ສ.ອາເມຣິກາ ບີບບັງຄັບ TikTok ໃຫ້ຂາຍກິດຈະການແກ່ Microsoft ບໍ່ດັ່ງນັ້ນຈະຕ້ອງຖືກປິດ

ລາຍງານ 3 ສິງຫາ 2020, ບໍລິສັດ Microsoft ອອກຖະແຫຼງການວ່າ ທ່ານ ສັດຕະຍາ ນາເດວລາ ປະທານຄະນະຜູ້ບໍລິຫານ (CEO) ຂອງ Microsoft ເຂົ້າພົບທ່ານ ໂດໂນ ທຣຳ ປະທານປະເທດ ສ.ອາເມຣິກາ ທີ່ທຳນຽບຂາວເມື່ອວັນອາທິດ (2 ສິງຫາ) ທີ່ຜ່ານມາ.

ເຊິ່ງ Microsoft ຢືນຢັນວ່າທ່ານ ສັດຕະຍາ ນາເດວລາ ມີຄວາມເຂົ້າໃຈຕໍ່ຄວາມເປັນຫ່ວງຂອງທ່ານ ໂດໂນ ທຣຳ ທີ່ກຳລັງຈະດຳເນີນການຢູ່, ເຖິງຢ່າງໃດກໍ່ຕາມ ບໍລິສັດຈະເດີນໜ້າເຈລະຈາກັບບໍລິສັດເຈົ້າຂອງ TikTok ຕໍ່ໄປ ເພື່ອສະແຫວງຫາໂອກາດຂອງການທີ່ Microsoft ຈະຊື້ກິດຈະການຂອງ TikTok ໃນ ສ.ອາເມຣິກາ ແຕ່ຍັງບໍ່ສາມາດຮັບປະກັນໄດ້ວ່າຈະປະສົບຄວາມສຳເລັດຫຼືບໍ່?.

ຂະນະທີ່ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ ກ່າວວ່າ ທ່ານ ໂດໂນ ທຣຳ ຈະມີມາດຕະການທີ່ເດັດຂາດຢ່າງແນ່ນອນ ຕໍ່ບໍລິສັດຊັອບແວຂອງຈີນ ທີ່ມີສຳນັກງານຢູ່ໃນປະເທດ ບໍ່ພຽງແຕ່ສະເພາະ TikTok, ໃນດ້ານຂອງທ່ານ ສະຕີຟ ມະນູຊິນ ລັດຖະມົນຕີກະຊວງການເງິນ ສ.ອາເມຣິກາ ກ່າວວ່າການດຳເນີນການຂອງ TikTok ໃນ ສ.ອາເມຣິກາ ບໍ່ສາມາດເປັນເຊັ່ນນີ້ໄດ້ອີກຕໍ່ໄປ ແລະ TikTok ເຫຼືອທາງເລືອກພຽງທາງດຽວ ຕ້ອງຂາຍທຸລະກິດໃຫ້ ສ.ອາເມຣິກາເທົ່ານັ້ນ ຫຼື ບໍ່ກໍ່ຕ້ອງປິດສຳນັງການ ເຊິ່ງບໍລິການທັງໝົດຈະຖືກຫ້າມນຳໃຊ້.

ເຖິງແມ່ນວ່າຍັງບໍ່ມີຝ່າຍໃດໃຫ້ຂໍ້ມູນຢ່າງເປັນທາງການກ່ຽວກັບຜົນການປຶກສາຫາລືລະຫວ່າງທ່ານ ໂດໂນ ທຣຳ ກັບ ທ່ານ ສັດຕະຍາ ນາເດວລາ,ແຕ່ສຳນັກຂ່າວ Reuters ລາຍງານໂດຍອ້າງອີງແຫ່ງຂ່າວ ວ່າຜູ້ນຳ ສ.ອາເມຣິກາກຳນົດໄລຍະເວລາ 45 ວັນ ຫຼື ຈົນເຖິງວັນທີ 15 ກັນຍານີ້ ໃຫ້ Microsoft ບັນລຸຂໍ້ຕົກລົງກັບບໍລິສັດ ByeDance ທີ່ນະຄອນຫຼວງປັກກິ່ງ ສປ.ຈີນ ເຊິ່ງເປັນເຈົ້າຂອງ TikTok.

ເຊິ່ງກໍ່ບໍ່ມີການຢືນຢັນຊັດເຈນວ່າ ທ່ານ ໂດໂນ ທຣຳ ປ່ຽນໃຈເພາະເຫດໃດ ແຕ່ແຫຼ່ງຂ່າວວິເຄາະວ່າ ອາດຈະກ່ຽວຂ້ອງກັບການທີ່ແກນນຳຫຼາຍຄົນຂອງພັກຣິພົບລິກັນ ກ່ອມອອຍໃຫ້ຜູ້ນຳ ສ.ອາເມຣິກາສະໜັບສະໜູນຄວາມພະຍາຍາມຂອງ Microsoft ໃນການຄວບລວມກິດຈະການຂອງ TikTok ຈາກ ByeDance.

ຫາກ Microsoft ສາມາດເຈລະຈາກັບ ByeDance ສຳເລັດ ບໍລະສັດຈະບໍ່ໄດ້ເປັນເຈົ້າຂອງກິດຈະການ TikTok ສະເພາະໃນ ສ.ອາເມຣິກາເທົ່ານັ້ນ ແຕ່ຍັງລວມເຖິງການາດາ, ອົດສະຕຣາລີ ແລະ ນິວຊີແລນ, ເຖິງຢ່າງໃດກໍ່ຕາມ ສຳນັກງານໃຫຍ່ຂອງ ByeDance ໃນນະຄອນຫຼວງປັກກິ່ງ ແລະ ລັດຖະບານຈີນຍັງບໍ່ສະແດງຈຸດຢືນຢ່າງເປັນທາງການ.

HTML tutorial