ຟິລິບປິນມີຜູ້ຕິດໂຄວິດເພີ່ມສູງກວ່າ 1 ແສນຄົນແລ້ວ ຜູ້ນຳສັ່ງປິດນະຄອນຫຼວງ ແລະ ແຂວງຂ້າງຄຽງ

ລາຍງານ 3 ສິງຫາ 2020, ທ່ານ ແຮຣີ ໂຣດ ໂຄສົກທຳນຽບປະທານປະເທດຟິລິບປິນ ກ່າວວ່າທຸກເຂດໃນນະຄອນຫຼວງມະນິລາ ແລະ ອີກ 5 ແຂວງໃກ້ຄຽງ ຕ້ອງກັບເຂົ້າສູ່ມາດຕະມາດປິດເມືອງຢ່າງເຂັ້ມງວດເປັນເວລາ 2 ອາທິດ ລະຫວ່າງວັນທີ 4-18 ສິງຫານີ້ ຕາມຄຳສັ່ງຂອງທ່ານ ໂຣດຼິໂກ ດູເຕເຕ ປະທານປະເທດຟິລິບປິນ, ໃນໄລຍະດັ່ງກ່າວລະບົບຂົນສົ່ງສາທາລະນະເກືອບທຸກແຫ່ງຈະຕ້ອງໄດ້ຢຸດໃຫ້ບໍລິການ ເຊັ່ນດຽວກັນກັບທຸລະທີ່ບໍ່ມີຄວາມຈຳເປັນ.

ຂະນະດຽວກັນ, ມາດຕະການຈຳກັດການເຄື່ອນໄຫວຂອງປະຊາຊົນຈະມີຄວາມເຂັ້ມງວດຫຼາຍຂຶ້ນຕະຫຼອດໄລຍະເວລາດັ່ງກ່າວ, ການເດີນທາງອອກຈາກເຮືອນຕ້ອງມີເຫດຜົນອັນຈຳເປັນ ເຊັ່ນການໄປວຽກໃດໜຶ່ງທີ່ບໍ່ສາມາດເຮັດຢູ່ເຮືອນໃດ ຫຼື ການໄປໂຮງໝໍ, ສ່ວນການອອກໄປຊື້ສິນຄ້າຈຳເປັນກຳນົດໃຫ້ 1 ຄົນຕໍ່ 1 ຄອບຄົວ ແລະ ສາມາດອອກເຮືອນໄປຊື້ໄດ້ພຽງມື້ລະ 1 ຄັ້ງທຳນັ້ນ ໂດຍເຈົ້າໜ້າທີ່ຝ່າຍຄວາມໝັ້ນຄົງຈະຕັ້ງຈຸດກວດບຸກຄົນ ເຊິ່ງຈະຜ່ານດ່ານໄດ້ຕ້ອງມີເອກະສານຕາມທີ່ທາງການກຳນົດ.

ການຕັດສິນໃຈດັ່ງກ່າວຂອງທ່ານປະທານປະເທດຟິລິບປິນ ເກີດຂຶ້ນທ່າມກາງສຽງຮຽກຮ້ອງຢ່າງໜັກຈາກສະມາຄົມວິຊາຊີບການແພດໃນປະເທດ, ໃນຂະນະທີ່ຟິລິບປິນກາຍເປັນປະເທດທີ່ 2 ໃນພູມມິພາກອາຊີຕາເວັນອອກສຽງໃຕ້ ທີ່ຜູ້ຕິດເຊື້ອສະສົມຈາກພະຍາດໂຄວິດ-19 ຫຼາຍກວ່າ 100,000 ຄົນ ໂດຍຈຳນວນຜູ້ຕິດເຊື້ອທີ່ໄດ້ຮັບການຢືນຢັນ ສະເພາະເມື່ອວັນອາທິດ (2 ສິງຫາ) ທີ່ຜ່ານມາ ມີຈຳນວນຫຼາຍກວ່າ 5,000 ຄົນ ເປັນສະຖິຕິລາຍວັນສູງສຸດຄັ້ງໃໝ່, ຂະນະທີ່ຜູ້ເສຍຊີວິດສະສົມເພີ່ມເປັນຫຼາຍກວ່າ 2,000 ຄົນ.

HTML tutorial