຫຍ່ເປັນການບັນຍາຍເຖິງຄວາມຫຼົ່ມແຫຼວຂອງ WHO ໃນການແກ້ໄຂວິກິດດ້ານສາທາລະນະສຸກລະຫວ່າງປະເທດ ຈາກການແຜ່ລະບາດຂອງພະຍາດໂຄວິດ-19 ແລະ ການຮ່ວມມືກັບຈີນ ທີ່ໃກ້ຊິດຈົນເກີນໄປ ຕາມດ້ວຍການປະກາດຕຽມລາອອກ ໃນທ້າຍເດືອນດຽວກັນ.

ໃນອີກດ້ານໜຶ່ງ ສະມາຊິກລະດັບສູງຂອງພັກເດໂມແຄຼດ ແລະ ພັບຣີພັບລິກັນພາກັນວິພາກວິຈານການເຄື່ອນໄຫວດັ່ງກ່າວຂອງທຳນຽມຂາວ, ທ່ານ ນາງ ແນນຊີ ເປໂລຊີ ປະທານສະພາຜູ້ແທນປະຊາຊົນ (ສະພາລ່າງ) ຈາກພັກເດໂມແຄຼດ ກ່າວວ່າເປັນການດຳເນີນນະໂຍບາຍທີ່ບໍ່ສົມຄວນຢ່າງຍິ່ງ ທ່າມກາງວິກິດໂລກລະບາດທີ່ຕ້ອງການການຮ່ວມມືຈາກທຸກພາກສ່ວນ ທັງໃນ ແລະ ຕ່າງປະເທດ ແຕ່ຜູ້ນຳ ສ.ອາເມຣິກາ ຜັດຕັດຂາດຈາກອົງກອນທີ່ເປັນແກນກາງ.

ໃນດ້ານຂອງທ່ານ ລາມາ ອະເລັກຊານເດີ ສະມາຊິກລັດຖະສະພາ (ສະພາສູງ) ລັດເທນເນສຊີສັງກັດພັກຣີພັບລິກັນ ແລະ ປະທານຄະນະກຳມາທິການສາທາລະນະສຸກຂອງລັດຖະສະພາ ສ.ອາເມຣິກາ ກ່າວວ່າ ຈິງຢູ່ທີ່ WHO ຕ້ອງປະຕິຮູບຄັ້ງໃຫຍ່ ແຕ່ຄວນຖ້າໃຫ້ຜ່ານພົ້ນວິກິດຄັ້ງນີ້ໄປກ່ອນ.

ສ່ວນທ່ານ ໂຈ ໄບເດນ ອະດີດຮອງປະທານປະເທດ ສ.ອາເມຣິກາ ແລະ ວ່າທີ່ຕົວແທນພັກເດໂມແຄຼດໃນການຊິງຕຳແໜ່ງປະທານປະເທດ ສ.ອາເມຣິກາ ກັບທ່ານ ໂດໂນ ທຣຳ ໃນການເລືອກຕັ້ງເດືອນພະຈິກ ທີ່ຈະມາເຖິງນີ້ ກ່າວວ່າ ໃນມື້ທຳອິດຂອງການດຳລົງຕຳແໜ່ງປະທານປະເທດ ຕົນຈະດຳເນີນການນຳ ສ.ອາເມຣິກາກັບເຂົ້າເປັນສະມາຊິກ WHO ເພື່ອຮັກສາບົດບາດຂອງ ສ.ອາເມຣິກາໃນເວທີສາກົນ.