ລັດເຊຍປະຕິເສດຂໍ້ກ່າວຫາ ວ່າທົດລອງອາວຸດຕໍ່ຕ້ານດາວທຽມທາງອະວະກາດ

ລາຍງານ​ 26 ກໍລະກົດ 2020, ກະຊວງການຕ່າງປະເທດລັດເຊຍ ອອກຖະແຫຼງການເມື່ອວັນສຸກ (24 ກໍລະກົດ) ທີ່ຜ່ານມາ ວ່າການທົດລອງວັດຖຸໃນອະວະກາດ ເມື່ອວັນທີ 15 ກໍລະກົດ ທີ່ຜ່ານມາ ເປັນໄປຕາມກອບຂອງກົດໝາຍລະຫວ່າງປະເທດ ແລະ ບໍ່ໄດ້ມີການຄຸກຄາມ ຫຼື ກໍ່ກວນດາວທຽມ ແລະ ວັດຖຸໃນອະວະກາດຂອງປະເທດໃດ.

ຈຸດຢືນດັ່ງກ່າວຂອງກະຊວງການຕ່າງປະເທດລັດເຊຍ ເກີດຂຶ້ນພາຍຫຼັງທີ່ກະຊວງປ້ອງກັນປະເທດລັດເຊຍອອກຖະແຫຼງການເມື່ອອາທິດທີ່ຜ່ານມາ ວ່າສິ່ງທີ່ທົດລອງຕາມຂໍ້ກ່າວຫາຂອງກຸ່ມປະເທດຕາເວັນຕົກນັ້ນ ເປັນພຽງພາຫະນະດ້ານອະວະກາດຂະໜາດນ້ອຍ ໂດຍມີການຕິດຕັ້ງອຸປະກອນພິເສດເພື່ອສັງເກດການການປະຕິບັດການຂອງໜຶ່ງໃນດາວທຽມລັດເຊຍແບບໃກ້ຊິດ ແຕ່ຈົນເຖິງຕອນນີ້ຍັງບໍ່ມີລາຍລະອຽດເພີ່ມເຕີມວ່າ ວັດຖຸນັ້ນແມ່ນຫຍັງ?.

ເຖິງຢ່າງໃດກໍ່ຕາມ, ສ.ອາເມຣິກາ ແລະ ອັງກິດໃຫ້ຄວາມຄິດເຫັນໄປໃນທິດທາງດຽວກັນ ວ່າສິ່ງທີ່ລັດເຊຍທົດລອງໃນມື້ນັ້ນ ຄືດາວທຽມສອດແນມ ແລະ ລະບົບດາວທຽມທີ່ລັດເຊຍໃຊ້ຄວບຄຸມການທົດລອງອາວຸດທີ່ລະດັບວົງໂຄຈອນໂລກ ເຊິ່ງເປັນລະບົບດຽວກັບທີ່ ສ.ອາເມຣິກາ ເຄີຍຍົກປະເດັນຂຶ້ນມາປຶກສາຫາລືກັບລັດເຊຍເມື່ອຕົ້ນປີນີ້ ພາຍຫຼັງເກີດເຫດດາວທຽມຂອງລັດເຊຍເຄື່ອນເຂົ້າໃກ້ກັບດາວທຽມຂອງ ສ.ອາເມຣິກາຫຼາຍຈົນເກີນໄປ.

ເຊິ່ງແຫຼ່ງຂ່າວໃນລັດຖະບານ ສ.ອາເມຣິກາ ໃຫ້ຂໍ້ມູນເພີ່ມເຕີມກັບສຳນັກຂ່າວ Reuters ວ່າ ສ.ອາເມຣິກາ ແລະ ລັດເຊຍເຫັນດີຮ່ວມກັນໃນການຈັດຕັ້ງການເຈລະຈາສອງຝ່າຍ ເພື່ອສ້າງຄວາມເຂົ້າໃຈເຊິ່ງກັນ ແລະ ກັນຕໍ່ບັນຫາດັ່ງກ່າວຢ່າງເປັນທາງການ ເຊິ່ງຈະເປັນຄັ້ງທຳອິດນັບຕັ້ງແຕ່ປີ 2013 ທີ່ທັງສອງປະເທດພົບປະຫາລືກັນໃນຫົວຂໍ້ກ່ຽວກັບອະວະກາດ.

ສ່ວນສະຖານທີ່ປຶກສາຫາລືອາດຈະເປັນນະຄອນຫຼວງວຽງນາ ເມືອງຫຼວງຂອງປະເທດໂອຕຣິດ ສະຖານທີ່ແຫ່ງດ່ຽວກັບທີ່ທັງສອງປະເທດໃຊ້ຈັດກອງປະຊຸມ ວ່າດ້ວຍການສະແຫວງຫາແນວທາງຮ່າງຂໍ້ຕົກລົງນິວເຄຼຍສະບັບໃໝ່ຮ່ວມກັນ ແທນສົນທິສັຍາສັນຕິພາບສອງຝ່າຍ ວ່າດ້ວຍການຫຼຸດຈຳນວນອາວຸດນິວເຄຼຍ ທີ່ຮຽກໂດຍຫຍໍ້ວ່າ New Start ເຊິ່ງຈະໝົດອາຍຸ 10 ປີ ໃນເດືອນກຸມພາປີໜ້າ ມີເນື້ອໃນສຳຄັນຄື ການຈຳກັດການຄອບຄອງຫົວຮົບນິວເຄຼຍທາງຍຸດທະສາດຂອງທັງສອງປະເທດໃຫ້ບໍ່ເກີນ 1,550 ລູກ.