ອາໂມນີອອມນີຕາດຈາກເຮືອໂຣຊຸສ ຈຸດຊະນວນເຫດໂສກອະນາດຕະກຳຄັ້ງໃຫຍ່ຂອງລີບັງ

ລາຍງານ 6 ສິງຫາ 2020,​ຈາກເຫດລະເບີດຢ່າງຮຸນແຮງທີ່ທ່າເຮືອໃນນະຄອນຫຼວງເບຣຸດ ປະເທດລີບັງ ເມື່ອວັນທີ 4 ສິງຫາ ທີ່ຜ່ານມາ ສົ່ງຜົນໃຫ້ມີຜູ້ເສຍຊີວິດແລ້ວ 137 ຄົນ ແລະ ໄດ້ຮັບບາດເຈັບຫຼາຍກວ່າ 5,000 ຄົນ ໂດຍທຸກຝ່າຍເຊື່ອວ່າເກີດຈາກອາໂມນີອອມນີຕາດ ນ້ຳໜັກ 2,750 ໂຕນ ທີ່ຖືກມ້ຽນໄວ້ພາຍໃນສາງສິນຄ້າຂອງທ່າເຮືອມາເປັນເວລາກວ່າ 6 ປີ.

ພາບ: ທ່າເຮືອນະຄອນຫຼວງເບຣຸດ ກ່ອນ ແລະ ຫຼັງເກີດເຫດລະເບີດຄັ້ງໃຫຍ່

ຫວນຄືນກັບໄປເມື່ອເດືອນຕຸລາ 2013 ເຮືອບັນທຸກສິນຄ້າ MV Rhosus (ເອັມວີ ໂຣຊຸສ) ຕິດທຸງຊາດໂມນດາວີ ມີກຳນົດເດີນທາງຈາກຊອກຊີໄປຍັງໂມຊຳບິກ ໂດຍໜຶ່ງໃນສິ່ງທີ່ຢູ່ເທິງເຮືອຄື “ອາໂມນີອອມນີຕາດ” ຈຳນວນຫຼາຍ ແຕ່ລະຫວ່າງການເດີນທາງເຮືອໂຣຊຸສ ໄດ້ປ່ຽນເສັ້ນທາງແລ້ວເຂົ້າຈອດທຽບທ່າໃນນະຄອນຫຼວງເບຣຸດ.

ສື່ທ້ອງຖິ່ນຫຼາຍແຫ່ງຂອງລີບັງ ແລະ ອີກຫຼາຍປະເທດໃນຕາເວັນອອກກາງລາຍງານເສັ້ນທາງຂອງອາໂມນີອອມນີຕາດປະລິມານມະຫາສານ ຈາກເຮືອໂຣຊຸສເປັນຂອງທ້າວ ອິກໍ ເກຼຊຸສກິນ ນັກທຸລະກິດສັນຊາດລັດເຊຍ ແຕ່ສະພາບຂອງເຮືອລຳນີ້ຊຸກໂຊມຫຼາຍ ເນື່ອງຈາກມີອາຍຸການໃຊ້ງານມາແລ້ວປະມານ 40 ປີ ແລະ ເກືອບບໍ່ເຄີຍໄດ້ຮັບການປົວແປງຕາມມາດຕະຖານ ລວມທັງມີຂໍ້ມູນວ່າທ້າວ ເກຼຊຸສກິນ ຕິດໜີ້ຄ່າແຮງງານລູກເຮືອມາແລ້ວຫຼາຍຄັ້ງ.

ຂະນະທີ່ຫຼາຍຝ່າຍເລີ່ມຕັ້ງຂໍ້ສັງເກດ ແລະ ມີຄວາມສົງໄສວ່າ ດ້ວຍເຫດໃດເຮືອໂຣຊຸສຈຶ່ງປ່ຽນເສັ້ນທາງ ແລະ ມາຈອດທີ່ລີບັງ ລາຍງານກະແສໜຶ່ງລະບຸວ່າ ເຮືອປະສົບບັນຫາຈັກເຮືອຂັດຂ້ອງກະທັນຫັນ ແຕ່ລາຍງານອີກກະແສລະບຸວ່າ ທ້າວ ເກຼຊຸສກິນສັ່ງໃຫ້ລູກເຮືອເຊິ່ງສ່ວນໃຫຍ່ເປັນຄົນອູແກຣນ ປ່ຽນເສັ້ນທາງໄປຍັງລີບັງ ເພື່ອຮັບຕູ້ສິນຄ້າມາບັນທຸກເພີ່ມ ເພື່ອສ້າງລາຍຮັບໃຫ້ກັບບໍລິສັດໃນອະນາຄົດ.

ເມື່ອຈອດທຽບທ່າໃນນະຄອນຫຼວງເບຣຸດ ຜັດພົບກັບບັນຫາໃຫຍ່ ຈາກແຜນການທີ່ຈະຈອດທຽບທ່າຊົ່ວຄາວ ຕ້ອງກາຍເປັນຕະຫຼອດການ ເມື່ອເຈົ້າໜ້າທີ່ຂອງລີບັງກວດພົບອາໂມນີອອມນີຕາດ 2,750 ໂຕນ,  ລາຍງານຂອງ CNN ແລະ The New York Times ລະບຸວ່າ ນອກຈາກຕ້ອງຖືກຢຶດອາໂມນີອອມນີຕາດແລ້ວ ເຮືອຍັງບໍ່ສາມາດຈ່າຍຄ່າທຳນຽມການຈອດທຽບທ່າໄດ້ ແລະ ຍັງມີການກວດພົບຮູຮົ່ວຢູ່ລຳເຮືອດ້ານໜຶ່ງ ເຊິ່ງຕ້ອງມີການປ້ຳນ້ຳອອກອີກດ້ວຍ.

