ພາຍຸດີເປຣຊັນເພີ່ມກຳລັງແຮງເປັນພາຍຸເຂດຮ້ອນຊິນລາກູ ແລະ ຈະເຂົ້າປົກຄຸມທົ່ວປະເທດລາວ

ລາຍງານ 1 ສິງຫາ 2020, ເມື່ອເວລາ 16:00 ໂມງ ຂອງວັນເສົານີ້ ພາຍຸລະດັບ 2 (ດີເປຣຊັນ) ບໍລິເວນຊາຍຝັງເກາະໄຫຫຼຳ ໄດ້ທະວີກຳລັງແຮງຂຶ້ນເປັນພາຍຸເຂດຮ້ອນຊິນລາກູ (Sinlaku) ແລ້ວ, ເຊິ່ງກຳລັງເຄື່ອນຕົວມາທາງທທິດຕາເວັນຕົກຂ້ອນໄປທາງເໜືອ ດ້ວຍຄວາມໄວປະມານ 20 ກິໂລແມັດຕໍ່ຊົ່ວໂມງ ຄາດວ່າພາຍຸນີ້ຈະເຄື່ອນຂຶ້ນຝັ່ງປະເທດວຽດນາມ ໃນວັນອາທິດ (2 ສິງຫາ) ຫຼັງຈາກນັ້ນຈະອ່ອນກຳລັງລົງເປັນພາຍຸດີເປຣຊັນ ແລະ ເຄື່ອນເຂົ້າປົກຄຸມປະເທດລາວ.

ພາບ: ແຜນວາດຄາດຄະເນເສັ້ນທາງພາຍຸເຂດຮ້ອນຊິນລາກູ

ໃນດ້ານຂອງກົມອຸຕຸນິຍົມ ແລະ ອຸທົກກະສາດ ກໍ່ໄດ້ອອກແຈ້ງເຕືອນເມື່ອວັນສຸກ (31 ກໍລະກົດ) ທີ່ຜ່ານມາວ່າ: ໃນໄລຍະວັນທີ 31 ກໍລະກົດ – 1 ສິງຫາ ຈະມີຝົນຕົກໃນລະດັບຄ່ອຍຫາປານກາງເປັນບໍລິເວນກວ້າງ ແລະ ຕົກໜັກຢູ່ບາງທ້ອງຖິ່ນແຂວງພາກເໜືອດ້ານຕາເວັນອອກລົງຫາພາກກາງ ແລະ ພາກໃຕ້ເຊັ່ນ: ແຂວງຫົວພັນ, ຊຽງຂວາງ, ວຽງຈັນ, ໄຊສົມບູນ, ບໍລິຄຳໄຊ, ຄຳມ່ວນ, ສະຫວັນນະເຂດ, ສາລະວັນ, ຈຳປາສັກ, ເຊກອງ ແລະ ອັດຕະປື.

ໃນໄລຍະວັນທີ 2-4 ສິງຫາ ຈະມີຝົນຕົກເປັນບໍລິເວນກວ້າງ ພ້ອມຈະມີລົມພັດແຮງໃນຂອບເຂດທົ່ວປະເທດ, ພ້ອມທັງເຕືອນໃຫ້ປະຊາຊົນໃນຂອບເຂດທົ່ວປະເທດໃຫ້ລະມັດລະວັງ ເພາະຈະເຮັດໃຫ້ເກີດມີຟ້າຜ່າ, ນ້ຳຖ້ວມຊຸ, ນ້ຳຖ້ວມອັ່ງ ແລະ ດິນເຈື່ອນ.

HTML tutorial