ສ.ອາເມຣິກາເພີ່ມແຮງກົດດັນຈີນ ຕໍ່ບັນຫາຮົງກົງ ດ້ວຍການຂວ້ຳບາດທະນາຄານຈີນ

ລາຍງານ 15 ກໍລະກົດ 2020, ທ່ານ ໂດໂນ ທຣຳ ປະທານປະເທດ ສ.ອາເມຣິກາ ຖະແຫຼງເມື່ອວັນອັງຄານ (14 ກໍລະກົດ) ທີ່ຜ່ານມາ ວ່າຕົນໄດ້ລົງນາມໃຫ້ກົດໝາຍວ່າດ້ວຍການຂວ້ຳບາດສະຖາບັນການເງິນແຫ່ງໃດກໍ່ຕາມຂອງຈີນ ທີ່ເຮັດທຸລະກຳ ຫຼື ມີສ່ວນຮ່ວມມືທາງທຸລະກິດກັບເຈົ້າໜ້າທີ່ຂອງລັດຖະບານຈີນ ທີ່ກົດຂີ່ຂົ່ມເຫງ ແລະ ຮິບຮອນສິດທິເສລີພາບປະຊາຊົນຮົງກົງ ທີ່ລັດຖະສະພາເຫັນດີເມື່ອຕົ້ນເດືອນນີ້ ໃຫ້ມີຜົນບັງຄັບໃຊ້ຢ່າງເປັນທາງການ.

ຂະນະດຽວກັນ, ຜູ້ນຳ ສ.ອາເມຣິກາກ່າວເຖິງການລົງນາມໃນຄຳສັ່ງຂອງຝ່າຍບໍລິຫານ ວ່າດ້ວຍການຖອດຖອນສະຖານະພິເສດທາງການຄ້າຂອງຮົງກົງ ໂດຍການເຄື່ອນໄຫວທັງສອງດ້ານເປັນຜົນມາຈາກການທີ່ຈີນບັງຄັບໃຊ້ກົດໝາຍ ວ່າດ້ວຍການຮັກສາຄວາມໝັ້ນຄົງແຫ່ງຊາດຂອງເຂດປົກຄອງພິເສດຮົງກົງ ເມື່ອວັນທີ 30 ມິຖຸນາ ທີ່ຜ່ານມາ.

ເມື່ອມີການຊັກຖາມວ່າ ມີນັດໝາຍໂອ້ລົມທາງໂທລະສັບກັບທ່ານ ສີ ຈິ້ນຜິງ ປະທານປະເທດຈີນຫຼືບໍ່? ທ່ານ ໂດໂນ ທຣຳ ຕອບວ່າບໍ່ມີ ແລະ ຢ້ຳວ່າບໍ່ມີຜູ້ນຳ ສ.ອາເມຣິກາຄົນໃດສະແດງທ່າທີອັນໜັກແໜ້ນຕໍ່ລັດຖະບານຈີນຫຼາຍກວ່ານີ້ອີກແລ້ວ ພ້ອມທັງກ່າວວ່າ ນອກເໜືອຈາກສະຖານະການໃນຮົງກົງ ລັດຖະບານ ສ.ອາເມຣິກາ ຈະດຳເນີນການທຸກວິຖີທາງເພື່ອໃຫ້ລັດຖະບານຈີນ ຕ້ອງຮັບຜິດຊອບກັບວິກິດການແຜ່ລະບາດຂອງພະຍາດໂຄວິດ-19 ນີ້ອີກດ້ວຍ.

HTML tutorial