ສ.ອາເມຣິກາສັ່ງໃຫ້ ສປ.ຈີນ ປິດສະຖານກົງສູນໃຫຍ່ທີ່ເມືອງຮິວສະຕັນ ພາຍໃນ 72 ຊົ່ວໂມງ

ລາຍງານ 22 ກໍລະກົດ 2020, ທ່ານ ຫວັງ ເຫວີນປິນ ໂຄສົກກະຊວງການຕ່າງປະເທດຈີນ ຖະແຫຼງວ່າ ລັດຖະບານ ສ.ອາເມຣິກາແຈ້ງຢ່າງເປັນທາງການມາຍັງລັດຖະບານຈີນ ເມື່ອວັນອັງຄານ (21 ກໍລະກົດ) ທີ່ຜ່ານມາ ວ່າຈີນຕ້ອງປິດສະຖານກົງສູນໃຫຍ່ທີ່ເມືອງຮິວສະຕັນ ໃນລັດເທັກຊັສ ພາຍໃນເວລາ 72 ຊົ່ວໂມງ ນັບຕັ້ງແຕ່ວັນທີ່ມີການໄດ້ຮັບແຈ້ງຢ່າງເປັນທາງການ.

ເຊິ່ງທ່ານ ຫວັງ ເຫວີນປິນບໍ່ໄດ້ໃຫ້ຂໍ້ມູນເພີ່ມເຕີມກ່ຽວກັບເຫດຜົນ ຫຼື ທີ່ມາທີ່ໄປຈົນເຮັດໃຫ້ເກີດສະຖານະການນີ້ຂຶ້ນ ແຕ່ກ່າວວ່າລັດຖະບານຈີນປະນາມມາດຕະການດັ່ງກ່າວຂອງ ສ.ອາເມຣິກາຢ່າງເຖິງທີ່ສຸດ ເນື່ອງຈາກເປັນການລະເມີດກົດໝາຍດ້ານການທູດໃນທຸກດ້ານ ແລະ ເຕືອນວ່າສາຍພົວພັນລະຫວ່າງ ສ.ອາເມຣິກາ ກັບ ຈີນຈະໄດ້ຮັບຜົນກະທົບຢ່າງແນ່ນອນ ໂດຍສະເພາະຢ່າງຍິ່ງຫາກລັດຖະບານ ສ.ອາເມຣິກາ ຍັງຍືດໝັ້ນຕໍ່ການຕັດສິນໃຈດັ່ງກ່າວແລ້ວ ລັດຖະບານຈີນກໍ່ບໍ່ໄດ້ນິ້ງນອນໃຈທີ່ຈະຕອບໂຕ້ດ້ວຍຄວາມເທົ່າທຽມ.

ໃນເວລາດຽວກັນ ໜ່ວຍງານດັບເພີງເມືອງຮິວສະຕັນລາຍງານວ່າ ໄດ້ຮັບແຈ້ງຈາກປະຊາຊົນ ວ່າມີຄວັນໄຟລອຍອອກມາຈາກບໍລິເວນເດີນຫຍ້າພາຍໃນສະຖານກົງສູນຈີນ ເບື້ອງຕົ້ນພົບວ່າເຈົ້າໜ້າທີ່ຂອງສະຖານກົງສູນກຳລັງຈູດເຜົາທຳລາຍເອກະສານຈຳນວນຫຼາຍ ແລະ ຍັງບໍ່ອະນຸຍາດໃຫ້ໜ່ວຍດັບເພີງເຂົ້າໄປພາຍໃນ, ຕຳຫຼວດ ແລະ ເຈົ້າໜ້າທີ່ດັບເພີງຈຶ່ງສັງເກດການຢູ່ດ້ານນອກ ເນື່ອງຈາກສະຖານກົງສູນຖືເປັນພື້ນທີ່ອະທິປະໄຕຂອງປະເທດນັ້ນ.

HTML tutorial