ສ.ອາເມຣິກາຈະສັ່ງຫ້າມນຳໃຊ້ແອັບ TikTok ໂດຍໃຫ້ເຫດຜົນວ່າເປັນໄພຕໍ່ຄວາມໝັ້ນຄົງແຫ່ງຊາດ

ລາຍງານ 1 ສິງຫາ 2020, ທ່ານ ໂດໂນ ທຣຳ ປະທານປະເທດ ສ.ອາເມຣິກາ ກ່າວເມື່ອວັນສຸກ (31 ກໍລະກົດ) ທີ່ຜ່ານມາ ວ່າຕົນມີຄວາມເປັນຫ່ວງຕໍ່ນະໂຍບາຍ ແລະ ການໃຫ້ບໍລິການຂອງແອັບພິເຄຊັນ TikTok ໃນ ສ.ອາເມຣິກາ ແລະ ລັດຖະບານ ສ.ອາເມຣິກາ ຈະດຳເນີນການເພື່ອ “ຫ້າມ” ນຳໃຊ້ແອັບພິເຄຊັນດັ່ງກ່າວໃນ ສ.ອາເມຣິກາ ໂດຍຈະມີການລົງນາມຢ່າງເປັນທາງການໃນຄຳສັ່ງພິເສດຂອງຝ່າຍບໍລິຫານພາຍໃນວັນເສົາ 1 ສິງຫານີ້ ຕາມເວລາທ້ອງຖິ່ນ.

ການເຄື່ອນໄຫວດັ່ງກ່າວຂອງທ່ານ ໂດໂນ ທຣຳ ເກີດຂຶ້ນພາຍຫຼັງທີ່ຄະນະກຳມາທິການດ້ານການລົງທຶນລະຫວ່າງປະເທດ ເຊິ່ງເປັນຄະນະປະຕິບັດງານລະຫວ່າງ 16 ກະຊວງ ລວມທັງກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ ແລະ ກະຊວງການຕ່າງປະເທດ ທີ່ລາຍງານເມື່ອກາງອາທິດນີ້ ວ່າກຳລັງສືບສວນສອບສວນຂໍ້ຕົກລົງທາງທຸລະກິດບາງລາຍການຂອງ TikTok ທີ່ສົ່ງຜົນກະທົບຕໍ່ຄວາມໝັ້ນຄົງແຫ່ງຊາດ.

ໃນດ້ານຂອງສຳນັກງານ TikTok ໃນ ສ.ອາເມຣິກາ ທີ່ຕັ້ງຢູ່ເມືອງຄັນເວີ ລັດຄາລິຟໍເນຍ ປະຕິເສດໃຫ້ຄວາມເຫັນຕໍ່ຄຳກ່າວຂອງທ່ານ ໂດໂນ ທຣຳ, ໂດຍສະແດງຈຸດຢືນພຽງວ່າ TikTok ເຊື້ອໝັ້ນຕໍ່ນະໂຍບາຍຂອງອົງກອນ ທີ່ຈະນຳໄປສູ່ຄວາມສຳເລັດໃນໄລຍະຍາວ ແລະ ຢືນຢັນການໃຫ້ບໍລິການມີຄວາມໂປ່ງໃສພໍ, ຂະນະທີ່ກະຊວງການຕ່າງປະເທດຈີນຍັງບໍ່ມີປະຕິກິລິຍາຢ່າງເປັນທາງການຕໍ່ປະເດັນນີ້.

HTML tutorial