ຈີນກ່າວວ່າ ການກະທຳຂອງ ສ.ອາເມຣິກາຕໍ່ TikTok ຄືອັນທະພານຢ່າງຊັດເຈນ

ລາຍງານ 4 ສິງຫາ 2020, ທ່ານ ຫວັງ ເຫວິນປິນ ໂຄສົກກະຊວງການຕ່າງປະເທດຈີນ ກ່າວໃນຕອນໜຶ່ງຂອງການຖະແຫຼງປະຈຳວັນອັງຄານນີ້ ວ່າຂໍ້ຂັດແຍ່ງລະຫວ່າງລັດຖະບານ ສ.ອາເມຣິກາ ພາຍໃຕ້ການນຳຂອງທ່ານ ໂດໂນ ທຣຳ ກັບບໍລິສັດ ByeDance ເຊິ່ງເປັນເຈົ້າຂອງແອັບ TikTok ວ່າ ອອກແລວໄປໄກຈາກພື້ນຖານຂອງລະບົບເສດຖະກິດຕະຫຼາດ ແລະ ບັນທັດຖານຂອງອົງການການຄ້າໂລກ (WTO) ທັງໃນດ້ານການເປີດກວ້າງ, ຄວາມໂປ່ງໃສ ແລະ ການບໍ່ເລືອກປະຕິບັດ ຖືເປັນພຶດຕິກຳອັນທະພານຢ່າງຊັດເຈນທີ່ສຸດ.

ທ່ານ ຫວັງ ເຫວິນປິນ ກ່າວຕໍ່ອີກວ່າ ການທີ່ລັດຖະບານ ສ.ອາເມຣິກາຍົກປະເດັນດ້ານຄວາມໝັ້ນຄົງມາເປັນຂໍ້ອ້າງ ເປັນສິ່ງທີ່ບໍ່ສົມເຫດສົມຜົນຢ່າງຍິ່ງ ແລະ ຈົນເຖິງຕອນນີ້ ສ.ອາເມຣິກາກໍ່ຍັງບໍ່ເຫັນສະແດງຫຼັກຖານທີ່ລະບຸໄດ້ຊັດເຈນວ່າ TikTok ເປັນໄພຄຸກຄາມດ້ານຄວາມໝັ້ນຄົງແນບໃດ.

ເຊິ່ງທ່ານ ໂດໂນ ທຣຳ ກ່າວເຖິງແອັບ TikTok ວ່າເປັນແອັບທີ່ປະສົບຄວາມສຳເລັດຢ່າງຍິ່ງ, ເຖິງຢ່າງໃດກໍ່ຕາມ ໃນເມື່ອ TikTok ຕ້ອງການປັກຫຼັກຢູ່ໃນ ສ.ອາເມຣິກາ ຄົນອາເມຣິກາຕ້ອງເປັນເຈົ້າຂອງ ແລະ ກ່າວຕໍ່ໄປວ່າລັດຖະບານ ສ.ອາເມຣິກາຕ້ອງການຕັດບັນຫາເລື່ອງຄວາມໝັ້ນຄົງ ພ້ອມທັງຢືນຢັນວ່າ ຫາກ Microsoft ບໍ່ປະສົບຜົນສຳເລັດໃນການເຈລະຈາຊື້ແອັບ TikTok ກັບ ByeDance ແຕ່ນີ້ເຖິງວັນທີ 15 ກັນຍານີ້ ແອັບ TikTok ຈະຖືກຫ້າມຢ່າງຖາວອນໃນ ສ.ອາເມຣິກາ.

ທ່ານ ໂດໂນ ທຣຳ ກ່າວອີກວ່າ ໃນກໍລະນີທີ່ການເຈລະຈາບັນລຸຜົນ ກະຊວງການເງິນ ສ.ອາເມຣິກາ ຄວນໄດ້ຮັບສ່ວນແບ່ງຈາກຂໍ້ຕົກລົງມູນຄ່າມະຫາສານລະຫວ່າງ Microsoft ກັບ TikTok ແຕ່ບໍ່ໄດ້ລະບຸລະອຽດວ່າ ລັດຖະບານ ສ.ອາເມຣິກາ ຈະຮ່ວມຮັບຜົນປະໂຫຍດນັ້ນໄດ້ແນວໃດ.

ໃນເວລາດຽວກັນ, ສຳນັກງານໃຫຍ່ຂອງ ByeDance ໃນນະຄອນຫຼວງປັກກິ່ງ ເຜີຍແຜ່ບັນທຶກຂໍ້ຄວາມສະບັບທີ 2 ຂອງທ່ານ ຈາງ ອີ້ໝິງ ຜູ້ສ້າງຕັ້ງ ແລະ ປະທານຄະນະຜູ້ບໍລິຫານ ມີເນື້ອໃນສຳຄັນວ່າ ຫຼາຍຝ່າຍກຳລັງຕີຄວາມໝາຍສະຖານະການຄັ້ງນີ້ຄາດເຄື່ອນ ເນື່ອງຈາກເປົ້າໝາຍທີ່ແທ້ຈິງຂອງລັດຖະບານ ສ.ອາເມຣິກາ ບໍ່ແມ່ນການບັງຄັບໃຫ້ ByeDance ຂາຍກິດຈະການຂອງ TikTok ໃນ ສ.ອາເມຣິກາ ແຕ່ຄືການກຳຈັດແອັບນີ້ອອກຈາກຕະຫຼາດ.

HTML tutorial