ຈີນປະຕິເສດເຂົ້າຮ່ວມຂໍ້ຕົກລົງນິວເຄຼຍສາມຝ່າຍກັບ ສ.ອາເມຣິກາ ແລະ ລັດເຊຍ

ລາຍງານ 11 ກໍລະກົດ 2020, ທ່ານ ຈ້າວ ລີຈ້ຽນ ໂຄສົກກະຊວງການຕ່າງປະເທດຂອງຈີນ ກ່າວໃນຕອນໜຶ່ງຂອງການຖະແຫຼງເມື່ອວັນສຸກ (10 ກໍລະກົດ) ທີ່ຜ່ານມາ ວ່າລັດຖະບານຈີນມີຈຸດຢືນຊັດເຈນ ກ່ຽວກັບບັນຫາຂໍ້ຕົກລົງນິວເຄຼຍສາມຝ່າຍລະຫວ່າງ ສ.ອາເມຣິກາ, ລັດເຊຍ ແລະ ຈີນ, ເຖິງຢ່າງໃດກໍ່ຕາມ ລັດຖະບານ ສ.ອາເມຣິກາບໍ່ພຽງແຕ່ບໍ່ຢຸດກໍ່ກວນຈີນ ຍັງບິດເບືອນຈຸດຢືນຂອງລັດຖະບານຈີນ.

ໂຄສົກກະຊວງການຕ່າງປະເທດຈີນກ່າວວ່າ ຂໍ້ສະເໜີຂອງ ສ.ອາເມຣິກາ ກ່ຽວກັບການເຈລະຈາບັນຫານິວເຄຼຍສາມຝ່າຍ ໂດຍໃຫ້ມີລັດເຊຍເຂົ້າຮ່ວມນຳ ບໍ່ໄດ້ຕັ້ງຢູ່ບົນພື້ນຖານຂອງຄວາມຈິງຈັງ ແລະ ຈິງໃຈ, ເຊິ່ງຈີນຕີລາຄ່າວ່າລັດຖະບານ ສ.ອາເມຣິກາຄວນເຫັນດີກັບຂໍ້ສະເໜີຂອງລັດເຊຍທີ່ປະກາດຕັ້ງແຕ່ຕົ້ນ ວ່າ ສ.ອາເມຣິກາຄວນຕໍ່ອາຍຸສົນທິສັນຍານິວເຄຼຍທີ່ໃຊ້ຮ່ວມກັບລັດເຊຍ ແລະ ຫຼຸດຈຳນວນຫົວຮົບນິວເຄຼຍໃຫ້ຫຼາຍກວ່ານີ້ໜ້າຈະດີກວ່າ.

ໃນດ້ານກະຊວງການຕ່າງປະເທດ ສ.ອາເມຣິກາ ຍັງບໍ່ມີປະຕິກິລິຍາຕອບໂຕ້ຢ່າງເປັນທາງການ ຕໍ່ຄຳປະຕິເສດຄັ້ງຫຼ້າສຸດຂອງລັດຖະບານຈີນ ທີ່ໃນເວລາດຽວກັນມີລາຍງານກ່ຽວກັບເງື່ອນໄຂສຳຄັນຂອງຈີນ ວ່າຈະເຂົ້າຮ່ວມການເຈລະຈາກໍ່ຕໍ່ເມື່ອ ສ.ອາເມຣິກາ ຫຼຸດຈຳນວນອາວຸດນິວເຄຼຍໃຫ້ສອດຄ່ອງກັບປະຕິມານທີ່ຈີນມີຢູ່ເທົ່ານັ້ນ.

ເຊິ່ງຄະນະຜູ້ແທນເຈລະຈາດ້ານນິວເຄຼຍຂອງ ສ.ອາເມຣິກາ ແລະ ລັດເຊຍໄດ້ພົບປະຫາລືກັນທີ່ນະຄອນຫຼວງວຽນນາ ປະເທໂອຕຼິດ ເມື່ອທ້າຍເດືອນມິຖຸນາ ທີ່ຜ່ານມາ ຕໍ່ກັບແນວທາງການຮ່າງຂໍ້ຕົກລົງນິວເຄຼຍສະບັບໃໝ່ຮ່ວມກັນ ແທນສົນທິສັນຍາສັນຕິພາບສອງຝ່າຍ ວ່າດ້ວຍການລົດຈຳນວນອາວຸດນິວເຄຼຍ ທີ່ຮຽກໂດຍຫຍໍ້ວ່າ New Start ເຊິ່ງສົນທິສັນຍາມີຜົນເມື່ອເດືອນກຸມພາ 2011 ແລະ ຈະໝົດອາຍຸໃນເດືອນກຸມພາ 2021 ມີເນື້ອໃນສຳຄັນຄືການຈຳກັດການຄອບຄອງຫົວຮົບນິວເຄຼຍທາງຍຸດທະສາດຂອງທັງສອງປະເທດໃຫ້ບໍ່ເກີນ 1,550 ລູກ.

ໃນເບື້ອງຕົ້ນມີການເປີດເຜີຍວ່າ ສ.ອາເມຣິກາ ແລະ ລັດເຊຍເຫັນດີຮ່ວມກັນໃນຫຼັກການ ວ່າຈະຮ່າງຂໍ້ຕົກລົງສະບັບໃໝ່ ໂດຍຈະມີການເຈລະຈາຄັ້ງຕໍ່ໄປໃນທ້າຍເດືອນກໍລະກົດ ຫຼື ຕົ້ນເດືອນສິງຫານີ້, ຂະນະທີ່ທ່ານ ມາແຊວ ບິວລິງສະເລອາ ຫົວໜ້າຄະນະຜູ້ແທນຂອງ ສ.ອາເມຣິກາຢືນຢັນວ່າ ກອງປະຊຸມຮ່ວມກັນຄັ້ງຕໍ່ໄປ ຄວນມີຈີນເຂົ້າຮ່ວມການປຶກສາຫາລືດ້ວຍ.

ແຕ່ທ່ານ ເຊີເກ ຣິບຄັອບ ຮອງລັດຖະບານຕີກະຊວງການຕ່າງປະເທດລັດເຊຍ ກ່າວວ່າການຄາດຫວັງການຮ່ວມມືຈາກຈີນ ເປັນສິ່ງທີ່ເປັນໄປບໍ່ໄດ້ ແລະ ລັດເຊຍຈະບໍ່ມີທາງໃຊ້ອິດທິພົນຂອງຕົນເອງຕໍ່ຈີນ ຕາມທີ່ລັດຖະບານ ສ.ອາເມຣິກາຕ້ອງການ.

HTML tutorial