ທ້ານ ບໍຣິສ ໂພຣໂກເຊັບ ກັບຕັນເຮືອໂຣຊຸສ ກ່າວວ່າທ້າວ ເກຼຊຸສກິນເຊິ່ງຮ່ວມເດີນທາງມາກັບເຮືອນຳ ໄດ້ໜີອອກຈາກເຮືອເປັນຄົນທຳອິດ ແລະ ບໍ່ກັບມາຊ່ວຍເຫຼືອຫຍັງອີກເລີຍ, ຕົນ ແລະ ລູກເຮືອຄົນອື່ນໆທີ່ເຫຼືອຕິດຢູ່ທີ່ລີບັງເຖິງ 10 ເດືອນ ກ່ອນຈະໄດ້ຮັບອະນຸຍາດໃຫ້ເດີນທາງກັບປະເທດ ໂດຍຖິ້ມເຮືອ ແລະ ອາໂມນີອອມນີຕາດທັງໝົດໄວ້ ຫຼັງຈາກນັ້ນມີລາຍງານວ່າ ໃນໄລຍະໜຶ່ງຂອງປີ 2014 ເຈົ້າໜ້າທີ່ຂອງລີບັງໄດ້ຂົນຍ້າຍອາໂມນີອອມນີຕາດທັງໝົດອອກມາມ້ຽນໄວ້ໃນສາງໝາຍເລກ 12 ຂອງທ່າເຮືອ ແຕ່ເຮືອບໍ່ໄດ້ຮັບການໃສ່ໃຈ ແລະ ຈົມລົງສູ້ກົ້ນທະເລໄປເອງ.

ຕອນນີ້ມີລາຍງານວ່າທ້າວ ເກຼຊຸສກິນ ອາໄສຢູ່ໃນປະເທດໄຊປຣັດ ຍັງຄົງຕິດຄ້າງຊຳລະຄ່າດຳເນີນການຂອງເຮືອໂຣຊຸສກັບທາງການລີບັງ ແລະ ຍັງບໍ່ສະແດງຈຸດຢືນຕໍ່ເຫດລະເບີດຄັ້ງນີ້, ເຊິ່ງຕໍ່ມາເລີ່ມມີການເປີດເຜີຍໂດຍທ່ານ ບາດຼີ ດາເຮີ ຜູ້ອຳນວຍການສຳນັກງານພາສີແຫ່ງຊາດລີບັງ ວ່າຕົນເຄີຍແຈ້ງຢ່າງໜ້ອຍ 5 ຄັ້ງໃນຮອບ 3 ປີຜ່ານມາ ໄປຍັງໜ່ວຍງານທີ່ມີອຳນາດວ່າ ຢູ່ທ່າເຮືອນະຄອນຫຼວງເບຣຸດ ມີການເກັບສານເຄມີອັນຕະລາຍຢູ່ເປັນຈຳນວນຫຼາຍ ລວມເຖິງການເກັບມ້ຽນອາໂມນີອອມນີຕາດໄວ້ໃນສາງໃກ້ກັບດອກໄມ້ໄຟ ແລະ ຮຽກຮ້ອງໃຫ້ມີການຂົນຍ້າຍອອກຈາກພື້ນທີ່ ເຊິ່ງຢູ່ໃກ້ກັບເຂດທີ່ຢູ່ອາໄສຂອງປະຊາຊົນ ແຕ່ບໍ່ໄດ້ຮັບການຕອບສະໜອງຢ່າງຈິງຈັງ.

ໂດຍອາໂມນີອອມນີຕາດເປັນສານເຄມີທີ່ມີຄຸນສົມບັດທຳລາຍລ້າງໃນລະດັບສູງ ແຕ່ບໍ່ສາມາດລະເບີດເອງໄດ້ ໝາຍຄວາມວ່າຕ້ອງມີຕົວຈູດລະເບີດ ໂດຍອ້າງອີງຈາກສຳນັກຂ່າວ LBCI ຂອງບີລັງເຜີຍເປີດວ່າ ສາງໝາຍເລກ 12 ຢູ່ໃກ້ກັບສາງໝາຍເລກ 9 ທີ່ເກັບມ້ຽນບັງພຸ ແລະ ດອກໄມ້ໄຟໄວ້ເປັນຈຳນວນຫຼາຍ ແລະ ການເຮັດວຽກຂອງແຮງງານໃນພື້ນທີ່ທີ່ມີການໃຊ້ຕູ້ຈອດເຫຼັກ ອາດເຮັດໃຫ້ເກີດໄຟໄໝ້ສ້າງໝາຍເລກ 9 ແລ້ວລຸກລາມຢ່າງວ່ອງໄວໄປຍັງສ້າງໝາຍເລກ 12 ຈົນກາຍເປັນການລະເບີດທີ່ມີອານຸພາບ ແລະ ລັດສະໜີທຳລາຍລ້າງຄັ້ງໃຫຍ່ທີ່ສຸດໃນປະຫວັດສາດຂອງລີບັງ.

HTML tutorial