ສ.ອາເມຣິກາວ່າ ຈີນຄືໄພຮຸກຮານທະເລຈີນໃຕ້ ພ້ອມປະກາດຢືນຄຽງຂ້າງຫວຽດນາມ-ຟິລິບປິນ

ລາຍງານ 14 ກໍລະກົດ 2020, ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ ກ່າວເມື່ອວັນຈັນ (13 ກໍລະກົດ) ທີ່ຜ່ານມາ ກ່ຽວກັບສະຖານະການໃນທະເລຈີນໃຕ້ ເຊິ່ງເປັນການອ້າງກຳມະສິດທັບຊ້ອນລະຫວ່າງລັດຖະບານຈີນ ກັບຫຼາຍປະເທດໃນພູມມິພາກ ວ່າການທີ່ຈີນປະກາດຄວາມເປັນເຈົ້າຂອງຊັບຍາກອນນອກຊາຍຝັ່ງເກືອບທັງໝົດໃນທະເລຈີນໃຕ້ ເປັນການກະທຳທີ່ບໍ່ຊອບທຳດ້ວຍກົດໝາຍສາກົນຢ່າງຊັດເຈນ ເຊັ່ນດຽວກັບການເດີນໜ້າໃຊ້ນະໂຍບາຍກົດດັນປະເທດຄູ່ກໍລະນີ ເພື່ອຍາດແຍ່ງສິດ.

ດ້ວຍເຫດນີ້ຈຶ່ງຊັດເຈນທີ່ສຸດແລ້ວ່າ ຈີນຖືເປັນໄພຮຸກຮານດ້ານຄວາມໝັ້ນຄົງຕໍ່ຄວາມຂັດແຍ່ງທາງທະເລໃນບໍລິເວນນີ້ ປະຊາຊຄົມໂລກຕ້ອງເພີ່ມການຮ່ວມມືຢຸດຢັ້ງ ບໍ່ໃຫ້ສະຖານະການລຸກລາມບານປາຍໄປກວ່າທີ່ເປັນຢູ່, ລັດຖະບານ ສ.ອາເມຣິກາ ພາຍໃຕ້ການນຳຂອງທ່ານ ໂດໂນ ທຣຳ ຈະຢືນຄຽງຂ້າງຕາຊີຕາເວັນອອກສຽງໃຕ້ ໂດຍສະເພາະຟິລິບປິນ ແລະ ຫວຽດນາມ ເພື່ອປົກປ້ອງສິດທິອັນຊອບທຳໃນທະເລຈີນໃຕ້ຕາມກອບຂອງກົດໝາຍລະຫວ່າງປະເທດ.

ເຖິງແມ່ນວ່າການເຄື່ອນໄຫວດັ່ງກ່າວຂອງ ສ.ອາເມຣິກາ ບໍ່ໄດ້ເໜືອຄວາມຄາດໝາຍຫຍັງ ເນື່ອງຈາກໃກ້ເຖິງການເລືອກຕັ້ງປະທານປະເທດຮອບໃໝ່ໃນເດືອນພະຈິກ ທີ່ຈະມາເຖິງນີ້ ທີ່ແນ່ນອນວ່າທ່ານ ໂດໂນ ທຣຳ ຕັ້ງເປົ້າຮັກສາຕຳແໜ່ງເປັນສະໄໝທີ່ສອງຕິດຕໍ່ກັນ ແຕ່ຖືເປັນຄັ້ງທຳອິດຢ່າງເປັນທາງການ ທີ່ລັດຖະບານ ສ.ອາເມຣິກາສະແດງຕົວຊັດເຈນວ່າຢູ່ຂ້າງໃດຂ້າງໜຶ່ງໃນບັນຫາດັ່ງກ່າວ ທັງທີ່ຕະຫຼອດໄລຍະທີ່ຜ່ານມາຢືນຢັນສະເໝີມາວ່າເປັນກາງ.

ຂະນະທີ່ສະຖານເອກອັກຄະລັດຖະທູດຈີນ ປະຈຳນນະຄອນຫຼວງວໍຊິງຕັນ ໄດ້ອອກຖະແຫຼງການຕອບໂຕ້ພາຍໃນເວລາອັນໄວ້ ວ່າຈຸດຢືນຂອງທ່ານ ໄມ ພອມແພວ ເປັນຂໍ້ອ້າງຂອງ ສ.ອາເມຣິກາ ເພື່ອຍົກລະດັບຄວາມເຄັ່ງຕຶງ ແລະ ຍຸແຍ່ໃຫ້ເກີດການປະເຊີນໜ້າໃນທະເລຈີນໃຕ້ເທົ່ານັ້ນ.