ໂຄວິດ-19 ໃນທົ່ວໂລກຍັງມີທ່າອ່ຽງເພີ່ມຂຶ້ນ, ມີຜູ້ຕິດເຊື້ອໃໝ່ເກືອບ 3 ແສນຄົນຕໍ່ມື້ ທຳລາຍສະຖິຕິເກົ່າ

ລາຍງານ 1 ສິງຫາ 2020, ທ່ານ ເທດຼອສ ແອດຮານອມ ເກເບຼເຢຊຸສ ຜູ້ອຳນວຍການອົງການອະນາໄມໂລກ (WHO) ຖະແຫຼງເມື່ອວັນສຸກ (31 ກໍລະກົດ) ທີ່ຜ່ານມາ ກ່ຽວກັບສະຖານະການການແຜ່ລະບາດຂອງພະຍາດໂຄວິດ-19 ນັບຕັ້ງແຕ່ມີການຢືນຢັນການພົບຜູ້ຕິດເຊື້ອຄົນທຳອິດຢ່າງເປັນທາງການທີ່ ສປ.ຈີນ ເມື່ອເດືອນທັນວາ 2019 ວ່າສະຖິຕິຜູ້ຕິດເຊື້ອລາຍໃໝ່ໃນຮອບ 24 ຊົ່ວໂມງຫຼ້າສຸດ ຈົນເຖິງເວລາ 18:34 ໂມງ ຂອງເຂດເວລາມາດຕະຖານເອີຣົບກາງ (23:34 ໂມງຕາເວລາໃນປະເທດລາວ) ມີຈຳນວນ 292,527 ຄົນ ເປັນສະຖິຕິລາຍວັນທີ່ສູງທີ່ສຸດຄັ້ງໃໝ່ ທຳລາຍສະຖິຕິ 284,196 ຄົນຂອງວັນທີ 25 ກໍລະກົດ 2020.

ຂະນະທີ່ຈຳນວນຜູ້ເສຍຊີວິດລາຍວັນຕາມການຮວບຮວມຂໍ້ມູນຂອງອົງການອະນາໄມໂລກນັ້ນ ມີ 6,812 ຄົນ ຫຼາຍທີ່ສຸດແມ່ນຢູ່ ສ.ອາເມຣິກາ, ບຣາຊິນ, ອິນເດຍ ແລະ ອາຟຣິກາໃຕ້ ເພີ່ມຈຳນວນຜູ້ເສຍຊີວິດສະສົມທົ່ວໂລກຈາກໂຄວິດ-19 ເປັນ 668,910 ຄົນ ຈາກຈຳນວນຜູ້ຕິດເຊື້ອສະສົມ 17,106,007 ຄົນ.

ເຊິ່ງນອກຈາກປະເທດຂ້າງຕົ້ນທີ່ກ່າວມາ ທີ່ເປັນກຸ່ມປະເທດຢູ່ຫົວຕາຕາລາງຂອງສະຖິຕິຜູ້ຕິດເຊື້ອ ແລະ ເສຍຊີວິດແລ້ວ ອົງການອະນາໄມໂລກຍັງໄດ້ຮັບລາຍງານວ່າ ໃນຮອບ 24 ຊົ່ວໂມງຫຼ້າສຸດມີເກືອບ 40 ປະເທດ ແລະ ດິນແດນ ຢືນຢັນພົບຜູ້ຕິດເຊື້ອລາຍວັນຫຼາຍທີ່ສຸດເປັນສະຖິຕິໃໝ່ ລວມເຖິງອົດສະຕຣາລີ, ຈີນ, ຍີ່ປຸ່ນ, ໂບລິວີ, ເອທິໂອປີ, ຊູດັງ, ບູນກາລີ, ແບນຊິກ, ອຸດສະເບກິດສະຖານ, ຫວຽດນາມ ແລະ ຮົງກົງ.

ເຊິ່ງ ທ່ານ ເທດຼອສ ແອດຮານອມ ເກເບຼເຢຊຸສ ກ່າວເຖິງວິກິດໂລກລະບາດຄັ້ງນີ້ວ່າ ຜົນກະທົບຈາກສະຖານການດັ່ງກ່າວຈະສືບເນື່ອງໄປອີກຫຼາຍທົດສະຫວັດ ແລະ ມີຄວາມເປັນໄປໄດ້ສູງຫຼາຍວ່າອົງການອະນາໄມໂລກຈະຕໍ່ເວລາການປະກາດໃຫ້ວິກິດການແຜ່ລະບາດຂອງໂຄວິດ-19 ເປັນພາວະສຸກເສີນດ້ານສາທາລະນະສຸກລະຫວ່າງປະເທດຕໍ່ໄປອີກຢ່າງໜ້ອຍ 6 ເດືອນ ພາຍຫຼັງທີ່ປະກາດເປັນຄັ້ງທຳອິດເມື່ອວັນທີ 30 ມັງກອນ ທີ່ຜ່ານມາ ເຊິ່ງເປັນຄັ້ງທີ 6 ໃນປະຫວັດສາດທີ່ອົງການອະນາໄມໂລກປະກາດພາວະສຸກເສີນດັ່ງກ່າວ.

ຕໍ່ຈາກການແຜ່ລະບາດຂອງໄຂ້ຫວັດໃຫຍ່ສາຍພັນໃໝ່ H1N1 ເມື່ອປີ 2009, ການແຜ່ລະບາດຂອງເຊື້ອໄວຣັສອີໂບລາ ໃນພາກຕາເວັນຕົກຂອງທະວີບອາຟຣິກາ ລະຫວ່າງປີ 2013-2016, ສະຖານະການໂລກໂປລິໂອ ເມື່ອປີ 2014, ການແຜ່ລະບາດຂອງເຊື້ອໄວຣັສຊິກາ ເມື່ອປີ 2016 ແລະ ການແຜ່ລະບາດຂອງເຊື້ອໄວຣັສອີໂບລາໃນສາທາລະນະລັດ ປະຊາທິປະໄຕກອງໂກ ເມື່ອ 2019.

HTML tutorial