ທ່ານ ລີ ຊຽນ ລຸງ ຖະແຫຼງໄຊຊະນະຂອງພັກ PAP ໃນການເລືອກຕັ້ງ ດ້ວຍຄະແນນສຽງກາຍເຄິ່ງສະພາ

ລາຍງານ 11 ກໍລະກົດ 2020, ຄະນະກຳມະການການເລືອກຕັ້ງແຫ່ງຊາດສິງກະໂປ ອອກປະກາດຢ່າງເປັນທາງການ ຜົນຂອງການເລືອກຕັ້ງທົ່ວໄປ ທີ່ຈັດຂຶ້ນເມື່ອວັນສຸກ (10​ ກໍລະກົດ) ທີ່ຜ່ານມາ ເປັນການເລືອກຕັ້ງສະມາຊິກສະພາແຫ່ງຊາດຊຸດທີ 14 ຈຳນວນ 93 ສຽງ.

ພັກກິດປະຊາຊົນ (PAP) ທີ່ຜູກຂາດການເປັນລັດຖະບານສິງກະໂປ ມາຕັ້ງແຕ່ການສະຖາປະນາປະເທດຢ່າງເປັນທາງການເມື່ອປີ 1960 ຍັງໄດ້ຮັບການເລືອກຕັ້ງເຂົ້າສະພາສູງສຸດຈຳນວນ 83 ສຽງ ດ້ວຍຄະແນນຈາກປະຊາຊົນ 1,524,781 ຄະແນນ ຫຼືກວມເອົາ 61.24%, ຕາມດ້ວຍພັກແຮງງານສິງກະໂປ (WP) ເຊິ່ງເປັນພັກແກນນຳຝ່າຍຄ້ານນັບຕັ້ງແຕ່ສິງກະໂປສະຖານະປະເທດ ໄດ້ຮັບການເລືອກຕັ້ງ 10 ສຽງ ດ້ວຍຄະແນນ 279,245 ຄະແນນ ຫຼື 11.22%.

ສ່ວນພັກສິງກະໂປກ້າວໜ້າ (PSP) ເຊິ່ງເປັນພັກການເມືອງນ້ອງໃໝ່ ທີ່ສ້າງຕັ້ງຂຶ້ນເມື່ອເດືອນມີນາ ປີທີ່ຜ່ານມາ ເຖິງແມ່ນວ່າບໍ່ໄດ້ຮັບການເລືອກເຂົ້າສູ່ສະພາ ແຕ່ໄດ້ອັດຕາ 2 ສຽງໃນຖານະສະມາຊິກທີ່ລົງສະໝັກເລືອກຕັ້ງ ແລະ ສ້າງຜົນງານໄດ້ດີທີ່ສຸດໃນການເລືອກຕັ້ງ ໂດຍບໍ່ໄດ້ເປັນທັງຝ່າຍລັດຖະບານ ແລະ ຝ່າຍຄ້ານ, ເຊິ່ງສິງກະໂປມີອັດຕາສະມາຊິກແບບນີ້ມາຕັ້ງແຕ່ປີ 1964 ເພື່ອປ້ອງກັນການຜູກຂາດອຳນາດໃນສະພາຂອງພັກ PAP.

ຂະນະທີ່ທ່ານ ລີ ຊຽນ ລຸງ ນາຍົກລັດຖະມົນຕີສິງກະໂປຖະແຫຼງກ່ຽວກັບຜົນການເລືອກຕັ້ງທີ່ອອກມາ ວ່າບົ່ງບອກໄດ້ຢ່າງຊັດເຈນ ເຖິງຄວາມເຈັບປວດຂອງປະຊາຊົນສິງກະໂປ ທ່າມກາງວິກິດອັນຮ້າຍແຮງທີ່ກຳລັງປະເຊີນຢູ່ ແລະ ມີທິດທາງບໍ່ແນ່ນອນໃນໄລຍະຍາວ, ເຖິງຢ່າງໃດກໍ່ຕາມ ຜູ້ນຳສິງກະໂປຢືນຢັນວ່າ ຜົນຄະແນນທີ່ອອກມາຖືເປັນຄວາມຊອບທຳຂອງພັກ PAP ໃນການຈັດຕັ້ງລັດຖະບານຊຸດໃໝ່ ເພື່ອນຳພາປະເທດໃຫ້ເດີນໜ້າຕໍ່ໄປ.

ໃນດ້ານຂອງນັກວິເຄາະຕີລາຄາວ່າ ຄຳຖະແຫຼງຂອງທ່ານ ລີ ຊຽນ ລູງ ສື່ເຖິງການຍອມຮັບຜົນການເລືອກຕັ້ງທີ່ພັກ PAP ໄດ້ຮັບຄະແນນນິຍົມຫຼຸດລົງກວ່າ 8% ຈາກການເລືອກຕັ້ງປີ 2015 ທີ່ພັກ PAP ຊະນະດ້ວຍຄະແນນທີ່ຫຼາຍກວ່ານີ້ ແລະ ໃນອີກມຸມໜຶ່ງກໍ່ບົ່ງອອກເຖິງຄວາມບໍ່ພໍໃຈຂອງປະຊາຊົນຈຳນວນບໍ່ໜ້ອຍ ຕໍ່ການທີ່ລັດຖະບານຍຸບສະພາເພື່ອເລືອກຕັ້ງໃໝ່ກ່ອນກຳນົດ ທ່າມກາງການແຜ່ລະບາດຂອງພະຍາດໂຄວິດ-19.

ເຊິ່ງລາຍງານຂອງຄະນະກຳມະການການເລືອກຕັ້ງເປີດເຜີຍຈຳນວນປະຊາຊົນອອກມາໃຊ້ສິດທັງໝົດ 2,535,565 ຄົນ ກວມເອົາ 95.53% ຂອງຜູ້ມີສິດລົງຄະແນນເລືອກຕັ້ງ ທີ່ມີທັງໝົດ 2,651,435 ຄົນ ຖືເປັນສະຖິຕິສູງສຸດນັບຕັ້ງແຕ່ປີ 1997.

ເຊິ່ງກົດໝາຍສິງກະໂປລະບຸວ່າ ການເລືອກຕັ້ງຖືເປັນຂໍ້ບັງຄັບສຳລັບພົນລະເມືອງ ທີ່ມີອາຍຸ 21 ປີຂຶ້ນໄປ ຕ້ອງລົງທະບຽນກັບຄະນະກຳມະການການເລືອກຕັ້ງ.

HTML tutorial