ລມຕ.ແຮງງານ ແລະ ສະຫວັດດີການສັງຄົມ ຕິດຕາມຜົນກະທົບນ້ຳຖ້ວມກະທັນຫັນເຂດບ້ານນ້ຳແອ່ງ

ລາຍງານ 13 ກໍລະກົດ 2020, ທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ພ້ອມດ້ວຍຄະນະ ໄດ້ລົງພື້ນເຂດບ້ານນ້ຳແອ່ງ ເມືອງວຽງພູຄາ ແຂວງຫຼວງນ້ຳທາ ທີ່ຖືກຜົນກະທົບຈາກນ້ຳປ່າໄຫຼຊຸເຂົ້າຖ້ວມຢ່າງກະທັນຫັນ ໃນວັນທີ 12 ກໍລະກົດ ທີ່ຜ່ານມາ.

ລາຍງານເບື້ອງຕົ້ນຈາກກະຊວງແຮງງານ ແລະ ສະຫວັດດີການສັງຄົມໃຫ້ຮູ້ວ່າ: ມີ 51 ຄອບຄົວ ຈຳນວນ 255 ຄົນ (ຍິງ 144 ຄົນ) ໄດ້ຮັບຜົນກະທົບ, ເຮືອນເປ່ເພ 2 ຫຼັງ, ນາເສຍຫາຍ 9 ເຮັກຕາ, ເລົ້າເຂົ້າເປ່ເພ 3 ຫຼັງ, ຊົນລະປະທານ 1 ແຫ່ງ, ລົດຈັກ 8 ຄັນ, ລົດໄຖ່ນາ 4 ຄົນ, ໂຮງສີເຂົ້າ 3 ເຄື່ອງ, ລົດໃຫຍ່ 1 ຄັນ, ຈັກສູບນ້ຳ 10 ເຄື່ອງ ແລະ ຍັງມີການສູນເສຍສັດລ້ຽງປະເພດຄ້ວຍ, ງົວ, ໝູ, ແບ້ ແລະ ສັດປີກ.

ຄະນະກຳມະການຄຸ້ມຄອງໄພພິບັດຂັ້ນສູນກາງ ໄດ້ມອບເງິນຊ່ວຍເຫຼືອ ຈຳນວນ 30 ລ້ານກີບ ແລະ ເຄື່ອງອຸປະໂພກ-ບໍລິໂພກຈຳນວນໜຶ່ງມອບໃຫ້ແກ່ພໍ່ແມ່ປະຊາຊົນ ເພື່ອແກ້ໄຂສຸກເສີນເບື້ອງຕົ້ນ.

ໃນດ້ານແຂວງຫຼວງນ້ຳທາ ແມ່ນໄດ້ມອບເງິນ 20 ລ້ານກີບໃຫ້ເມືອງ ແລະ ໄດ້ສົ່ງ ປກຊ-ປກສ ແຂວງໃຫ້ການຊ່ວຍເຫຼືອດ້ານແຮງງານ ແລະ ລົດໃຫຍ່ ເພື່ອຂົນຍ້າຍເຄື່ອງຂອງປະຊາຊົນທີ່ຖືກນ້ຳຖ້ວມອອກໄປຢູ່ພື້ນທີ່ໆປອດໄພ, ສ່ວນໂຍທາທິການແຂວງຫຼວງນ້ຳທາ ໄດ້ສົມທົບກັບເມືອງ ເພື່ອແກ້ໄຂສະພາບເສັ້ນທາງທີ່ຖືກນ້ຳຖ້ວມ ອານາໄມນີ້ເຫຍື້ອ, ກ່າງໄມ້ໃຫຍ່ ອອກຈາກຂົວ ເພື່ອໃຫ້ສາມາດສັນຈອນໄປ-ມາໄດ້.

ພາບ: ລມຕ.ແຮງງານ ແລະ ສະຫວັດດີການສັງຄົມ ຕິດຕາມຜົນກະທົບຈາກເຫດນ້ຳຖ້ວມກະທັນຫັນເຂດບ້ານນ້ຳແອ່ງ

ພາບ: ລມຕ.ແຮງງານ ແລະ ສະຫວັດດີການສັງຄົມ ຕິດຕາມຜົນກະທົບຈາກເຫດນ້ຳຖ້ວມກະທັນຫັນເຂດບ້ານນ້ຳແອ່ງ

ພາບ: ລມຕ.ແຮງງານ ແລະ ສະຫວັດດີການສັງຄົມ ຕິດຕາມຜົນກະທົບຈາກເຫດນ້ຳຖ້ວມກະທັນຫັນເຂດບ້ານນ້ຳແອ່ງ

 

HTML tutorial