ສ.ອາເມຣິກາ ເປີດບັ້ນຍຸດທະສາດສົງຄາມເຢັນ ກັບ ສປ.ຈີນ ໂດຍການປ່ຽນຄຳຮຽກຜູ້ນຳຈີນ

ລາຍງານ 26 ກໍລະກົດ 2020, ຕະຫຼອດອາທິດທີ່ຜ່ານມາ ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ ໃຫ້ຄວາມເຫັນຫຼາຍຄັ້ງກ່ຽວກັບສາຍພົວພັນລະຫວ່າງ ສ.ອາເມຣິກາ ກັບ ສປ.ຈີນ ທີ່ທະວີຄວາມເຄັ່ງຕຶງຂຶ້ນອີກສູ່ລະດັບ ຈາກການທີ່ຕ່າງຝ່າຍຕ່າງສັ່ງປິດສະຖານກົງສູນຂອງກັນ ແລະ ກັນຄື: ສະຖານກົງສູງໃຫຍ່ຈີນ ທີ່ເມືອງຮິວສະຕັນ ແລະ ສະຖານກົງສູນໃຫຍ່ ສ.ອາເມຣິກາ ທີ່ເມືອງເສິງຕູ.

ແຕ່ມີສິ່ງທີ່ໜ້າສັງເກດ ນັ້ນຄືທ່ານ ໄມ ພອມແພວບໍ່ໄດ້ຮຽກຜູ້ນຳຈີນວ່າ: “ປະທານປະເທດສີ ຈິ້ນຜິງ”, “ປະທານປະເທດສີ” ຫຼື “ປະທານປະເທດຈີນ” ແຕ່ໃຊ້ຄຳວ່າ “ເລຂາທິການພັກຄອມມູນິດຈີນ” ຫຼື ເລຂາທິການສີ ຈິ້ນຜິງ” ແລະ ການບໍ່ຮຽກ “ລັດຖະບາປັກກິ່ງ” ຫຼື “ລັດຖະບານຈີນ” ແຕ່ໃຊ້ຄຳວ່າ “ພັກຄອມມູນິດຈີນ”.

ເຊິ່ງໃນລະຫວ່າງການກ່າວຖະແຫຼງທີ່ຫໍສະໝຸດປະທານປະເທດຣີຊາດ ນິກສັນ ເມື່ອວັນພະຫັດ (23 ກໍລະກົດ) ທີ່ຜ່ານມາ ທ່ານ ໄມ ພອມແພວ ໄດ້ຮຽກຜູ້ນຳຈີນວ່າ “ເລຂາທິການສີ ຈິ້ນຜິງ” ເຊິ່ງສຳນັກຂ່າວ South China Morning Post ນັບວ່າເປັນຄັ້ງທີ 15 ແລ້ວໃນເດືອນນີ້ ທີ່ລັດຖະມົນຕີກຊະວງການຕ່າງປະເທດ ສ .ອາເມຣິກາໃຊ້ຄຳດັ່ງກ່າວ.

ຂະນະທີ່ເຈົ້າໜ້າທີ່ອີກຫຼາຍຄົນໃນລັດຖະບານ ສ.ອາເມຣິກາ ລວມເຖິງທ່ານ ວິນລຽມ ບາ ລັດຖະມົນຕີກຊະວງຍຸຕິທຳ, ທ່ານ ໂຣເບິດ ໂອໄບຣອັນ ທີ່ປຶກສາດ້ານຄວາມໝັ້ນຄົງແຫ່ງຊາດ ແລະ ທ່ານ ຄຣິສໂຕເຟີ ເຣ ຜູ້ອຳນວຍການອົງການສືບສວນສອບສວນກາງ (FBI) ໄດ້ພາກັນຫັນມາໃຊ້ຄຳຮຽກແທນຜູ້ນຳຈີນແບບດຽວກັນກັບທ່ານ ໄມ ພອມແພວ ຫຼາຍຂຶ້ນ, ແຕ່ທ່ານ ໂດໂນ ທຣຳ ຍັງຮຽກຜູ້ນຳຈີນວ່າ “ປະທານປະເທດ ສີ ຈິ້ນຜິງ” ແລະ “ປະທານປະເທດສີ”.

ເຖິງແມ່ນວ່າ ບໍ່ແມ່ນສິ່ງທີ່ຜິດມາລະຍາດທາງການທູດ ເນື່ອງຈາກປັດຈຸບັນ ທ່ານ ສີ ຈິ້ນຜິງ ດຳລົງຕຳແໜ່ງຢ່າງເປັນທາງການ 3 ຕຳແໜ່ງຄື: ປະມຸກລັດ (ທີ່ຮັບຮູ້ໃນນາມ “ປະທານປະເທດ”), ປະທານກຳມະການກົມການເມືອງສູນກາງພັກ ແລະ ເລຂາທິການພັກຄອມມູນິດຈີນ, ໃນດ້ານຂອງນັກວິເຄາະຕີລາຄາວ່າ ການປ່ຽນແປງດັ່ງກ່າວ ເປັນເຈດຕະນາໃນການສົ່ງສັນຍານວ່າ ລັດຖະບານ ສ.ອາເມຣິກາ ບໍ່ຍອມຮັບອຳນາດການປົກຄອງຂອງທ່ານ ສີ ຈິ້ນຜິງ ຄວບຄູ່ໄປກັບການຟື້ນຟູຍຸດທະສາດສົງຄາມເຢັນ.

ໃນອີກດ້ານໜຶ່ງ ທ່ານ ຫວັງ ອີ້ ລັດຖະມົນຕີກະຊວງການຕ່າງປະເທດຈີນກ່າວເຖິງ ການປ່ຽນແປງທີ່ເກີດຂຶ້ນກັບສາຍພົວພັນລະຫວ່າງ ສປ.ຈີນ ແລະ ສ.ອາເມຣິກາໃນຕອນນີ້ ວ່າຝ່າຍ ສ.ອາເມຣິກາ ເປັນຕົ້ນເຫດທັງໝົດ ແລະ ຫວັງວ່າຈະມີການຮ່ວມມືກັນຢ່າງຈິງຈັງ ເພື່ອແກ້ໄຂອຸປະສັກໃຫ້ລຸລ່ວງ.