ປ.ທຣຳ ເຊັນຄຳສັ່ງຫ້າມ TikTok ແລະ WeChat ໃນ ສ.ອາເມຣິກາຢ່າງເປັນທາງການ

ລາຍງານ 7 ສິງຫາ 2020, ທ່ານ ໂດໂນ ທຣຳ ປະທານປະເທດ ສ.ອາເມຣິກາ ໄດ້ລົງລາຍເຊັນໃນຄຳສັ່ງຝ່າຍບໍລິຫານ ເມື່ອວັນພະຫັດ (6 ສິງຫາ) ທີ່ຜ່ານມາ ຫ້າມບຸກຄົນ ແລະ ນິຕິບຸກຄົນໃນ ສ.ອາເມຣິກາເຮັັດທຸລະກິດຮ່ວມກັບບໍລິສັດ ByteDance ຂອງ ສປ.ຈີນ ເຊິ່ງເປັນບໍລິສັດແມ່ຂອງ TikTok ເພື່ອແກ້ໄຂເຫດສຸກເສີນລະດັບຊາດດ້ານເຕັກໂນໂລຊີຂໍ້ມູນຂ່າວສານ ຕະຫຼອດຮອດຕ່ອງໂຊ້ອຸປະທານດ້ານການບໍລິການ ໂດຍໄດ້ເຈາະຈົງວ່າ ບໍລິການຂອງ TikTok ເກັບກຳຂໍ້ມູນສ່ວນບຸກຄົນທີ່ລວມເຖິງພຶດຕິກຳການໃຊ້ງານ ແລະ ການເຄື່ອນໄຫວຂອງການໃຊ້ຂໍ້ມູນເຊັ່ນ: ຕຳແໜ່ງທີ່ຕັ້ງ ແລະ ປະຫວັດການຄົ້ນຫາ ເພື່ອສະແຫວງຫາຜົນປະໂຫຍດໃຫ້ກັບພັກຄອມມູນິດຈີນ.

ຂະນະທີ່ມາດຕະການແບບດຽວກັນຍັງມີຜົນກັບບໍລິສັດ Tencent ເຊິ່ງເປັນເຈົ້າຂອງແອັບ WeChat ແລະ ລະບຸວ່າ ຫາກ WeChat ຕ້ອງການສືບຕໍ່ໃຫ້ບໍລິການໃນ ສ.ອາເມຣິກາຕໍ່ໄປ Tencent ຕ້ອງຂາຍກິດຈະການທັງໝົດຂອງ WeChat ໃນ ສ.ອາເມຣິກາ.

ເຊິ່ງຄຳສັ່ງດັ່ງກ່າວຈະມີຜົນບັງຄັບໃຊ້ທັນທີໃນອີກ 45 ວັນ ນັບຕັ້ງແຕ່ວັນທີ່ໄດ້ລົງເຊັນຄືວັນທີ 6 ສິງຫາ ໂດຍເປັນການອາໄສອຳນາດຕາມກົດໝາຍສຸກເສີນດ້ານເສດຖະກິດລະຫວ່າງປະເທດ.

ໃນດ້ານຂອງບໍລິສັດ ByteDance ໄດ້ອອກຖະແຫຼງການໃນວັນສຸກນີ້ ມີເນື້ອໃນຕອນໜຶ່ງວ່າ ລັດຖະບານ ສ.ອາເມຣິກາ ດຳເນີນການໂດຍປາສະຈາກການຄຳນຶງເຖິງຫຼັກແຫ່ງຄວາມເປັນຈິງ ແລະ ຍັງຂົ່ມຂູ່ໃຫ້ມີການປ່ຽນແປງຂໍ້ຕົກລົງທາງການຄ້າຈົນບໍ່ເປັນໄປຕາມຫຼັກການພື້ນຖານຂອງກົດໝາຍທີ່ກ່ຽວຂ້ອງ ນອກຈາກນີ້, ລັດຖະບານ ສ.ອາເມຣິກາ ຍັງພະຍາຍາມແຊກແຊງການເຈລະຈາລະຫວ່າງຜູ້ປະກອບການພາກເອກະຊົນອີກດ້ວຍ.

ByteDance ຈະຜ່ານຜ່າອຸປະສັກທັງໝົດຕາມຂະບວນການ ເພື່ອສ້າງຄວາມເຊື່ອໝັ້ນໃຫ້ກັບທຸກຝ່າຍວ່າ ຫຼັກນິຕິກຳຈະບໍ່ຖືກທຳລາຍ ແລະ ຜູ້ໃຊ້ບໍລິການຂອງ TikTok ທຸກຄົນໄດ້ຮັບການປະຕິບັດຢ່າງເປັນທຳ ໂດຍຫາກບໍ່ແມ່ນການດຳເນີນການລະຫວ່າງລັດຕໍ່ລັດ ກໍ່ຕ້ອງນຳເຂົ້າສູ່ຂະບວນການໃນຊັ້ນສານຕໍ່ໄປ.

ເຖິງຢ່າງໃດກໍ່ຕາມ ບໍລິສັດ Tencent ເຊິ່ງປັດຈຸບັນເປັນບໍລິສັດທີ່ມີມູນຄ່າຫຼັກຊັບຕາມລາຄາຕະຫຼາດສູງເປັນອັນດັບ 8 ຂອງໂລກ ຕາມລາຍງານຂອງ Bloomberg ຄືປະມານ 686,000 ລ້ານໂດລາສະຫະລັດ ຍັງບໍ່ມີປະຕິກິລິຍາຢ່າງເປັນທາງການ.

ໃນອີກດ້ານໜຶ່ງທ່ານ ຫວັງ ເຫວິນປິນ ໂຄສົກກະຊວງການຕ່າງປະເທດຈີນ ກ່າວກ່ຽວກັບບັນນີ້ພຽງວ່າ ລັດຖະບານ ສ.ອາເມຣິກາໃຊ້ເລື່ອງຄວາມໝັ້ນຄົງເປັນຂໍ້ອ້າງ ເພື່ອກົດຂີ່ຂົ່ມເຫງທຸລະກິດຂອງຕ່າງປະເທດກໍ່ເທົ່ານັ້ນ.