ອັງກິດສັ່ງຫ້າມນຳໃຊ້ລະບົບ 5G ຂອງຫົວເຫວີຍ ພ້ອມສັ່ງໃຫ້ຖອນການຕິດຕັ້ງທັງໝົດທີ່ມີຢູ່

ລາຍງານ 15 ກໍລະກົດ 2020, ທ່ານ ໂອລິເວີ ດາວເດນ ລັດຖະມົນຕີກະຊວງດິຈິຕອນຂອງອັງກິດ ຖະແຫຼງຕໍ່ສະພາ ເມື່ອວັນອັງຄານ (14 ກໍລະກົດ) ທີ່ຜ່ານມາ ວ່ານັບຕັ້ງແຕ່ວັນທີ 1 ມັງກອນ 2021 ເປັນຕົ້ນໄປ ຜູ້ໃຫ້ບໍລິການອິນເຕີເນັດ ແລະ ເຄືອຂ່າຍໂທລະຄົມມະນາຄົມທຸກແຫ່ງໃນອັງກິດ ບໍ່ສາມາດຊື້ສິນຄ້າ ແລະ ບໍລິການທີ່ກ່ຽວຂ້ອງຈາກບໍລິສັດຫົວເຫວີຍ ເຕັກໂນໂລຊີຂອງຈີນໄດ້ອີກ.

ຂະນະດຽວກັນ ບໍລິສັດທຸກແຫ່ງທີ່ຊື້ ແລະ ຕິດຕັ້ງອຸປະກອນເພື່ອຮອງຮັບການສື່ສານໃນລະບົບໄຮ້ສາຍ 5G ຂອງຫົວເຫວີຍໄປແລ້ວ ຕ້ອງຖອນການຕິດຕັ້ງເຄື່ອງມືທັງໝົດທີ່ເປັນຂອງບໍລິສັດແຫ່ງນີ້ພາຍໃນປີ 2027, ເຊິ່ງທ່ານ ໂອລິເວີ ດາວເດນ ກ່າວວ່າທ່ານ ບໍຣິສ ຈອນສັນ ນາຍົກລັດຖະມົນຕີອັງກິດ ຕັດສິນໃຈບັນຫາດັ່ງກ່າວດ້ວຍຄວາມຍາກລຳບາກ ແຕ່ຈຳເປັນຕ້ອງດຳເນີນການເພື່ອປົກປ້ອງເສດຖະກິດ ແລະ ຄວາມໝັ້ນຄົງພາຍໃນຂອງອັງກິດໃນໄລຍະຍາວ.

ການເຄື່ອນໄຫວຄັ້ງນີ້ຂອງອັງກິດ ຖືໄດ້ວ່າເປັນການປ່ຽນຈຸດຢືນຢ່າງກະທັນຫັນ ເນື່ອງຈາກທ່ານ ບໍຣິສ ຈອນສັນ ມີຄຳສັ່ງເມື່ອເດືອນມັງກອນ ທີ່ຜ່ານມາ ອະນຸຍາດໃຫ້ຫົວເຫວີຍສາມາດມີສ່ວນຮ່ວມໃນໂຄງການເຊື່ອມຈອດເຄືອຂ່າຍ 5G ໃນປະເທດໄດ້ ແຕ່ກໍ່ມີຂໍ້ຈຳກັດ ຄືການໃຫ້ໂຄຕາພຽງ 35% ແຕ່ຫ້າມຫົວເຫວີຍກ່ຽວຂ້ອງກັບໂຄງການວາງລະບົບຫຼັກຂອງ 5G ເຊິ່ງຕອນນັ້ນລັດຖະບານຈີນ ແລະ ຫົວເຫວີຍຂ້ອນຂ້າງພໍໃຈ ສວນທາງກັບທ່າທີຂອງ ສ.ອາເມຣິກາ ທີ່ຍັງຄົງເດີນໜ້າກົດດັນລັດຖະບານອັງກິດໃນບັນຫາດັ່ງກ່າວ ວ່າຕ້ອງນຳຫົວເຫວີຍອອກຈາກໂຄງການ 5G ຢ່າງຖາວອນ.

ເຊິ່ງລັດຖະບານ ສ.ອາເມຣິກາ ປະກາດມາດຕະການທາງເສດຖະກິດເມື່ອເດືອນພຶດສະພາ ທີ່ຜ່ານມາ ວ່າຈະຂວ້ຳບາດຝ່າຍດຽວຕໍ່ບໍລິສັດແຫ່ງໃດກໍ່ຕາມໃນໂລກນີ້ ຫາກບໍ່ຂໍອະນຸມັດຢ່າງເປັນລາຍລັກອັກສອນຈາກ ສ.ອາເມຣິກາກ່ອນ ເມື່ອຕ້ອງການສົ່ງອອກເຊມິຄອນດັກເຕີ ທີ່ອອກແບບ ແລະ ຜະລິດໂດຍຫົວເຫວີຍ ໄປຍັງບໍລິສັດແຫ່ງອື່ນຂອງຈີນ ທີ່ຜະລິດສິນຄ້າທີ່ໃຊ້ເຕັກໂນໂລຊີທີ່ຄິດຄົ້ນໂດຍ ສ.ອາເມຣິກາ ເຊັ່ນດຽວກັນຜູ້ປະກອບການລາຍໃດກໍ່ຕາມຂອງ ສ.ອາເມຣິກາ ທີ່ຕ້ອງການສົ່ງອອກວັດຖຸດິບສຳລັບການຜະລິດເຊມິຄອນດັກເຕີ ແລະ ແບ່ງປັນເຕັກໂນໂລຊີການຜະລິດເຊມິຄອນດັກເຕີໃຫ້ແກ່ຫົວເຫວີຍ ຕ້ອງໄດ້ຮັບການອະນຸຍາດເປັນລາຍລັກອັກສອນຈາກລັດຖະບານ ສ.ອາເມຣິກາກ່ອນ.