ສ.ອາເມຣິກາວ່າຈະສ້າງພັນທະມິດໃນທຸກພູມມິພາກຂອງໂລກ ເພື່ອຕອບໂຕ້ພຶດຕິກຳທີ່ເປັນໄພຈາກ ສປ.ຈີນ

ລາຍງານ 22 ກໍລະກົດ 2020, ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ ຖະແຫຼງເມື່ອວັນອັງຄານ (21 ກໍລະກົດ) ທີ່ຜ່ານມາ ພາຍຫຼັງສສຳເລັດການປຶກສາຫາລືຮ່ວມກັບທ່ານ ໂດມິນິກ ຣາບ ລັດຖະມົນຕີກະຊວງການຕ່າງປະເທດອັງກິດ ທີ່ນະຄອນຫຼວງລອນດອນ ຊົມເຊີຍການທີ່ທ່ານ ບໍຣິສ ຈອນສັນ ນາຍົກລັດຖະມົນຕີອັງກິດ ທີ່ຕັດສິນໃຈເດັດຂາດ ສັ່ງໃຫ້ຜູ້ປະກອບການທຸກແຫ່ງໃນປະເທດ ຍຸຕິການສະໜັບສະໜູນສິນຄ້າເຕັກໂນໂລຊີ 5G ຂອງບໍລິສັດຫົວເຫວີຍ ຕັ້ງແຕ່ວັນທີ 1 ມັງກອນ ປີໜ້າເປັນຕົ້ນໄປ ແລະ ຫາກຊື້ອຸປະກອນໃດມາແລ້ວ ຕ້ອງຍົກເລີກໃຊ້ງານໃຫ້ໝົດພາຍໃນປີ 2027.

ພາບ: ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ (ຊ້າຍ) ແລະ ທ່ານ ໂດມິນິກ ຣາບ ລັດຖະມົນຕີກະຊວງການຕ່າງປະເທດອັງກິດ

ເຖິງຢ່າງໃດກໍ່ຕາມ, ທ່ານ ໄມ ພອມແລ້ວ ແລະ ທ່ານ ໂດມິນິກ ຣາບ ຫຼີກລ້ຽງທີ່ຈະຕອບຄຳຖາມຂອງນັກຂ່າວ ທີ່ພະຍາມຊັກຖາມໃຫ້ທັງສອງຊີ້ແຈງວ່າ ການດຳເນີນການດັ່ງກ່າວໝາຍຄວາມວ່າ ລັດຖະບານ ສ.ອາເມຣິກາກຳລັງຊັກນຳ ຫຼື ແຊກແຊງການດຳເນີນນະໂຍບາຍພາຍໃນຂອງອັງກິດຫຼືບໍ່? ໂດຍທັງສອງກ່າວພຽງວ່າ ພາວະຜູ້ນຳຂອງນາຍົກລັດຖະມົນຕີອັງກິດນຳໄປສູ່ການຕັດສິນໃຈໃນສິ່ງທີ່ຖືກຕ້ອງ.

ຂະນະດຽວກັນ, ທ່ານ ໄມ ພອມແພວ ກ່າວວ່າລັດຖະບານ ສ.ອາເມຣິກາ ພາຍໃຕ້ການນຳຂອງທ່ານ ໂດໂນ ທຣຳ ມີແຜນສ້າງເຄືອຂ່າຍພັນທະມິດໃນທົ່ວທຸກພູມມິພາກຂອງໂລກໃຫ້ຫຼາຍທີ່ສຸດ ເພື່ອຮ່ວມກັນສຶກສາ, ສ້າງຄວາມເຂົ້າໃຈ ແລະ ວາງແຜນຕອບໂຕ້ຕໍ່ໄພຮຸກຮານຈາກພັມຄອມມູນິດຈີນ ທີ່ມີພຶດຕິກຳ ແລະ ການດຳເນີນນະໂຍບາຍຊົ່ວຮ້າຍມາໂດຍຕະຫຼອດ ໂດຍສະເພາະຢ່າງຍິ່ງການເປັນຜູ້ແຜ່ເຊື້ອພະຍາດໂຄວິດ-19 ໄປທົ່ວໂລກ, ການກົດຂີ່ຂົ່ມເຫັງເສລີພາບໃນຮົງກົງ ແລະ ສິດທິມະນຸດຂອງກຸ່ມຊົນຊາດຊົນເຜົ່າໃນເຂດປົກຄອງຕົນເອງຊິນຈຽງອຸຍກູ.