ຈີນຂຶ້ນບັນຊີດຳບຸກຄົນ ແລະ ໜ່ວຍງານຂອງ ສ.ອາເມຣິກາ ທີ່ແຊກແຊງວຽກງານພາຍໃນຊິນຈຽງອຸຍກູ

ລາຍງານ 13 ກໍລະກົດ 2020, ທ່ານ ນາງ ຫົວ ຊຸນຢິງ ໂຄສົກກະຊວງການຕ່າງປະເທດຈີນ ຖະແຫຼງເລື່ອງການຂຶ້ນບັນຊີດຳບຸກຄົນ ແລະ ໜ່ວຍງານຂອງ ສ.ອາເມຣິກາ ເນື່ອງຈາກມີພຶດຕິກຳແຊກແຊງສະຖານະການພາຍໃນເຂດປົກຄອງຕົນເອງຊິນຈຽງອຸຍກູ ເຊິ່ງຖືເປັນວຽກງານພາຍໃນຂອງ ສປ.ຈີນ, ໂດຍໜ່ວຍງານທີ່ມີຊື່ປາກົດຢູ່ໃນບັນຊີດຳຄັ້ງນີ້ຄື: ຄະນະກຳມາທິການບໍລິຫານລັດຖະສະພາ ສ.ອາເມຣິກາ ກ່ຽວກັບຈີນ.

ຂະນະທີ່ບຸກຄົນທີ່ປາກົດຊື່ຢູ່ໃນບັນຊີດຳມີ 4 ຄົນໄດ້ແກ່: ທ່ານ ແຊມ ບຣາວແບັກ ທູດພິເສດດ້ານວຽກງານສາສະໜາລະຫວ່າງປະເທດຂອງກະຊວງການຕ່າງປະເທດ ສ.ອາເມຣິກາ, ທ່ານ ເທັດ ຄຣູສ ສະມາຊິກສະພາສູງລັດເທັກຊັສ ສັງກັດພັກຣີພັບລິກັນ, ທ່ານ ມາໂກ ຣູບິໂອ ສະມາຊິກສະພາສູງລັດຟໍຣິດາ ສັງກັດພັກຣີພັບລິກັນ ແລະ ທ່ານ ຄຣິສ ສະມິດ ສະມາຊິກສະພາລ່າງເຂດ 4 ລັດນິວເຈີຊີ ສັງກັດພັບຣີພັບລິກັນ.

ເຊິ່ງທ່ານ ມາໂກ ຣູບິໂອ ຄືຜູ້ສະເໜີກົດໝາຍ ວ່າດ້ວຍນະໂຍບາຍປົກປ້ອງສິດທິມະນຸດຂອງຊາວອຸຍກູ ເຊິ່ງສະພາລ່າງ ແລະ ສະພາສູງມີມະຕິຮັບຮອງ ເມື່ອເດືອນພຶດສະພາ ທີ່ຜ່ານມາ ມີເນື້ອໃນສຳຄັນຄື ໜ່ວຍງານຂ່າວກອງຂອງ ສ.ອາເມຣິກາ ຕ້ອງສະເໜີລາຍງານຕໍ່ລັດຖະສະພາທຸກ 6 ເດືອນ ກ່ຽວກັບມາດຕະການກວາດລ້າງ ໂດຍເຈົ້າໜ້າທີ່ຝ່າຍຄວາມໝັ້ນຄົງຂອງລັດຖະບານຈີນໃນຊິນຈຽງ ທີ່ມີຕໍ່ປະຊາຊົນໃນພື້ນທີ່ ແລະ ກະຊວງການຕ່າງປະເທດ ສ.ອາເມຣິກາ ເປັນຜູ້ນຳໃນການພິຈາລະນາໃຊ້ມາດຕະການຂວໍ້າບາດຕໍ່ບຸກຄົນ ຫຼື ເຈົ້າໜ້າທີ່ຂອງລັດຖະບານຈີນ ທີ່ຢູ່ເບື້ອງຫຼັງນະໂຍບາຍກົດຂີ່ຂົ່ມເຫງຢ່າງຮ້າຍແຮງຕໍ່ຊາວອຸຍກູ.

ການເຄື່ອນໄຫວດັ່ງກ່າວຂອງລັດຖະບານຈີນ ເກີດຂຶ້ນພາຍຫຼັງທີ່ລັດຖະບານ ສ.ອາເມຣິກາ ປະກາດມາດຕະການຂວ້ຳບາດ ເມື່ອວັນທີ 9 ກໍລະກົດ ທີ່ຜ່ານມາ ຕໍ່ທ່ານ ເສິນ ສວນກົວ ເລຂາທິການພັກຄອມມູນິດປະຈຳຊິນຈຽງ, ທ່ານ ຈູ ໄຫ່ຫຼຸນ ຮອງເລຂາທິການສະພາປະຊາຊົນຊິນຈຽງ, ທ່ານ ຫວັງ ໝິງຊານ ຜູ້ອຳນວຍການສຳນັກງານຄວາມປອດໄພສາທາລະນະຊິນຈຽງ ແລະ ທ່ານ ຮົວ ຫຼິວຈຸນ ອະດີດຜູ້ອຳນວຍການສຳນັກງານຄວາມປອດໄພສາທາລະນະຊິນຈຽງ.